Luk 24:1-53
24 Bõtab ilo raan eo m̦oktata ilo wiik eo tok juon,* rar etal ke ej jimmarok wõt ñan lõb* eo, im rar bõkl̦o̦k tol̦aj* ko rar kõpooji.
2 Bõtab rar lo bwe em̦õj kadãpill̦o̦k dekã eo jãn mejãn lõb* eo,
3 im ke rar del̦o̦ñ, rar jab loe ãnbwinnin Irooj Jesus.
4 Rej bwilõñ wõt kõn men in ak ruo em̦m̦aan rej ekkõn̦ak nuknuk ko rejjatõltõl rar jutak iturier.
5 Kõrã ro rar kanooj mijak im rar reilal̦l̦o̦k wõt, im em̦m̦aan ro rar ba ñan er: “Etke kom̦ij pukot eo emour ilo lõb in?
6 Ejako ijin, kõnke em̦õj kejerkake jãn mej. Keememej bwe ke ear pãd ilo Galili, ear kõnnaan ñan kom̦
7 im ba bwe renaaj aikuj lel̦o̦k Nejin armej* ñan rijjerawiwi ro im renaaj m̦ane ilo aer dilaiki ilo jurõn al̦al̦, bõtab ilo raan eo kein kajilu enaaj bar mour.”
8 Innem rar keememejtok naan ko ear ba,
9 im rar etal jãn lõb* eo im kwal̦o̦k aolep men kein ñan rijjilõk ro 11 im aolep ri-kal̦oor ro jet.
10 Etan kõrã rein ej Meri Magdalini, Joanna, im Meri jinen Jemes. Bareinwõt, kõrã ro jet me rar etal ippãerl̦o̦k rar bar ba men kein ñan rijjilõk ro,
11 ak rar jab tõmak er, im rar l̦õmn̦ak bwe kõrã rein rej make kõm̦m̦an aer bwebwenato.
12 Bõtab Piter ear jutak im ettõrl̦o̦k ñan lõb* eo, im ke ear allimõmõ im kalimjeke lowaan ear lo wõt nuknuk ko rar kũtimi kaki. Kõn men in, ear ilo̦k jãn ijo im ear kõl̦mãnl̦o̦kjen̦ ippãn make kõn men eo ear wal̦o̦k.
13 Ilo ejja raan eo wõt, ruo iaan ri-kal̦oor ro rar etal ñan juon bukwõn etan Emmeõs, enañin jimjuon m̦ail̦ ettol̦o̦kin jãn Jerusalem.
14 Erro ar bwebwenato ippãn doon kõn aolep men ko rar wal̦o̦k.
15 Erro ej bwebwenato im kõnnaan wõt kõn men kein ak Jesus ear jãdel̦o̦k im etetal ippãerro,
16 bõtab erro ar jab kile.
17 Ear ba ñan erro: “Ta kan̦e el̦ap amiro kõnnaan kaki?” Innem rar bõjrak ak rej mejãn bũrom̦õj,
18 im juon iaaer etan Kliopas ear uwaake im ba: “Kwe ruwamãejet ke?* Etke kwõjaje kõn ta ko ej kab m̦õj aer wal̦o̦k ilo Jerusalem ke kwõj jokwe ie?”
19 Im ear kajjitõk ippãerro: “Ta ko rar wal̦o̦k?” Im rar ba ñane: “Men ko rar wal̦o̦k ñan Jesus, ri-Nazeret eo. Ear kam̦ool im̦aan mejãn Anij im aolep armej bwe ear juon ri-kanaan eo ekajoor ilo naan im kõm̦m̦an ko an.
20 Innem bũrij ro reutiej im ri-tõl ro rar bõkl̦o̦ke ñan ro renaaj kar liaakel̦o̦ke ñan mej, innem rar dilaiki ilo jurõn al̦al̦.
21 Kõmar kõjatdikdik bwe enaaj kar em̦m̦aan eo in ej itõn lo̦mo̦o̦ren Israel. Ejjab men in wõt, ak rainin ej raan eo kein kajilu jãn ke men kein wõj rar wal̦o̦k.
22 Bareinwõt, kõmar bwilõñ kõnke jet iaan kõrã ro m̦õttam rar etal in jimmarok ñan lõb* eo,
23 ak ke rar jab loe ãnbwin eo, rar itok im ba bwe ewõr enjel̦ rar wal̦o̦kl̦o̦k ñan er im ba bwe Jesus emour.
24 Innem jet iaan ro rar pãd ippemmim rar etal ñan lõb* eo im rar lo ejja ãinwõt an kar kõrã ro ba, bõtab rar jab lo Jesus.”
25 Kõn men in, ear ba ñan erro: “El̦ap wõt amiro penawiia im rum̦wij amiro likũt ilo bũruomiro aolep men ko ri-kanaan ro rar ba!
26 Ta ejjab ekkar bwe Christ en kar eñtaan kõn men kein bwe en maroñ bõk aiboojoj ke?”
27 Innem ear kõmel̦el̦eik erro kõn aolep men ko Jeje ko rej ba kõn e, jino jãn men ko Moses ear jei im men ko aolep ri-Kanaan ro rar jei.
28 Ke rar epaakel̦o̦k bukwõn eo erro ej jibadekl̦o̦k, Jesus ear kõm̦m̦an bwe en ãinwõt ñe ej itõn wõnm̦aanl̦o̦k wõt ilo ial̦ eo an.
29 Bõtab rar akwel̦ap ñane bwe en pãd, rar ba: “Kwõn pãdwõt ippem bwe m̦õttan jidik ejok marok im ejem̦l̦o̦k rainin.” Kõn men in, ear etal im pãd ippãerro.
30 Ke ear kõjota* ippãerro, ear bõk juon pilawã im jare, im ear kõrrãjete im lel̦o̦k ñan erro.
31 Innem rej kab lukkuun jel̦ã im kile ke e eo, bõtab ear kajju jakol̦o̦k jãn ippãerro.
32 Innem rar ba ñan doon im ba: “Keememej ke an kar naan ko an lukkuun jelõt bũruod ke ear kõnnaan ipperro ilo ial̦ eo, im kanooj kõmel̦el̦eik kõjro kõn Jeje ko?”
33 Im ilo awa eo wõt, erro ar jutak im jepl̦aak ñan Jerusalem, im erro ar loe rijjilõk ro 11 im ro rar pãd ippãer,
34 im rein rar ba: “Em̦ool bwe em̦õj an Irooj jerkak jãn mej im ear jãdel̦o̦k ñan ippãn Saimõn!”
35 Innem erro kar kwal̦o̦k ñan er men ko rar wal̦o̦k ilo kar ial̦ eo aer, im kõn aerro kar kile e ke ear kõrrãjete pilawã eo.
36 Rej kõnnaan wõt kõn men kein ak Jesus ewal̦o̦k im jutak ibwiljier, im ear ba ñan er: “Aenõm̦m̦an ñan kom̦.”
37 Bõtab joñan aer kor im lõl̦ño̦ñ rar l̦õmn̦ak bwe rej lo juon jetõb.
38 Kõn men in, ear ba ñan er: “Etke kom̦ij l̦o̦kjenami? Im etke kom̦ij pere ilo bũruomi?
39 Kom̦win lale peiũ im neõ bwe kom̦win jel̦ã ke ña e, uñũr eõ m̦õk im lale. Ewõr kanniõkũ im diũ, ak juon jetõb ejjel̦o̦k kanniõkin im diin.”
40 Ear kwal̦o̦kl̦o̦k neen im pein ñan er ke ej ba men kein.
41 Ke rejjañin de tõmak kõn aer bwilõñ im lañlõñ, ear ba ñan er: “Ewõr ke kijemi m̦õñã ijin?”
42 Innem rar lel̦o̦k jet ek em̦õj jinkadooli,
43 im ear bõki im kañi im̦aan mejãer.
44 Innem ear ba ñan er: “Ke iar pãd ippemi, iar jiroñ kom̦ bwe aolep men ko kar jei kõn ña ilo Kien Moses, naan ko an ri-Kanaan ro, im Sam ko rej aikuj jejjet kũtieer.”
45 Im ear kõpel̦l̦o̦k l̦õmn̦ak ko aer bwe ren lukkuun mel̦el̦e kõn mel̦el̦ein Jeje ko,
46 im ear ba ñan er, “Eñin men eo kar je: Christ enaaj eñtaan im enaaj jerkak jãn mej ilo raan eo kein kajilu,
47 im ilo etan, naaj kwal̦o̦k kõn ennaan eo ilo aolep aelõñ ko bwe armej rej aikuj ukel̦o̦k ñan jol̦o̦k jerawiwi ko aer, jino jãn Jerusalem.
48 Kom̦ eo kom̦ naaj kwal̦o̦k kõn men kein.
49 Ij ba ñan kom̦ bwe inaaj jilkinwaj ñan kom̦ men eo Jema ear kallim̦ur kake. Bõtab, kom̦win pãdwõt ilo Jerusalem m̦ae iien kajoor eo jãn lañ enaaj itok ioomi.”
50 Im ear ãñinl̦o̦k er jãn ijo ñan Betani, im ear kotak pein im kõjeraam̦m̦an er.
51 Ilo iien eo ej kõjeraam̦m̦an er, ear ilo̦k jãn er im kar bõklõñl̦o̦k ñan lañ.
52 Innem rar kwal̦o̦k kautiej* ñane im rar jepl̦aak ñan Jerusalem kõn el̦ap lañlõñ,
53 im aolep iien rar pãd ilo tampel̦ eo im nõbar Anij.
Footnotes
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Kajin Grik, “libõn keememej.”
^ Kajin Grik, “libõn keememej.”
^ Lale “Nejin armej” ilo Kõmel̦el̦e Ko.
^ Kajin Grik, “libõn keememej.”
^ Kajin Grik, “libõn keememej.”
^ Ak emaroñ, “Kwe wõt ri-lotok ñan Jerusalem ejaje ke?”
^ Kajin Grik, “libõn keememej.”
^ Kajin Grik, “libõn keememej.”
^ Ak “jijet ilo tebõl̦ eo.”
^ Ak “buñpedo.”
