Mark 16:1-8
-
Jesus ejerkakpeje (1-8)
16 Innem ke ear jem̦l̦o̦k raanin Jabõt,* Meri Magdalini, Selome, im Meri jinen Jemes rar wia tol̦aj* bwe ren kapiti ãnbwinnin Jesus.
2 Ke ej jimmarok wõt ilo raan eo m̦oktata ilo wiik eo tok juon,* erjel ar etal ñan lõb* eo im rar tõparl̦o̦k ke ej tak al̦.
3 Im rar ba ñan doon im ba: “Wõn enaaj kadãpill̦o̦k dekã en̦ jãn mejãn lõb en̦ ñan kõj?”
4 Bõtab ke rar reilo̦k ñan lõb eo, rar lo bwe em̦õj kadãpill̦o̦k dekã eo, meñe elukkuun kilep.
5 Innem ke rar del̦o̦ñl̦o̦k ilowaan lõb eo, rar kanooj l̦o̦kjenaer ke rar lo juon likao ej jijet ituanbwijmaroñ im ej nuknuk mouj.
6 Bõtab ear ba ñan er: “Kom̦win jab mijak. Ijel̦ã bwe kom̦ij pukote Jesus ri-Nazeret, eo rar m̦ane ilo aer dilaiki ilo jurõn al̦al̦. Em̦õj an bar mour. Ejako ijin. Lale m̦õk ije rar kõbabuuki ie.
7 Kom̦win etal im kõnnaanek ri-kal̦oor ran̦ an im Piter im ba, ‘Emootl̦o̦k im̦aan ñan Galili. Kom̦ naaj loe ijen̦, ãinwõt an kar jiroñwaj kom̦.’”
8 Im ke rar diwõjl̦o̦k jãn lõb eo, rar kakõtkõt jãn ijo ak relukkuun wũdiddid im l̦o̦kjenaer. Innem rar jab ba ñan jabdewõt kõn aer kanooj mijak.*
Footnotes
^ Lale “Jabõt” ilo Kõmel̦el̦e Ko.
^ Rekõn kõjerbal bo̦uta ak bõlõk im weil̦ ñan kõpooj juon ãnbwin m̦okta jãn aer kalibwini.
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Kajin Grik, “libõn keememej.”
^ Ekkar ñan bok lemlem in etto ko, bokin Mark ej jem̦l̦o̦k ilo eoon 8.
