Mark 2:1-28
2 Ãlikin jejjo raan, Jesus ear jepl̦aak ñan Kaperneum im armej ro rar roñ bwe epãd ilo juon em̦.
2 Kõn men in, elõñ rar itok ñan m̦weo, im joñan an obrak ear obrakl̦o̦k ñan kõjãm eo. Innem ear jino kwal̦o̦k naan ñan er kõn ennaan eo em̦m̦an.
3 Im rar bõktok juon em̦m̦aan ejaje m̦akũtkũt, im emãn em̦m̦aan rej kotaketok.
4 Bõtab rar jab maroñ kadel̦o̦ñe ñan ippãn Jesus kõn wõt jarlepju eo. Kõn men in, rar rupe iraan m̦weo ikijjeen wõt ijo Jesus ej pãd ie, im rar doorlal̦l̦o̦k em̦m̦aan eo ak ej pãd ioon men eo kinien.
5 Ke Jesus ear lo joñan tõmak eo aer, ear ba ñan em̦m̦aan eo: “Nejũ, em̦õj jol̦o̦k jerawiwi ko am̦.”
6 Ekar wõr jet skraib rej jijet ijo im rej l̦õmn̦ak im ba:
7 “L̦ein ej kõnono n̦ae Anij. Etke ej kõnnaan rot en̦? Ta ebar wõr juon emaroñ jol̦o̦k jerawiwi ijello̦kun Anij ke?”
8 Bõtab, em̦õkaj an Jesus jel̦ã kõn l̦õmn̦ak ko aer im eba ñan er: “Etke kom̦ij l̦õmn̦ak rot kan̦e?
9 Ta eo epidodol̦o̦k ñan ba ñan em̦m̦aan in ejaje m̦akũtkũt, ‘Em̦õj jol̦o̦k jerawiwi ko am̦’ ke ak, ‘Kwõn jutak im bõk men n̦e kiniem̦ im etetal’?
10 Bõtab ñan kam̦ool ñan kom̦ bwe ewõr an Nejin armej* maroñ ñan jol̦o̦k jerawiwi ioon lal̦ in—” ear ba ñan em̦m̦aan eo ejaje m̦akũtkũt:
11 “Ij jiroñ eok bwe kwõn jutak im bõk men n̦e kiniem̦ im ilo̦k ñan m̦weo im̦õm̦.”
12 Im em̦m̦aan eo ear m̦õkaj im jutak im bõk men eo kinien im diwõjl̦o̦k im̦aan mejãer aolep. Innem armej ro rar lukkuun bwilõñ, im rar nõbar Anij im ba: “Jejjañin kar ellolo ãinwõt in.”
13 Juon iien Jesus ear bar ilo̦k iturin lo̦jet l̦o̦k, im ejjab bõjrak an armej ro itok ñan ippãn. Kõn men in, ear jino an katakin er.
14 Im ke ear ilo̦k jãn ijo, ear lo juon em̦m̦aan etan Livai* nejin Alpiõs im ej jijet ilo im̦õn tõltõl eowõj eo, im ear ba ñane: “Kwõn itok im l̦oor eõ.” * Im ear jutak im l̦oore.
15 Tokãlik ear kõjota* ilo m̦weo im̦õn Livai, im elõñ ri-tõltõl eowõj im rijjerawiwi rar kõjota* ippãn Jesus im ri-kal̦oor ro an. Elõñ iaan armej rein rar erom ri-kal̦ooran.
16 Ke skraib ro jãn kumi eo an Parisi* ro rar lo an m̦õñã ippãn ri-tõltõl eowõj ro im rijjerawiwi ro, reba ñan ri-kal̦oor ro an im ba: “Ri-Kaki n̦e ami ej m̦õñã ippãn ri-tõltõl eowõj im rijjerawiwi ke?”
17 Ke Jesus ear roñ men in, ear ba ñan er: “Ro rekajoor rejjab aikuji juon taktõ, ro renañinmej wõt. Iar jab itok bwe in pukot ro rewãnõk,* ak iar itok bwe in pukot rijjerawiwi ro.”
18 Parisi ro im ri-kal̦oor ro an Jon rekõn jitlo̦k. Kõn men in, ri-kal̦oor ro an Jon rar itok ñan ippãn im ba: “Etke kõm kab ri-kal̦oor ro an Parisi ro kõmij ekkeini ammim jitlo̦k ak ri-kal̦oor ran̦e am̦ rejjab?”
19 Innem Jesus euwaake er im ba: “Ewõr ke unin an ro m̦õttan l̦eo ej kab m̦õj an m̦are bũrom̦õj im jitlo̦k ñe l̦eo ej pãdwõt ippãer? Rejjab aikuj jitlo̦k toon wõt an pãd ippãer.
20 Bõtab juon iien naaj bõk l̦eo jãn er, innem rej kab naaj bũrom̦õj im jitlo̦k.*
21 Ejjel̦o̦k en̦ ej karpen nuknuk m̦or kõn m̦õttan kããl. Ñe juon enaaj kõm̦m̦ane men in, m̦õttan eo ekããl epenl̦o̦k im enaaj kõm̦m̦an an potak nuknuk eo im kal̦apl̦o̦k potak eo.
22 Bareinwõt, ejjel̦o̦k en̦ ej teiñil̦o̦k nien wain ko* rem̦or kõn wain ko rekããl. El̦aññe enaaj kõm̦m̦ane men in, nien wain ko renaaj potak im jorrããn im enaaj lutõk wain ko. Wain ko rekããl rej aikuj pãd ilo nien wain ko rekããl.”
23 Juon iien, Jesus ear ilo̦k ibul̦õn jikin kallib in wiit ko ilo raanin Jabõt.* Innem ri-kal̦oor ro an rar jino ittũm̦ leen wiit ke rej etal ippãnl̦o̦k.
24 Ke Parisi ro rar lo men in, rar ba ñane: “Lale m̦õk! Etke rej kõm̦m̦ane men n̦e ke emo̦ kõm̦m̦ane ilo raanin Jabõt?”
25 Ak ear ba ñan er: “Ta kom̦ij jañin kar riit kõn men eo Devid ear kõm̦m̦ane ke ear pãd ilo aikuj im e im l̦õm̦aro doon rar kwõle ke?
26 Ilo bwebwenato eo kõn bũrij eo eutiej etan Ebaiatar, Devid ear del̦o̦ñl̦o̦k ilo m̦weo im̦õn Anij im kañe bũreet in ajel̦o̦k* ko im ear bar lel̦o̦k kijen l̦õm̦aro doon. Emo̦ an jabdewõt kañi men kein kõnke rej ñan bũrij ro wõt.
27 Innem ear jiroñl̦o̦k er im ba: “Anij ear kõm̦m̦ane raanin Jabõt ñan jipañ armej. Ear jab kõm̦m̦an armej bwe ren kautiej raanin Jabõt.
28 Kõn men in, Nejin armej ej bar Irooj in Jabõt.”
Footnotes
^ Lale “Nejin armej” ilo Kõmel̦el̦e Ko.
^ Ãt eo juon etan Matu.
^ Ak “jijet ilo tebõl̦ eo.”
^ Ak “jijet ilo tebõl̦ eo.”
^ Lale “Parisi” ilo Kõmel̦el̦e Ko.
^ Mel̦el̦ein, ro rej l̦õmn̦ak bwe rewãnõkl̦o̦k jãn ro jet.
^ Lale “Jitlo̦k” ilo Kõmel̦el̦e Ko.
^ Nien wain ko me rar kõm̦m̦ani jãn kilin menninmour.
^ Lale “Jabõt” ilo Kõmel̦el̦e Ko.
^ Lale “Bũreet in ajel̦o̦k” ilo Kõmel̦el̦e Ko.
