Matu 11:1-30
11 Ãlikin an Jesus lel̦o̦k naanin tõl ñan ri-kal̦oor ro an 12, ear ilo̦k bwe en katakin im kwal̦o̦k naan ilo jikin ko jet.
2 Ak ke Jon ear pãd ilo jikin kalbuuj im roñ kõn jerbal ko an Christ, ear jilkinl̦o̦k ruo iaan ri-kal̦oor ro an
3 bwe ren kajjitõk ippãn im ba: “Kwe eo ke kõmij kõttare? Ke ta, kõmin kõttar bar juon armej?”
4 Im Jesus ear uwaak er im ba: “Kom̦win jepl̦aak ñan ippãn Jon im kwal̦o̦k ñane kõn men ko kom̦ij roñ im loi.
5 Ro rar pilo rej kiiõ lol̦o̦kjen̦, ro rar jaje etetal rej etetal, ro rar lõba rerreo kiiõ, ro rar jarroñroñ rej roñl̦o̦kjen̦, ro rar mej rebar mour, im ro rejeram̦õl rej roñjake ennaan eo em̦m̦an.
6 Em̦õn̦õn̦õ eo ej lukkuun lõke eõ im ejjab pere eõ.”*
7 Ke ear mootl̦o̦k ri-kal̦oor ro ruo, Jesus ear jino an kõnnaan ñan jarlepju in armej ro kõn Jon, im ba: “Ta eo kom̦ar ilen lale ke kom̦ar ilo̦k ñan ãne jem̦aden? Juon armej me ej ãinwõt juon menin eddek* epidodo an kõto uukto uuktak ke?
8 Ta eo kom̦ar ilen lale? Juon em̦m̦aan ej kõn̦ak nuknuk ko remeoeo* ke? Eban, ro rej kõn̦ak nuknuk ko remeoeo rej jokwe ilo m̦õko im̦õn kiiñ.
9 Kom̦win kwal̦o̦k etke kom̦ar etal. Kom̦ar ilen lale juon ri-kanaan ke? Aet Jon ej juon ri-kanaan, bõtab eutiejl̦o̦k jãn ri-kanaan ro jet.
10 Eñin ej armej eo kar jeje kake im ba: ‘Ij jilkinl̦o̦k ri-keeañ eo aõ im̦aam̦,* im enaaj kõpooj ial̦ eo am̦!’
11 Ij ba ñan kom̦ bwe iaan aolep armej ro im rar mour, ejjañin kar wõr juon en̦ eutiejl̦o̦k jãn Jon ri-Peptaij. Bõtab, eo ettãtata ilo Aelõñin lañ* eutiejl̦o̦k jãne.
12 Jãn tõre ko an Jon ri-Peptaij ñan kiiõ, Aelõñin lañ ej men eo el̦ap an armej kate er ñan kõttõpare. Ro rejjab ebbeer renaaj lo tõprak.
13 Jãn kar tõre ko liktak ñan raan ko an Jon, aolep naan ko an ri-Kanaan ro im Kien eo rar kanaan kõn men ko renaaj wal̦o̦k ilo raan ko rej pãd im̦aan.
14 Im jekdo̦o̦n ñe kom̦ij kõn̦aan tõmak men in ak jaab, Jon ej ‘Ilaija, eo ri-kanaan ro rar ba bwe enaaj itok.’
15 Eo ewõr lo̦jilñin, en roñjake.
16 “Inaaj keidi epepen in ñan wõn? Rej ãinwõt ajri ro rej jijet ilo jikin wia ko im ikkũrl̦o̦k ñan ajri ro m̦õttaer,
17 im ba: ‘Kõmar kõjañjañ al ñan kom̦, ak kom̦ar jab eb. Kõmar lukkuun jañ, ak kom̦ar jab deñdeñõte ubõmi ilo ami bũrom̦õj.’
18 Ãindeinl̦o̦k wõt, Jon ear jab m̦õñã ak idaak, ak armej ro rar ba, ‘Ejuk jetõb ettoon* ippãn l̦ein.’
19 Im ke Nejin armej* ear m̦õñã im idaak, armej ro rar ba, ‘Lale l̦een̦! Elukkuun mattiia* im ekkadekdek.* Ej m̦õttãik ri-tõltõl eowõj ran̦ im rijjerawiwi ran̦.’ Bõtab, kõm̦m̦an* ko an juon armej rej kaalikkar bwe ej juon eo emãlõtlõt.”
20 Innem Jesus ear jino an kõnnaan kõn armej in jikin ko me ear kõm̦m̦ani enañin aolep menin kabwilõñlõñ ko ie, bõtab rar jab ukel̦o̦k jãn jerawiwi ko aer.
21 Ear ba: “Jerata ñan kom̦, armej in Korezin! Jerata ñan kom̦, armej in Betseida! El̦aññe menin bwilõñ ko rar wal̦o̦k ñan kom̦ ren kar wal̦o̦k ñan armej ro ilo Tair im Saidon,* etto wõt ke ren kar ukel̦o̦k ilo aer kõn̦ak nuknuk ko el̦ap ideer im jijet ioon melkwaarar.*
22 Ij ba ñan kom̦ armej in Korezin im Betseida bwe ilo naaj Raanin Ekajet en̦, enaaj l̦apl̦o̦k ami bõk kaje jãn armej in Tair im Saidon.
23 Ak kom̦ armej in Kaperneum, ta kom̦ naaj etal ñan lañ ke? Kom̦ ban! Kom̦ naaj ilo̦k ñan Lõb.* Ñe menin bwilõñ ko im rar wal̦o̦k ilo ijo jikimi ren kar wal̦o̦k ilo Sodom, jikin in enaaj kar pãdwõt ñan rainin.
24 Ij ba ñan kom̦ armej in Kaperneum bwe ilo naaj Raanin Ekajet en̦, enaaj l̦apl̦o̦k ami bõk kaje jãn armej in Sodom.”
25 Innem Jesus eba: “Jema, Irooj in lañ im lal̦, ij nõbar eok ilo̦bwilej kõnke kwaar n̦ooji men kein jãn rimmãlõtlõt ro im ro rejel̦ãl̦o̦kjen̦, bõtab kwaar kwal̦o̦ki ñan ajri ro reddik.
26 Im Jema, kwaar kõm̦m̦ane men in kõnke eñin ej kõn̦aan eo am̦.”
27 Jesus ear bar ba: “Em̦õj an Jema letok men otemjej ñan ña. Ejjel̦o̦k en̦ elukkuun jel̦ã kõn ña* ak Jema wõt. Bareinwõt, ejjel̦o̦k en̦ elukkuun jel̦ã kõn Jema ak ña wõt im ro ij m̦õn̦õn̦õ in kwal̦o̦k kõn Jema ñan er.
28 Kom̦win itok ñan ippa, kom̦ otemjej ro rem̦õk im rej ineek men ko reddo, im inaaj kõtl̦o̦k bwe kom̦win kakkije.
29 Kom̦win bõk kein inene eo aõ im katak jãn ña, bwe ij juon eo eineem̦m̦an im ettã bũruon. Ñe kom̦ naaj kõm̦m̦ane men in, kom̦ naaj kakkije im aenõm̦m̦an.
30 Kein inene eo aõ em̦m̦an, im men eo ij ineeke emera.”
Footnotes
^ Kajin Grik, “Em̦õn̦õn̦õ eo ejjel̦o̦k men en̦ ej kõm̦m̦an an l̦õkatip ippa.”
^ Juon menin eddek eaidik im aetok, im ekkã an eddek iturin ijoko ewõr dãn ie.
^ Ak “nuknuk ko el̦ap on̦ãer.”
^ Kajin Grik, “im̦aan mejam̦.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Lale “Nejin armej” ilo Kõmel̦el̦e Ko.
^ Ak “Elukkuun tõr.”
^ Kajin Grik, “eokkutkut an idaak wain.”
^ Ak “jerbal.”
^ Jikin kein rejjab jikin ri-Ju.
^ Men in ej kõkal̦l̦en aer bũrom̦õj.
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
^ Kajin Grik, “Nejin.”
