Matu 14:1-36
14 Ilo iien eo, Kiiñ Herod ear roñ kõn men ko Jesus ear kõm̦m̦ani.
2 Innem ear ba ñan ri-karejar ro an im ba: “Armej in ej Jon ri-Peptaij im em̦õj an jerkak jãn mej. Eñin unin ewõr an maroñ ñan kõm̦m̦ani menin kabwilõñlõñ kein.”
3 Herod* ekar ba bwe ren bõk Jon im lukwõje im likũti ilo kalbuuj. Herod ear kõm̦m̦ane men in kõn wõt Herodias, lio kar pãleen Pilip, l̦eo jein.
4 Elõñ alen an kar Jon jiroñl̦o̦k Herod im ba: “Ejjab mãlim bwe kwõn bõk liin bwe en pãleem̦.”
5 Innem meñe Herod ear kõn̦aan m̦ane Jon, ak kõn an armej ro watõke Jon bwe ej juon aer ri-kanaan, ear mijak er im ear jab m̦ane.
6 Bõtab, ke rar keememe raanin l̦otak eo an Herod, jiroñ eo nejin Herodias ear eb im̦aan mejãn armej ro wõj. Joñan an kar Herod m̦õn̦õn̦õ,
7 ear kõm̦m̦ane juon an kallim̦ur bwe enaaj lel̦o̦k jabdewõt men jiroñ eo enaaj kajjitõke.
8 Innem ãinwõt an kar jinen ba ñane, jiroñ eo ear ba ñan Herod: “Kwõn letok ñan ña bõran Jon ri-Peptaij ilo juon pileij.”
9 Meñe kiiñ eo ear bũrom̦õj, bõtab kõnke em̦õj an kõm̦m̦an kallim̦ur im kõn wõt ro rej kõjota ippãn,* ear ba bwe ren kõm̦m̦ane men eo jiroñ eo ear kajjitõke.
10 Innem ear ijjilõkl̦o̦k ennaan bwe ren jebbare Jon ilowaan jikin kalbuuj.
11 Im rar bõktok bõran Jon ilo juon pileij im lel̦o̦k ñan jiroñ eo, im ear bõkl̦o̦k ñan ippãn jinen.
12 Tokãlik, ri-kal̦oor ro an Jon rar itok im bõk ãnbwin eo im kalibwini. Innem rar ilo̦k im kõnnaanek Jesus.
13 Ke Jesus ear roñ men in, ear uwe ilo juon wa im jerak jãn ijo ñan juon jikin bwe en makel̦o̦k iaan. Bõtab ke jarlepju in armej ro rar roñ kõn men in, rar etetal jãn ijoko jikier im jibadekl̦o̦ke.
14 Ke ear to jãn wa eo, ear lo jarlepju in armej ro. Ear tũriam̦okake er, im ear kõmour ro renañinmej ibwiljier.
15 Bõtab ke ear jotal̦o̦k, ri-kal̦oor ro an rar itok ñan ippãn im ba: “Ejjel̦o̦k jabdewõt men ilo jikin in ak m̦õttan jidik eboñ. Kwõn ba ñan armej rein bwe ren ilo̦k ñan bukwõn kan̦ jet bwe ren wia kijeer m̦õñã.”
16 Bõtab Jesus eba ñan er: “Rejjab aikuj ilo̦k, kom̦win lel̦o̦k kijeer m̦õñã.”
17 Im rar ba ñane: “Wũdin l̦alem wõt pilawã im ruo wõt ek ippemmim, ejjel̦o̦k bar jabdewõt.”
18 Im ear ba: “Kom̦win bũktoki ñan ippa.”
19 Innem ear jiroñ armej ro bwe ren jijet ioon ujooj ko. Im ear bõk pilawã ko l̦alem im ek ko ruo, im ear reilõñl̦o̦k ñan lañ im jar. Ãlikin an kar kõrrãjeti pilawã ko ñan elõñ m̦õttan, ear lil̦o̦k ñan ri-kal̦oor ro innem rar ajeji ñan armej ro.
20 Aolep armej ro rar m̦õñã im mat, im ke rar aini bween pilawã ko, ear obrak 12 iep.
21 Kar tarrin 5,000 oran em̦m̦aan ro rar m̦õñã, bõtab kar jab bwine oran kõrã ro im ajri ro.
22 Innem ear m̦õkaj im jiroñ ri-kal̦oor ro an bwe ren uwe ilo wa eo im jerakl̦o̦k im̦aan ñan ijo turãjetin lom̦al̦o eo. Ke rar ilo̦k, ear jilkinl̦o̦k armej ro.
23 Ãlikin an kar jilkinl̦o̦k er, ear make iaan lõñl̦o̦k ñan ioon tol̦ eo im jar. Ke ear jinotak boñ ear make wõt iaan ijo.
24 Ilo tõre in, wa eo elukkuun ettol̦o̦k jãn ãne im epen an wõnm̦aanl̦o̦k kõn an l̦ap n̦o im kõnke kõto eo eitok im̦aan.
25 Ak m̦okta jãn an al̦ jino tak,* Jesus ear etetal ioon dãn im jibadekl̦o̦k er.
26 Innem ke ri-kal̦oor ro rar loe an etetal ioon dãn, rar kanooj mijak, im rar ba: “Ta n̦e n̦e tok?”* Im rar lam̦õj kõn aer mijak.
27 Bõtab Jesus ear kõnnaanl̦o̦k ñan er im ba: “Kom̦win peran im jab mijak bwe ña e!”
28 Im Piter ear ba: “Irooj, el̦aññe kwe n̦e, kwõn ba ñan eõ bwe in etetal ioon dãn im iwõj ñan ippam̦.”
29 Innem eba: “Kwõn itok!” Im Piter ear to jãn wa eo im etetal ioon dãn im jibadekl̦o̦k Jesus.
30 Bõtab ear jino mijak kõn an l̦õmn̦ake an l̦ap kõto im n̦o. Im ke ear jino tũm̦m̦wilal̦l̦o̦k, ear lam̦õj im ba: “Irooj, jipañ eõ!”
31 Innem em̦õkaj an Jesus lel̦o̦k pein im jibwe Piter, im eba ñane: “Edik wõt am̦ tõmak. Etke kwõj pere?”
32 Im ãlikin wõt aerro uwel̦o̦k ioon wa eo, ear jako an l̦ap kõto.
33 Innem ri-kal̦oor ro an ilo wa eo rar kwal̦o̦k kautiej* ñane, im rar ba: “Lukkuun m̦ool ke kwe Nejin Anij.”
34 Innem rar el̦l̦ãl̦o̦k wõt im pol̦o̦k ilo jikin eo etan Genesaret.
35 Ke em̦m̦aan in bukwõn eo rar kile Jesus, rar kõnnaanekl̦o̦k armej ro ilo jikin ko jet. Innem armej ro rar bõktok aolep ri-nañinmej ro ñan ippãn.
36 Im rar akwel̦ap ñane bwe en kõtl̦o̦k an ri-nañinmej ro uñũr wõt tõrerein nuknuk eo an. Aolep ro rar uñũri tõrerein nuknuk eo an rar mour.
Footnotes
^ Herod Antipas. Lale “Herod” ilo Kõmel̦el̦e Ko.
^ Ak “ro rej jijet ilo tebõl̦ eo.”
^ Ikõtaan 3 awa jimmarok im iien en̦ al̦ ej tak ilo 6 awa.
^ Ak “Ettõn̦ak men in ke?”
^ Ak “buñpedo.”
