Matu 15:1-39
15 Innem ekar wõr Parisi im skraib rar itok jãn Jerusalem ñan ippãn Jesus, im rar ba:
2 “Etke ri-kal̦oor ran̦e am̦ rejjab l̦oore m̦anit im imminene ko an ro jim̦m̦aad? Ñan waanjoñak, rejjab kwal̦ peier* m̦okta jãn aer m̦õñã.”
3 Innem Jesus euwaake er im ba: “Etke kom̦ij kõjekdo̦o̦ne kien ko an Anij kõn wõt m̦anit im imminene kan̦e ami?
4 Ñan waanjoñak, Anij ear ba, ‘Kwõn kautiej jem̦am̦ im jinõm̦.’ Ear bar ba, ‘Jabdewõt eo ej kwal̦o̦k naan ko renana kõn jemãn ak jinen, ren m̦ane ñan mej.’
5 Bõtab kom̦ij ba, ‘Jabdewõt eo ej ba ñan jemãn ak jinen im ba: “Em̦õj aõ kallim̦ur ñan Anij bwe inaaj lel̦o̦k ñane men ko imaroñ kar jipañ eok kaki,”
6 eokwe ejjab menin aikuj bwe armej in en kautiej jemãn.’ Kom̦ij kajejtokjãn naan ko an Anij kõn wõt ami l̦oore m̦anit im imminene ko ami.
7 Kom̦ ri-etao, em̦ool wõt an kar Aiseia kanaan kake kom̦ im ba:
8 ‘Armej rein rej nõbar eõ kõn tieer, bõtab elukkuun ettol̦o̦k bũrueer jãn eõ.
9 Ejjel̦o̦k tokjãn aer kabuñ ñan ña kõnke katak ko aer rej itok jãn kien ko kõm̦m̦anin armej.’”
10 Innem ear kũrtok armej ro bwe ren itok ñan ippãn im ear ba: “Kom̦win roñjake bwe kom̦win mel̦el̦e:
11 Men ko remaroñ kõm̦m̦an bwe juon armej en ettoon ej men ko ej ba, im jab men ko ej kañi.”
12 Im ri-kal̦oor ro rar itok ñan ippãn im ba: “Kwõjel̦ã ke bwe Parisi ran̦ rellu kõn men ko kwaar ba?”
13 Im ear uwaake er im ba: “Jema ilañ enaaj tũm̦wi aolep menin eddek ko ear jab kalibwini.
14 Jab el̦l̦o̦k ñan er. Kumi kan̦ rej ri-tõl ro repilo. Ñe juon eo epilo ej tõl bar juon eo epilo, erro jim̦or naaj wõtlo̦k ilowaan juon ro̦ñ.”
15 Innem Piter eba: “Kwõn kõmel̦el̦eik kõm kõn waanjoñak eo kwaar kwal̦o̦ke.”
16 Im eba: “Ta kom̦ bareinwõt kom̦ij jañin mel̦el̦e ke?
17 Kom̦ij jab jel̦ã ke bwe jabdewõt men ko juon armej ej kañi, rej wanlal̦l̦o̦k ñan lo̦jien im diwõjl̦o̦k jãn ãnbwinnin?
18 Bõtab, men ko juon armej ej ba, rej itok jãn bũruon. Men ko kein remaroñ kõm̦m̦an bwe juon armej en ettoon.
19 Ñan waanjoñak, jãn bũruon juon armej ej itok l̦õmn̦ak ko renana: uror, lejãn,* l̦õñ,* ko̦o̦t, riab n̦ae ro jet, kab kõnono n̦ae.
20 Men ko kein rej kõm̦m̦an bwe juon armej en ettoon. Bõtab ñe juon armej ejjab kwal̦ pein* m̦okta jãn an m̦õñã, men in ejjab kõm̦m̦an bwe en ettoon.”
21 Jãn ijo, Jesus ear etal ñan jikin ko ipel̦aakin Tair im Saidon.
22 Im juon kõrã in Pinisia* ear itok ñan ippãn im ba: “Irooj, Nejin Devid,* kwõn tũriam̦okake eõ. Elukkuun jorrããn ledik en̦ nejũ kõnke em̦õj an juon jetõb ettoon mo̦k* ilo ãnbwinnin.”*
23 Bõtab, ear jab uwaake kõrã eo. Kõn men in, ri-kal̦oor ro an rar itok ñan ippãn im akwel̦ap ñane im ba: “Kwõn ba kõrã en̦ en etal kõnke el̦akkar l̦oore kõj im ellam̦õjm̦õj tok.”
24 Innem eba: “Kar jab jilkintok eõ ñan jabdewõt armej ijello̦kun wõt jiip ko rejebwãbwe an aelõñin Israel.”
25 Bõtab, kõrã eo ear itok ñan ippãn Jesus im kwal̦o̦k kautiej* ñane im ba: “Irooj, jouj im jipañ eõ!”
26 Innem ear uwaake im ba: “Ejjab jim̦we ñan bõk m̦õñã ko kijen ajri ro im lil̦o̦k ñan kidu jiddik ko.”
27 Im kõrã eo eba: “Irooj, kwõj m̦ool, ijo wõt ke kidu jiddik ko rej attũkokoiki bũrar ko rej wõtlo̦k jãn tebõl̦ ko an irooj ro aer.”
28 Innem Jesus ear ba ñane: “Kõrã en̦, kwe juon eo el̦ap an tõmak. Men eo kwaar kajjitõke enaaj tõprak.” Im ilo awa eo wõt, ledik eo nejin kõrã eo ear mour.
29 Jesus ear em̦m̦akũt jãn ijo im ilo̦k ñan turin Lom̦al̦o in Galili. Innem ear wanlõñl̦o̦k ñan juon tol̦ im jijet.
30 Im jarlepju in armej ro rar itok im bõktok ñan ippãn Jesus ro rejaje etetal, ro emej rãjetin peier, ro repilo, ro rejaje kõnnaan, im ri-nañinmej ro jet. Innem ear kõmour er aolep.
31 Ke armej ro rar lo an ro rar jaje kõnnaan kõnono, im ro ear mej rãjetin peier ãjmour, im ro rejaje etetal jino etetal, im ro repilo lol̦o̦kjen̦, rar lukkuun bwilõñ. Kõn men in, rar nõbar Anij in Israel.
32 Jesus ear kũrtok ri-kal̦oor ro an im ba: “Ilukkuun bũrom̦õj kõn armej rein kõnke jilu de raanin aer pãd ijin ippa ak ejjel̦o̦k kijeer m̦õñã. Ijjab kõn̦aan jilkinl̦o̦k er ak rekwõle* kõnke remaroñ l̦otl̦o̦k ilo ial̦ eo aer l̦o̦k.”
33 Bõtab ri-kal̦oor ro rar kajjitõk ippãn im ba: “Jenaaj ebbõk ia pilawã ñan kabwe aolep armej rein ke rellõñ ak ejjel̦o̦k jabdewõt men ijin?”
34 Im Jesus eba ñan er: “Bwe jete n̦e pilawã ippemi?” Im reba: “Jimjuon pilawã im jejjo ek jiddik.”
35 Im ãlikin an kar jiroñ armej ro bwe ren jijet lal̦,
36 ear bõk pilawã ko jimjuon im ek ko. Ke em̦õj an jar im kam̦m̦oolol Anij, ear kõrrãjeti pilawã ko ñan elõñ m̦õttan im lil̦o̦k ñan ri-kal̦oor ro an, innem rar ajeji ñan armej ro.
37 Im aolep rar m̦õñã im mat, im ke rar aini bween pilawã ko, ear obrak jimjuon iep ko rekkillep.
38 Kar 4,000 oran em̦m̦aan ro rar m̦õñã, bõtab kar jab bwine oran kõrã ro im ajri ro.
39 Tokãlik, ear jilkinl̦o̦k armej ro, innem ear uwe ioon wa eo im jerakl̦o̦k ñan jikin eo etan Magedan.
Footnotes
^ Parisi ro im ri-Ju ro jet rekõn kwal̦ peier ekkar ñan wãween m̦anit eo an ri-Ju.
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Naan eo ilo kajin Grik ej por·neiʹa. Lale “L̦õñ” ilo Kõmel̦el̦e Ko.
^ Parisi ro im ri-Ju ro jet rekõn kwal̦ peier ekkar ñan wãween m̦anit eo an ri-Ju.
^ Ak “Kenan.” Armej in Pinisia rar wal̦o̦ktok jãn Kenan.
^ Lale “Nejin Devid” ilo Kõmel̦el̦e Ko.
^ Ak “del̦o̦ñ.”
^ Naan eo ilo kajin Grik ej dai·mo·niʹzo·mai, ej jitõñl̦o̦k ñan eo emo̦k juon enjel̦ enana n̦a ippãn.
^ Ak “buñpedo.”
^ Ak “rej jitlo̦k.”
