Matu 17:1-27
17 Jiljino raan tokãlik, Jesus ear bõk Piter, Jemes, im l̦eo jatin Jemes etan Jon im ãñinl̦o̦k erjel ñan juon tol̦ eutiej. Ereañ wõt rar pãd ijo.
2 Innem rekar lo an oktakl̦o̦k. Turin mejãn ear meram ãinwõt meramin al̦ im nuknuk ko an rar jino ejjatõltõl.
3 Bareinwõt, rar lo an Moses im Ilaija kõnnaan ippãn,
4 innem Piter ear ba ñan Jesus im ba: “Irooj, em̦m̦an ammim pãd ijin. El̦aññe kokõn̦aan, inaaj kajutak jilu im̦õn kõppãd ijin. Juon ñan kwe, juon ñan Moses, im juon ñan Ilaija.”
5 Piter ej kõnnaan wõt ak eitok juon kõdo̦ im kalbubuuk er, im ear wal̦o̦k juon ainikien jãn kõdo̦ eo im ba: “Eñin Nejũ, eo ejitõnbõro ippa, im ebuñbũruõ kake. Kom̦win roñjake e.”
6 Ke ri-kal̦oor ro rar roñ ainikien eo, rar lukkuun mijak im rar buñpedo.
7 Bõtab, Jesus ear kepaakl̦o̦k erjel, im ear lel̦o̦k pein im jibwe er, im ba: “Jutak, kom̦win jab mijak.”
8 Ke rar bõk bõraer im reilo̦k, Jesus wõt rar loe, ejjel̦o̦k bar juon armej ijo.
9 Innem ke rar wanlal̦tak jãn tol̦ eo, Jesus ear jiroñ er im ba: “Jab ba ñan jabdewõt kõn pijen eo kom̦ar loe m̦ae iien Nejin armej* enaaj jerkak jãn mej.”
10 Bõtab, ri-kal̦oor rein rar kajjitõk ippãn im ba: “Ak etke skraib ran̦ rej ba bwe Ilaija enaaj aikuj itok m̦okta?”
11 Im ear uwaake er im ba: “Em̦ool bwe Ilaija enaaj itok, im enaaj kõm̦m̦an bwe men otemjej ren ãinwõt kar m̦okta.
12 Ijoke ij ba ñan kom̦ bwe em̦õj kadede an kar Ilaija itok. Bõtab, rar jab kile im rar kõm̦m̦an ñane ekkar ñan kõn̦aan ko aer. Enaaj bar ãindein aer kaeñtaan Nejin armej.”
13 Kiiõ ri-kal̦oor ro rej kab jel̦ã ke ear kõnnaan kõn Jon ri-Peptaij.
14 Ke rar tõparl̦o̦k armej ro, juon em̦m̦aan ear jãdetok im bukwelõlõ im̦aan Jesus im ba:
15 “Irooj, kwõn tũriam̦okake l̦adik e nejũ kõnke ewõr an nañinmej in dibũbbũb im el̦ap an nañinmej. Ekkã an okjak ilo kijeek im ilo dãn.
16 Iar bõktok ñan ri-kal̦oor ran̦e am̦, ak rar jab maroñ kõmouri.”
17 Im Jesus eba: “Kom̦ij juon epepen enana im ejjel̦o̦k ami tõmak, ewi toon aõ aikuj pãd ippemi? Ewi toon aõ aikuj kijenmej ippemi? Kom̦win bõktok l̦adik n̦e ñan ippa.”
18 Innem Jesus ear kauweik jetõb ettoon* eo im ear diwõjl̦o̦k jãn l̦adik eo, im ear m̦õkaj an l̦adik eo mour.
19 Tokãlik, ke Jesus ear make iaan, ri-kal̦oor ro rar kepaake im ba: “Etke kõmar jab maroñ kadiwõjl̦o̦k jetõb ettoon eo?”
20 Innem eba ñan er: “Kõnke edik ami tõmak. Ij ba ñan kom̦ bwe el̦aññe joñan ami tõmak ej ãinwõt juon ineen mustard,* innem kom̦ maroñ ba ñan tol̦ in im ba, ‘Em̦m̦akũt jãn ijin ñan ijuweo,’ im enaaj em̦m̦akũt. Innem ejjel̦o̦k jabdewõt men en̦ kom̦ naaj bane.”
21 * ——
22 Tokãlik ke Jesus im ri-kal̦oor ro an rar pãd ilo Galili, ear ba ñan er: “Naaj ketake Nejin armej ñan ro rej kõjdate e,
23 im renaaj m̦ane, bõtab ilo raan en̦ kein kajilu enaaj bar mour.” Kõn men in, ri-kal̦oor ro rar lukkuun bũrom̦õj.
24 Ke rar pãd ilo Kaperneum, ri-tõltõl eowõj ro an tampel̦ eo rar kepaake Piter im ba: “Ri-Kaki en̦ am̦ ej ke kõl̦l̦ã eowõj* ñan tampel̦ en̦?”
25 Piter ear uwaak im ba: “Aet.” Bõtab, ke Piter ear del̦o̦ñl̦o̦k ilo m̦weo, Jesus ear kajjitõk ippãn im ba: “Ta am̦ l̦õmn̦ak Saimõn,* wõn ro rej kõl̦l̦ã eowõj ñan kiiñ ro an lal̦? Ro nejier ke, ak armej ro jet?”
26 Ke Piter ear uwaak im ba: “Armej ro jet,” Jesus eba: “Mel̦el̦ein bwe ro nejin kiiñ ro rejjab aikuj in kõl̦l̦ã eowõj.
27 Bõtab, jejjab kõn̦aan kainepataik er. Kõn men in, etal im eojolo̦k, im ek en̦ m̦oktata kwõnaaj ko̦jeke kwõn bõke. Ñe kwõj kõpel̦l̦o̦k lo̦ñiin, kwõnaaj lo juon jããn jelba ie.* Kwõn kab bõke jããn eo im bõkl̦o̦ke ñan er bwe en tarrin ijo kun̦aarro.”
Footnotes
^ Lale “Nejin armej” ilo Kõmel̦el̦e Ko.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Ak “juon ine jidikdik.” Juon ine ilo Israel. Ine in emaroñ eddekl̦o̦k im erom juon wõjke 15 ne aetokan.
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Kajin Grik, “ruo drachma.” On̦ããn juon ri-jerbal ñe ej jerbal ium̦win ruo raan.
^ Ãt eo juon etan Piter.
^ Joñan jããn in ej tarrin emãn drachma. On̦ããn juon ri-jerbal ñe ej jerbal ium̦win emãn raan.
