Matu 18:1-35
18 Ilo tõre eo, ri-kal̦oor ro an Jesus rar itok im kajjitõk ippãn im ba: “Wõn eo eutiejtata ilo Aelõñin lañ?”*
2 Innem ear kũrtok juon ajri im kajutake ibwiljier
3 im ba: “Ij ba ñan kom̦ bwe kom̦ ban del̦o̦ñe Aelõñin lañ m̦ae iien kom̦ij oktak im ãinwõt ajri ro.
4 Kõn men in, jabdewõt eo enaaj kõttãiki e make ãinwõt ajri in, eñin ej armej eo eutiejtata ilo Aelõñin lañ.
5 Jabdewõt eo ej karwaineneik juon eo edik ãinwõt ajri in kõn wõt eta, ej bar karwaineneik ña.
6 Bõtab jabdewõt eo ej kõm̦m̦an bwe en jako an rein reddik tõmak ilo ña, enaaj kar em̦m̦anl̦o̦k ñe rej lukwõje juon dekein irir* ekilep ilo kõnwaan im jol̦o̦ke ilo lo̦meto.
7 “Jerata ñan armej ro ilo lal̦ in im rej kõm̦m̦an an ro jet buñ jãn tõmak! Jejel̦ã bwe men in enaaj baj wal̦o̦k wõt, bõtab ejerata wõt armej eo ej kõm̦m̦an an ro jet buñ jãn tõmak!
8 Innem el̦aññe peim̦ ak neem̦ ej kõm̦m̦an bwe kwõn jerawiwi, kwõn m̦wijiti im jol̦o̦ke. Em̦m̦anl̦o̦k ñe kwõnaaj el̦l̦ã im mour meñe ejako rãjetin peim̦ ak neem̦ jãn ñe ewõr ruo peim̦ ak ruo neem̦ bõtab kwõdel̦o̦ñ ilo kijeek eo ej ñan indeeo.
9 Bareinwõt, ñe mejam̦ ej kõm̦m̦an bwe kwõn jerawiwi, kwõn itũki im jol̦o̦ke. Em̦m̦anl̦o̦k ñe kwõj el̦l̦ã im mour meñe erãjet mejam̦ jãn ñe ewõr ruo mejam̦ ak rejol̦o̦k eok ilo kijeek eo ilo Kena.*
10 Lale bwe en jab nana ami kõm̦m̦an ñan jabdewõt iaan rein reddik kõnke ij ba ñan kom̦ bwe enjel̦ ro ilañ me rej kõjparok rein reddik rej pãd ippãn Jema ilañ aolep iien.
11 *——
12 “Baj l̦õmn̦ak kake men in. Ta eo juon em̦m̦aan enaaj kõm̦m̦ane el̦aññe ewõr 100 nejin jiip im juon iaaer ejebwãbwe? Enaaj likũt jiip ko 99 ilo tol̦ eo bwe en etal im pukote jiip eo ejebwãbwe.
13 Ij ba ñan kom̦ bwe ñe eloe, enaaj l̦apl̦o̦k an m̦õn̦õn̦õ kake jiip in jãn jiip ko 99 me rar jab jebwãbwe.
14 Ãindein ippãn bar Jema,* eo ej pãd ilañ. Ejjab kõn̦aan bwe juon iaan rein reddik ren jako.
15 “El̦aññe juon jeim̦ ak jatũm̦ ej bõd n̦ae eok, kwõn ilo̦k ñan ippãn im kwal̦o̦k ñane bõd eo an,* bõtab en ikõtaamiro wõt. Ñe enaaj roñjake eok, kwaar jipañe bwe en bar kõm̦m̦ane men eo ejim̦we.
16 Bõtab ñe ejjab roñjake eok, kwõn bõk juon ak ruo armej ippam̦ kõnke ennaan jãn ruo ak jilu ri-kam̦ool enaaj kõm̦m̦an bwe en alikkar men otemjej.
17 El̦aññe ejjab roñjake er, kwõn kõnnaanek eklejia.* Ak ñe ejjab roñjake eklejia eo, kwõn watõke bwe ej armej in aelõñ ko jet* ak juon ri-tõltõl eowõj.
18 “Ij ba ñan kom̦ bwe jabdewõt men eo kom̦ij kõmo̦iki ijin ioon lal̦, enaaj m̦õj kadede kõmo̦iki ilañ. Im jabdewõt men eo kom̦ij kamãlimi ijin ioon lal̦, enaaj m̦õj kadede kamãlimi ilañ.
19 Ij bar ba ñan kom̦ bwe ñe ruo iaami ijin ioon lal̦ ej errã ñan jar kõn jabdewõt men eaorõk, innem Jema ilañ enaaj katõprake.
20 Ñe ewõr ruo ak jilu armej rej kweilo̦k ippãn doon ilo eta, inaaj pãd ibwiljier.”
21 Innem Piter ear itok ñan ippãn im ba: “Irooj, jete alen an nãj jeiũ ak jatũ bõd n̦ae eõ im ij aikuj jol̦o̦k an bõd? Jimjuon alen ke?”
22 Jesus euwaake im ba: “Ij ba ñan eok bwe ejjab 7 alen bõtab en 77 alen.*
23 “Aelõñin lañ ej ãinwõt juon kiiñ* me ekõn̦aan bwe ri-karejar* ro an ren kõl̦l̦ãiki m̦uri ko aer ippãn.
24 Ilo iien eo ej jino ebbõk m̦uri jãn ri-karejar ro an, kar bõktok juon em̦m̦aan ñan ippãn me joñan m̦uri eo an ej 10,000 tal̦õn.*
25 Bõtab ear ejjel̦o̦k an ri-karejar eo maroñ ñan kõl̦l̦ãiki m̦uri eo an. Kõn men in, irooj eo ear ba bwe ren wiakake e, lio pãleen, kab ajri ro nejin bwe ren ri-kõm̦akoko, im ren bar wiakake aolep men ko m̦weien. Ilo wãween in enaaj pel̦l̦o̦k m̦uri eo an.
26 Innem ri-karejar* eo ear bukwelõlõ im̦aan irooj eo im kwal̦o̦k kautiej* ñane im ba, ‘Kwõn tũriam̦okake eõ im inaaj karo̦o̦lwaj aolepen m̦uri eo aõ.’
27 Irooj eo ear bũrom̦õj kake ri-karejar eo, kõn men in ear kõtl̦o̦ke im jol̦o̦k aolepen m̦uri eo an.
28 Ke ri-karejar eo ear etal, ear pukote juon iaan ri-karejar ro m̦õttan me ear m̦uri ippãn 100 denarii.* Ke ear loe ear jibwe im kuul bũruon im ba, ‘Kwõn kõl̦l̦ãiktok aolepen m̦uri eo am̦.’
29 Kõn men in, ri-karejar eo m̦õttan ear bukwelõlõ im akwel̦ap ñane im ba, ‘Kwõn tũriam̦okake eõ im inaaj karo̦o̦lwaj aolepen m̦uri eo aõ.’
30 Bõtab ear m̦akoko, im ear ba ren kalbuuji ri-karejar eo m̦õttan m̦ae iien ekõl̦l̦ãiki aolepen m̦uri eo an.
31 Ke ri-karejar ro jet rar lo men in, rar lukkuun bũrom̦õj. Kõn men in, rar etal im kõnnaanek irooj eo aer kõn aolep men ko rar wal̦o̦k.
32 Innem irooj eo ear kũrtok ri-karejar eo im ear ba ñane: ‘Kwe ri-karejar nana, iar jol̦o̦k aolepen m̦uri eo am̦ kõnke kwaar akwel̦ap ñan ña.
33 Etke kwaar jab tũriam̦okake ri-karejar eo m̦õttam̦ ãinwõt aõ kar tũriam̦o kõn kwe?’
34 Joñan an irooj eo illu, ear lel̦o̦ke ri-karejar in ñan ri-waj ro bwe ren kalbuuji m̦ae iien ekõl̦l̦ãiki aolepen m̦uri eo an.
35 Enaaj ãindein an Jema ilañ kõm̦m̦an ñan kom̦ el̦aññe kajjojo iaami ejjab jol̦o̦k bõd ko an eo jeimi ak jatimi jãn bũruomi.”
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Lale “Dekein irir” ilo Kõmel̦el̦e Ko.
^ Lale “Kena” ilo Kõmel̦el̦e Ko.
^ Meñe ewal̦o̦k eoon in ilo ukok in Baibõl̦ ko jet, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Ak emaroñ, “Jememiwõj.”
^ Kajin Grik, “kajim̦weiki.”
^ Ej jitõñl̦o̦k ñan ro rej lale eklejia eo. Lale Duteronomi 19:16, 17.
^ Ej jitõñl̦o̦k ñan armej ro rejjab ri-Ju im rejjab tõmak ilo Anij.
^ Kajin Grik, “70 alen 7.”
^ Ak “irooj.”
^ Ak “ri-kõm̦akoko.”
^ Ak “ri-kõm̦akoko.”
^ Ak “buñpedo.”
^ On̦ããn juon ri-jerbal ilo juon raan ej juon denariõs. M̦uri in juon me edikl̦o̦k, 100 denarii, ej on̦ããn juon ri-jerbal ñe ej jerbal ium̦win 4 allõñ.
