Matu 19:1-30
19 Ke ear m̦õj an Jesus kõnnaan kõn men kein, ear em̦m̦akũt jãn Galili im kijoone Reba Jordan im etal ñan jikin ko itõrerein Judia.
2 Elukkuun lõñ armej rar l̦oorel̦o̦k, im ilo ijin ear kõmour ro rar nañinmej.
3 Innem Parisi ro rar itok ñan ippãn bwe ren mãlejjoñe. Rar kajjitõk im ba: “Emãlim ke an juon em̦m̦aan jepel jãn lio pãleen kõn jabdewõt un?”
4 Im ear uwaak im ba: “Kom̦ar jab riit ke bwe jãn kar jinoin, ear kõm̦m̦an bwe en wõr em̦m̦aan im kõrã?
5 Kom̦ar jab bar riiti ke bwe ear ba, ‘Kõn men in, l̦eo enaaj em̦m̦akũt jãn jinen im jemãn im pãdwõt ippãn lio pãleen, im erro naaj juon wõt kanniõk’?
6 Ejako an ruo armej kõnke erro ej kiiõ juon wõt kanniõk. Kõn men in, ejjel̦o̦k juon en kõjepele ro em̦õj an Anij kobaik er.”
7 Im reba: “Ak etke Moses ear kõtl̦o̦k an em̦m̦aan ro jepel jãn lim̦aro pãleer ñe rej kõm̦m̦an aer peba in jepel?”
8 Innem ear ba ñan er: “Moses ear kõtl̦o̦k ami jepel jãn lim̦aro pãleemi kõn ami penawiia, bõtab ekar jab ãindein jãn kar jinoin.
9 Ij ba ñan kom̦ bwe ñe juon em̦m̦aan ej jepel jãn lio pãleen meñe lio ear jab l̦õñ* im ej m̦areik bar juon, eokwe em̦m̦aan in ej lejãn.”*
10 Ri-kal̦oor ro rar ba ñane: “El̦aññe ej aikuj ãindein ikõtaan juon em̦m̦aan im lio pãleen, eokwe em̦m̦anl̦o̦k ñan jab pãlele.”
11 Im ear ba: “Ejjab aolep rej l̦oore mel̦el̦e kein, ak ro wõt epãd menin lel̦o̦k in ippãer.*
12 Bwe ewõr em̦m̦aan rejjab maroñ pãlele* kõnke ewõr aer nañinmej jãn ke rar l̦otak. Bar jet em̦m̦aan rejjab maroñ pãlele* kõnke armej ro jet rar kõm̦m̦an bwe ren ãindein.* Ak jet em̦m̦aan rar make kããlõt ñan jab pãlele* kõn wõt Aelõñin lañ.* Ñe ewõr an juon maroñ ñan jab pãlele, innem en jab pãlele.”
13 Innem armej ro rar bõktok ajri ro nejier ñan ippãn bwe en likũt pein ioer im jar kõn er, ak ri-kal̦oor ro rar luuki armej ro.
14 Bõtab Jesus eba: “Kom̦win kõtl̦o̦k an ajri ran̦e itok ñan ippa im jab kabõjrak er. Ro rej ãinwõt ajri rein renaaj jolõt Aelõñin lañ.”
15 Innem ãlikin an likũt pein ioer, ear ilo̦k jãn ijo.
16 Tokãlik juon likao ear itok ñan ippãn im ba: “Ri-Kaki, ta eo em̦m̦an ij aikuj kõm̦m̦ane bwe in maroñ bõk mour indeeo?”
17 Im ear ba ñane: “Etke kwõj kajjitõk ippa kõn ta eo em̦m̦an? Anij wõt em̦m̦an. El̦aññe kokõn̦aan bõk mour indeeo, kwõn jab bõjrak jãn am̦ pokake kien ko an Anij.”
18 Im likao eo eba: “Kien ta iaaer?” Im Jesus euwaak im ba: “Kwõn jab uror, kwõn jab lejãn, kwõn jab ko̦o̦t, kwõn jab riab n̦ae bar juon,
19 kwõn kautiej jem̦am̦ im jinõm̦, im kwõn yokwe ri-turum̦* ãinwõt am̦ yokwe eok make.”
20 Likao eo ear ba: “Iar pokake aolep kien kan̦e, bar ta eo ij aikuj in kõm̦m̦ane?”
21 Jesus ear ba ñane: “Ñe kokõn̦aan bwe kwõn weeppãn,* kwõn ilo̦k im wiakake aolepen men kan̦ m̦weiõm̦, im lil̦o̦k jããn kan̦ ñan ro rejeram̦õl im kwõnaaj m̦weiie ilañ. Innem kwõn itok im l̦oor eõ.”*
22 Ke likao eo ear roñ men in, ear ilo̦k ilo an bũrom̦õj kõnke ear kanooj in m̦weiie.
23 Innem Jesus ear ba ñan ri-kal̦oor ro an im ba: “Ij ba ñan kom̦ bwe enaaj pen an juon ri-m̦weiie del̦o̦ñ ilo Aelõñin lañ.
24 Ij bar jiroñ kom̦ bwe epidodol̦o̦k an juon kamel̦ del̦o̦ñ ilo ro̦ñin juon nitõl̦ jãn an juon ri-m̦weiie del̦o̦ñ ilo Aelõñ eo an Anij.”*
25 Ke ri-kal̦oor ro rar roñ men in, joñan aer bwilõñ rar ba: “Ñe ãindein, wõn emaroñ mour?”
26 Jesus ear reilo̦k ñan er im ba: “Armej rebane men in, bõtab Anij emaroñe men otemjej.”
27 Innem Piter eba: “Kõmar ilo̦k jãn men otemjej im l̦oor eok.* Kõn men in, ta eo kõm naaj bõke?”
28 Im Jesus euwaak im ba: “Ij ba ñan kom̦ bwe Anij enaaj kõkããl men otemjej ñe Nejin armej enaaj jijet ilo tũroon eo an eaiboojoj. Innem ilo iien en̦, kom̦ ro me kom̦ij l̦oor eõ, kom̦ naaj jijet ilo tũroon ko 12 im ekajete bwij ko 12 bwijjin Israel.
29 Jabdewõt eo ear ilo̦k jãn m̦weo im̦õn, ak ro jein ak ro jatin, jinen ak jemãn, ak ro nejin, ak wãto eo an kõn wõt eta, 100 alen an naaj l̦apl̦o̦k jeraam̦m̦an ko armej in enaaj bũki im enaaj jolõt mour indeeo.
30 “Elõñ ro rej pãd m̦oktata, renaaj oktak im pãd ãliktata. Im elõñ ro rej pãd ãliktata, renaaj oktak im pãd m̦oktata.
Footnotes
^ Naan eo ilo kajin Grik ej por·neiʹa. Lale “L̦õñ” ilo Kõmel̦el̦e Ko.
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Ak “ro wõt ewõr maroñ in ippãer.”
^ Kajin Grik, “ewõr rej eunõk.”
^ Kajin Grik, “rej eunõk.”
^ Armej ro jet rar m̦wijiti er bwe en jab maroñ wõr nejier ajri.
^ Kajin Grik, “kããlõt bwe ren eunõk.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ilo kajin Grik, naan eo “ri-turum̦” emaroñ jitõñl̦o̦k ñan jabdewõt armej.
^ Mel̦el̦ein, en ejjel̦o̦k likjab ilo am̦ jerbal ñan Anij.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
