Matu 21:1-46
-
Del̦o̦ñl̦o̦k eo an Jesus ilo Jerusalem (1-11)
-
Jesus ej karreoik tampel̦ eo (12-17)
-
Ej kaliaik wõjke fig eo (18-22)
-
Rej kajitũkin Jesus kõn maroñ eo an (23-27)
-
Waanjoñak eo kõn likao ro ruo nejin juon em̦m̦aan (28-32)
-
Waanjoñak eo kõn ri-kallib ro reuror (33-46)
-
Rar kõjekdo̦o̦ne dekã eo eaorõktata (42)
-
21 Ke rar epaakel̦o̦k Jerusalem, rar bõjrakl̦o̦k iturin bukwõn eo etan Betpeje ilo Tol̦ Olive. Innem Jesus ear jilkinl̦o̦k ruo iaan ri-kal̦oor ro,
2 im ear ba: “Komiro iwõj ñan bukwõn n̦e im̦aan im ñe komiro tõparl̦o̦k, komiro naaj lo juon donkey em̦õj lukwõje im lukwõj koon eo nejin n̦a ippãn. Komiro en jel̦ati im bũkitok ñan ippa.
3 Ñe juon enaaj kabõjrak kom̦, kom̦win ba, ‘Irooj ej aikuji.’ Innem enaaj m̦õkaj im kõtl̦o̦k bwe kom̦win bũki.”
4 Men in ear wal̦o̦k bwe en jejjet kũtien naan ko ri-kanaan Jeremaia ear kwal̦o̦ki, ke ear ba:
5 “Kom̦win jiroñ armej ro ilo Zaion* im ba: ‘Kiiñ eo ami ej itok, eineem̦m̦an im ej jijet ioon juon koon in donkey, juon donkey em̦m̦an dettan.’”
6 Im ri-kal̦oor ro ruo rar ilo̦k im kõm̦m̦ane men ko Jesus ear ba bwe ren kõm̦m̦ani.
7 Rar bõktok donkey eo kab koon eo nejin ippãntok. Im rar ere ioer kõn kopã ko aer, im Jesus ear uwe ioon koon eo.
8 Enañin aolep armej rar erl̦o̦ki kopã ko aer ioon ial̦ eo, im ro jet rar jekjek kimej in ni palm im ere ial̦ eo kaki.
9 Bareinwõt, ro rar etal im̦aaninl̦o̦k im ro rar etal ilikinl̦o̦k rar jab bõjrak jãn aer kõl̦l̦aaj ainikieer im ba: “O Anij, kwõn kõjparoke l̦ein Nejin Devid!* Ejeraam̦m̦an wõt eo ej itok ilo etan Jeova!* Kwe eo kwõj pãd ijo eutiejtata ilañ, kwõn kõjparoke!”
10 Im ke ear del̦o̦ñl̦o̦k ilo Jerusalem, ear iruj aolep armej ro im rar ba: “Wõn armej in?”
11 Im armej ro wõj ippãn rar ãliji naan kein: “Eñin ej Jesus, jãn Nazeret ilo Galili, im e ri-kanaan eo kar kallim̦ur kake!”
12 Jesus ear del̦o̦ñl̦o̦k ilo tampel̦ eo im kadiwõjl̦o̦k aolep ri-wiakake ro im armej ro rej wia ilo tampel̦ eo. Ear ukõji tebõl̦ ko an ro rej jãnij jããn im jea ko an ro rej wiakake m̦ul̦e.
13 Im ear ba ñan er: “Jeje ko rej ba, ‘Naaj likũt m̦weo im̦õ bwe en jikin an armej jar,’ bõtab em̦õj ami ukote bwe en im̦õn ri-ko̦o̦t.”
14 Tokãlik, ro repilo im ro raajukuk rar itok ñan ippãn ilo tampel̦ eo im ear kõmour er.
15 Bũrij ro reutiej im skraib ro rar kanooj illu ke rar lo menin kabwilõñlõñ ko Jesus ear kõm̦m̦ani. Rar bar illu ke rar roñ an l̦adik ro lam̦õj ilo tampel̦ eo im ba, “O Anij, kwõn kõjparoke l̦ein Nejin Devid!”
16 Innem rar ba: “Kwõj ke roñ ta kan̦ rej ba?” Im Jesus euwaak im ba: “Aet, ij roñ. Jeje ko rej ba, ‘Kwõj kõm̦m̦an bwe ajri ro im niñniñ ko ren nõbar eok.’ Ta kom̦ar jab riiti men in ke?”
17 Innem ear ilo̦k jãn Jerusalem ñan Betani, im ear kiki ie ilo boñõn eo.
18 Ke ear jepl̦aak ñan Jerusalem jibboñõnin raan eo juon, ear jino kwõle.
19 Innem ear lo juon wõjke fig iturin ial̦ eo im ear jibadekl̦o̦ke. Im ke ear tõpare, ear lo bwe ejjel̦o̦k leen ak bõlõk wõt. Kõn men in, ear ba ñan wõjke eo: “Jãn kiiõ im etal kwoban bar kalle.” Im ilo iien eo wõt, wõjke eo ear kajju mej.
20 Ke ri-kal̦oor ro rar lo men in, rar bwilõñ im ba: “Enañin baj m̦õkaj an wõjke in mej?”
21 Im Jesus euwaak er im ba: “Ij ba ñan kom̦ bwe el̦aññe kom̦ij tõmak im jab pere, kom̦ maroñ kõm̦m̦ane ejja men in wõt iar kõm̦m̦ane ñan wõjke fig in. Ejjab men in wõt ak ñe kom̦ ba ñan tol̦ in im ba, ‘Kwõn em̦m̦akũt jãn ijin im jok ilo̦jet,’ innem enaaj em̦m̦akũt.
22 El̦aññe ewõr ami tõmak, enaaj tõprak aolep men ko kom̦ij jar im kajjitõk kaki.”
23 Innem ear ilo̦k ñan tampel̦ eo, im ke ear katakin armej ro, bũrij ro reutiej im ri-tõl ro an ri-Ju ro rar itok ñan ippãn im ba: “Wõn n̦e ear kõmaroñ eok bwe kwõn kõm̦m̦ani men kein? Kwaar bõk jãn ia am̦ mãlim?”
24 Jesus ear uwaak im ba: “In kajjitõk juon kajjitõk ippemi m̦okta, im ñe kom̦ naaj uwaak eõ, inaaj kwal̦o̦k ñan kom̦ wõn eo ear kõmaroñ eõ bwe in kõm̦m̦ani men kein.
25 Wõn eo ear kõmaroñ Jon bwe en peptaiji armej ro? Anij* ke ak armej?” Innem rar jino kõnnaan ñan doon im ba: “Ñe jeba, ‘Anij,’ enaaj ba, ‘Innem etke kom̦ar jab tõmake?’
26 Bõtab ñe jeba, ‘Armej,’ eokwe jemijak armej rein kõnke rej watõk Jon bwe ej juon ri-kanaan.”
27 Kõn men in, rar uwaake Jesus im ba: “Kõm jaje.” Innem eba: “Ñe ãindein, iban kwal̦o̦k ñan kom̦ wõn eo ear kõmaroñ eõ ñan kõm̦m̦ani men kein.
28 “Ta ami l̦õmn̦ak? Ewõr juon em̦m̦aan im ruo nejin likao. Em̦m̦aan eo ear kepaake l̦eo nejin erũtto im ba, ‘Nejũ, kwõn etal im jerbal ilo jikin kallib kũreep en̦ rainin.’
29 Im ear uwaake jemãn im ba, ‘Iban,’ bõtab tokãlik ear nana an mour im ear ilo̦k im jerbal.
30 Innem em̦m̦aan eo ear kepaake l̦eo nejin edik im ba ejja men eo wõt ear ba ñan l̦eo nejin erũtto. Im ear uwaake jemãn im ba, ‘Em̦m̦an, inãj etal,’ bõtab ear jab etal im jerbal.
31 Wõn iaan likao rein ear pokake jemãer?” Im rar ba: “Eo erũtto.” Innem Jesus eba: “Ij ba ñan kom̦ bwe ri-tõltõl eowõj ro im kõrã ro rekijoñ renaaj del̦o̦ñ ilo Aelõñ eo an Anij* m̦okta jãn kom̦.
32 Unin ej kõnke Jon ear kwal̦o̦k ñan kom̦ ial̦ eo ejim̦we* ak kom̦ar jab tõmake. Bõtab ri-tõltõl eowõj ro im kõrã ro rekijoñ rar tõmake, im meñe kom̦ar lo men in ak kom̦ar jab ajl̦o̦k im tõmake.
33 “L̦õmn̦ak kõn bar waanjoñak in: Ewõr juon em̦m̦aan me ewõr an bwidej im ear kõm̦m̦ane juon an jikin kallib kũreep. Em̦m̦aan in ear wõrwõre jikin kallib in an im kõm̦m̦ane juon jikin kõm̦m̦an wain.* Bareinwõt, ear kalõk juon im̦õn waj eutiej. Innem ear lel̦o̦k bwe jet ri-kallib ren kõjerbale* im ear etal ñan bar juon aelõñ.
34 Ke ear jejjet iien m̦adm̦õd, em̦m̦aan eo ear jilkinl̦o̦k ri-karejar* ro an ñan ippãn ri-kallib ro bwe ren bõktok kõj eo an.
35 Bõtab, ri-kallib ro rar jibwe ri-karejar ro an im m̦ane juon iaaer, eo juon rar m̦ane ñan mej, im eo juon rar kade ñan mej.
36 Innem em̦m̦aan eo ear bar jilkinl̦o̦k jet an ri-karejar ak rellõñl̦o̦k jãn ro m̦okta. Bõtab, ri-kallib ro rar kõm̦m̦an ñan er ãinwõt aer kar kõm̦m̦an ñan ro m̦okta.
37 Ãliktata, ear jilkinl̦o̦ke l̦eo nejin ak ej ba, ‘Renaaj kautieje l̦e nejũ.’
38 Ke ri-kallib ro rej lo an l̦eo nejin em̦m̦aan eo itok, rar ba ñan doon im ba, ‘Eñin armej eo enaaj jolõte jikin kallib in. Jen m̦ane bwe en ad jikin kallib in!’
39 Innem rar jibwe im iperl̦o̦k jãn jikin kallib kũreep eo im m̦ane ñan mej.
40 Kiiõ ñe em̦m̦aan eo an jikin kallib kũreep eo enaaj itok, ta eo enaaj kõm̦m̦ane ñan ri-kallib ro?”
41 Innem rar uwaake im ba: “Enaaj ko̦kkure er im renaaj mej kõn aer nana. Innem enaaj lel̦o̦k jikin kallib kũreep eo ñan bar jet ri-kallib bwe ren kõjerbale, im rein renaaj lel̦o̦k kõj eo an ilo iien m̦adm̦õd.”
42 Innem Jesus eba, “Ta kom̦ar jab riiti eoon in ilo Jeje ko ke? Ej ba: ‘Dekã eo rũkkal ro rar kõjekdo̦o̦ne em̦õj an oktak im erom dekã eo eaorõktata. Dekã in ear itok jãn Jeova* im ekanooj aiboojoj ippãd.’
43 Eñin unin ij jiroñ kom̦ bwe naaj bõk Aelõñ eo an Anij jãn kom̦ im lel̦o̦k ñan juon aelõñ eo ej jebar le ko leen.
44 Bareinwõt, jabdewõt eo enaaj wõtlo̦k ñan ioon dekã in, enaaj tipdikdik. Im jabdewõt eo dekã in ej ure, enaaj pedakilkil.”
45 Ke bũrij ro reutiej im Parisi ro rar roñjake waanjoñak kein, rar jel̦ã bwe ear kõnnaan kõn er.
46 Kõn men in, rar pukot kilen aer jibwe,* ijoke rar mijak armej ro kõnke rej watõke Jesus bwe ej juon ri-kanaan.
Footnotes
^ Emaroñ jitõñl̦o̦k ñan Jerusalem, eo ear pãd ilo Tol̦ Zaion.
^ Lale “Nejin Devid” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “Lañ.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Kajin Grik, “ewãnõk.”
^ Ak “jouneak wain.” Lale “Jikin kõm̦m̦an wain” ilo Kõmel̦el̦e Ko.
^ Bõlen em̦m̦aan in ear kõm̦m̦an kon̦ ippãn ri-kallib rein bwe ren kab lel̦o̦k jet iaan leen jikin kallib kũreep eo ñane bwe en tarrin on̦ããn aer kõjerbal jikin kallib eo an.
^ Ak “ri-kõm̦akoko.”
^ Lale “Jeova” ilo Kõmel̦el̦e Ko.
^ Ak “kalbuuji.”
