Matu 23:1-39
23 Innem Jesus ear kõnnaan ñan jarlepju eo im ri-kal̦oor ro an im ba:
2 “Parisi ro im skraib ro rar jitõñ er make bwe ren bõk jikin Moses.
3 Kõn men in, kom̦win kõm̦m̦ane im pokake aolep men ko rej ba ñan kom̦. Bõtab, kom̦win jab l̦oore kõm̦m̦an ko aer kõnke rejjab l̦oori men ko rej katakin armej ro bwe ren kõm̦m̦ani.
4 Kien ko rej lil̦o̦k ñan armej rej ãinwõt men ko reddo juon armej ej ineeki iaeran. Bõtab er make rejjab kõn̦aan kõm̦akũt addiin peier ñan kotaki men kein.*
5 Rekõn̦aan bwe armej ren lo aolep jerbal ko rej kõm̦m̦ani. Ñan waanjoñak, rej kakilepl̦o̦k nien eoon ko* rej lukwõji ilo dem̦aer im peier bwe en kein kõjparok er. Bareinwõt rej kaetokl̦o̦k m̦õttan ko rej ettoto itulal̦in tõrerein nuknuk ko aer.
6 Rekõn̦aan bwe ren jijet ilo jikin ko rem̦m̦antata ilo iien kõjota ko, im jea ko im̦aantata* ilo im̦õn kabuñ ko.
7 Im rekõn̦aan bwe armej ren yokyokwe er ilo jikin wia ko, im bwe armej ren ãñinñin er im ba Rabbai.*
8 Ak ij ba ñan kom̦ bwe kom̦win jab n̦aetami Rabbai* kõnke juon wõt ami ri-Kaki, im kom̦ aolep kom̦ij jemjein jemjati.
9 Bareinwõt, kom̦win jab añinñin jabdewõt ilo lal̦ in im ba jema, bwe juon wõt Jememi, Eo ej pãd ilañ.
10 Im kom̦win jab n̦aetami ri-tõl bwe Christ wõt ej ami ri-Tõl.
11 Eo eutiejtata iaami ej aikuj ri-jerbal ñan kom̦.
12 Jabdewõt eo ej kautiej e make naaj kõttãiki, bõtab jabdewõt eo ej kõttãik e make naaj kautieje.
13 “Kom̦ skraib ro im Parisi ro, el̦ap ami etao! Jerata ñan kom̦ kõnke kom̦ij kiil Aelõñin lañ* jãn armej. Kom̦ij jab del̦o̦ñ ie im kom̦ij bõbraik jabdewõt eo ej itõn del̦o̦ñ.
14 * ——
15 “Kom̦ skraib ro im Parisi ro, el̦ap ami etao! Jerata ñan kom̦ kõnke kom̦ij tar meto im ilo̦k ioon ãnel̦o̦k bwe kom̦win kappukot juon armej bwe en kobawaj ilo tõmak n̦e ami, innem ñe etõprak, kom̦ij kõm̦m̦an bwe en tõllo̦kũn an ilo̦k ñan Kena* el̦apl̦o̦k jãn kom̦.
16 “Kom̦ ri-tõlpilo, jerata ñan kom̦ kõn ami ba, ‘Jabdewõt eo ej kajje ilo etan tampel̦ eo, ejjab menin aikuj bwe en kajejjet men eo ear ba. Bõtab, jabdewõt eo ej kajje ilo etan gold ko ilo tampel̦ eo, ej aikuj kajejjet men eo ear ba.’
17 Kom̦ bwebwe im pilo! Ewi wõt men eo eaorõkl̦o̦k, gold eo ke ak tampel̦ eo me ej kõm̦m̦an bwe en eokkwõjarjar gold eo?
18 Kom̦ij bar ba, ‘El̦aññe jabdewõt ej kajje ilo etan lokatok eo, innem ejjel̦o̦k jorrããn ñe ejjab kajejjet men eo ear kajje kake. Bõtab, jabdewõt eo ej kajje ilo etan menin lel̦o̦k eo ioon lokatok eo, ej aikuj kajejjet men eo ear ba.’
19 El̦ap wõt ami pilo! Ewi wõt men eo eaorõkl̦o̦k, menin lel̦o̦k eo ke ak lokatok eo me ej kõm̦m̦an bwe en eokkwõjarjar menin lel̦o̦k eo?
20 Jabdewõt eo ej kajje ilo etan lokatok eo, ej kajje kõn lokatok eo im aolep men ko ioon.
21 Im jabdewõt eo ej kajje ilo etan tampel̦ eo, ej kajje kõn tampel̦ eo im kõn Eo ej jokwe ie.
22 Bareinwõt, jabdewõt eo ej kajje kõn lañ, ej bar kajje kõn tũroon eo an Anij, im Eo ej jijet ioon tũroon eo.
23 “Kom̦ skraib ran̦ im Parisi ran̦, el̦ap ami etao! Jerata ñan kom̦ kõnke kom̦ij lel̦o̦k juon m̦õttan joñoul in mint, dill, im cumin,* bõtab kom̦ij kõjekdo̦o̦n men ko raorõkl̦o̦k ilo Kien eo ãinwõt ekajet jim̦we, tũriam̦o, im tiljek. Emenin aikuj bwe kom̦win lel̦o̦k juon m̦õttan joñoul ko ami, bõtab kom̦win jab kõjekdo̦o̦n men ko jet.
24 Kom̦ ri-tõlpilo, ñe ewõr juon n̦am̦ ilo men ko limõmi, kom̦ij jol̦o̦ke, ak ñe kamel̦, kom̦ij orañl̦o̦ke!
25 “Kom̦ skraib ro im Parisi ro, el̦ap ami etao! Jerata ñan kom̦ kõnke kom̦ij ãinwõt kõnno̦ ko erreo itulikier bõtab ettoon ilowaaer. Kom̦ obrak kõn arõk* im kõn̦aan ko kom̦ij jab maroñ dãpiji.
26 Kom̦ Parisi ran̦ el̦ap wõt ami pilo, kom̦win karreoik m̦okta ilowaan kõnno̦ ko innem enaaj bar erreo itulikier.
27 “Kom̦ skraib ro im Parisi ro, el̦ap ami etao! Jerata ñan kom̦ bwe kom̦ij ãinwõt lõb ko em̦õj unoik kilier, eaiboojoj itulikier ak ilowaaer eobrak kõn diin ri-mej im men ko rettoon.
28 Ãindein kom̦, kom̦ij kõm̦m̦an an armej l̦õmn̦ak bwe kom̦ armej wãnõk, ak bũruomi eobrak kõn etao im men ko renana.
29 “Kom̦ skraib ro im Parisi ro, el̦ap ami etao! Jerata ñan kom̦ bwe kom̦ij kakõm̦anm̦anl̦o̦k lõb ko libõn ri-kanaan ro im kainõknõki lõb* ko libõn ro rewãnõk,
30 im kom̦ij ba, ‘Ñe kõmin kar mour ilo iien ko an ro jim̦m̦aam, kõm ban kar rejetak er ke rar m̦an ri-kanaan ro.’
31 Kõn ami ba men in, kom̦ij make kaalikkar bwe kom̦ nejin ro rar m̦an ri-kanaan ro.
32 Kõn men in, kom̦win kadedel̦o̦k jerbal ko ro jim̦m̦ami rar kõm̦m̦ani.
33 “Kom̦ jedpãnit, nejin jineik vaiper ko, ekõjkan ami naaj maroñ el̦l̦ã im jab jako ilo Kena?*
34 Kõn ami kar kõm̦m̦ani aolep men kein renana, inaaj jilkinwaj ri-kanaan ro im em̦m̦aan ro rekapeel im ro rej katakin ro jet. Kom̦ naaj m̦an jet iaaer im totoik er ilo jurõn al̦al̦. Ro jet kom̦ naaj deñl̦o̦k er ilo im̦õn kabuñ ko ami, im ro jet kom̦ naaj lukwarkwar er jãn jikin ñan jikin bwe kom̦win kaeñtaan er.
35 Men in enaaj kaalikkar bwe ewõr ruomi ke kar kato̦o̦rl̦o̦k bõtõktõkin* aolep armej ro rewãnõk, jino jãn kar Ebel, eo ewãnõk, l̦o̦k ñan Zekaraia, l̦eo nejin Barekaia me kom̦ar m̦ane ikõtaan tampel̦ eo im lokatok eo.
36 Kõn men in, ij ba ñan kom̦ bwe naaj kaje armej in epepen in kõn wõt aolep men kein rar wal̦o̦k.
37 “Jerusalem, Jerusalem, kwaar m̦an ri-kanaan ro im kad ñan mej armej ro kar jilkinwaj er! Elõñ alen aõ kõn̦aan aintok ajri ro nejũm̦ ãinwõt an juon lo̦lo̦ aini tokkwi ko nejin n̦a ium̦win pein! Bõtab, kwaar jab kõn̦aan.
38 Anij enaaj ilo̦k jãn tampel̦ eo ami.*
39 Ij ba ñan kom̦ bwe jãn kiiõ im ilo̦k, kom̦ ban bar lo eõ m̦ae iien kom̦ naaj ba, ‘Ejeraam̦m̦an wõt eo ej itok ilo etan Jeova!’”*
Footnotes
^ Emaroñ kõnono kõn aer m̦akoko in kõmeraikl̦o̦k eddo ko armej rej ineeki.
^ Juon bo̦o̦k jidikdik me em̦õj illik eoon ilowaan. Em̦m̦aan ro me rej ri-Ju rekõn kõn̦aki bwe en kein aer karwaan.
^ Ak “rem̦m̦antata.”
^ Ak “ri-Kaki.”
^ Ak “ri-Kaki.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Lale “Kena” ilo Kõmel̦el̦e Ko.
^ Mint, dill, im cumin rej kein kãre m̦õñã.
^ Ak “kowadoñ.”
^ Kajin Grik, “libõn keememej.”
^ Lale “Kena” ilo Kõmel̦el̦e Ko.
^ Mel̦el̦ein, “ewõr ruomi ke kar m̦an.”
^ Kajin Grik, “m̦weo im̦õmi.”
^ Lale “Jeova” ilo Kõmel̦el̦e Ko.
