Matu 24:1-51
24 Ke Jesus ear jino etal jãn tampel̦ eo, ri-kal̦oor ro an rar itok ñan ippãn bwe ren kaalooje m̦õko ilo tampel̦ eo.
2 Im ear ba: “Kom̦ij ke lo aolepen men kein? Ij ba ñan kom̦ bwe naaj rupi aolep dekã kein ie im ejjel̦o̦k juon iaaer enaaj pãd ioon bar juon.”
3 Tokãlik ke ear jijet ilo Tol̦ Olive, ri-kal̦oor ro an rar itok ñan ippãn ke ear make iaan im ba: “Kwõn kwal̦o̦k ñan kõm ñããt eo men kein renaaj wal̦o̦k. Ta kõkal̦l̦e eo enaaj kaalikkar bwe kwõj pãd* im bwe epaak jem̦l̦o̦kin jukjukun pãd* in?”
4 Im Jesus euwaak er im ba: “Kom̦win lale bwe ejjel̦o̦k en̦ en m̦on̦e kom̦.
5 Elõñ renaaj itok ilo eta im ba, ‘Ña Christ,’ im renaaj m̦on̦e elõñ armej.
6 Kom̦ naaj roñ ainikien tarin̦ae im ennaan in tarin̦ae ko. Lale bwe kom̦win jab wiwijet kõnke men kein rej aikuj in wal̦o̦k, bõtab ejjab mel̦el̦ein bwe eñin ej jem̦l̦o̦kin.
7 “Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon. Bareinwõt, enaaj wõr ñũta im m̦akũtkũt lal̦ ilo elõñ jikin ko.
8 Men kein aolep rej jinoin eñtaan ko rej wal̦o̦k, ãinwõt an juon kõrã metak m̦okta jãn an kõl̦l̦otak.
9 “Ilo iien en̦, armej renaaj liaakel̦o̦k kom̦ ñan eñtaan im renaaj m̦an kom̦, im armej otemjej renaaj dike kom̦ kõn wõt eta.
10 Bareinwõt, elõñ renaaj buñ jãn tõmak, ro jet renaaj ketake doon im dike doon.
11 Enaaj lõñ ri-kanaan ro reriab im renaaj m̦on̦e elõñ armej.
12 Im kõn an l̦apl̦o̦k nana, yokwe eo an enañin aolep armej enaaj m̦õl̦ol̦o̦k.
13 Bõtab eo ej kijenmej ñan jem̦l̦o̦kin enaaj bõk lo̦mo̦o̦r.
14 Im naaj kwal̦o̦k ennaan eo em̦m̦an kõn Aelõñ eo* ipel̦aakin lal̦ in bwe aolep armej ren roñ, innem ej kab naaj itok jem̦l̦o̦kin.
15 “Ñe kom̦ naaj lo an men eo ekajjõjõ me ej bõktok jorrããn pãd ilo jikin eo eokkwõjarjar ãinwõt an kar ri-kanaan Daniel kwal̦o̦k kake (eo ej riiti men in en kõjerbal lol̦o̦kjen̦),
16 innem ro ilo Judia ren jino ko ñan tol̦ ko.
17 Jabdewõt eo ej pãd iraan m̦weo im̦õn, en jab del̦o̦ñ ilowaan m̦weo im ebbõk m̦weiuk ie.
18 Im jabdewõt eo ej pãd ilo jikin kallib, en jab ro̦o̦l im bõk kopã eo an.
19 Ejerata wõt kõrã ro rebõro̦ro im kõrã ro rej kanninnin ilo tõre en̦!
20 Kom̦win jar bwe iien eo kom̦ naaj ko, en jab ilo iien m̦õl̦o,* bareinwõt en jab ilo raanin Jabõt.*
21 Ilo iien en̦, enaaj juon iien eñtaan el̦ap. Joñan an l̦ap, ejjañin kar wal̦o̦k jãn jinoin kõm̦anm̦an lal̦ tok ñan kiiõ, im eban bar wal̦o̦k tokãlik.
22 Ilo m̦ool, el̦aññe Anij ejjab kakadul̦o̦k iien eñtaan en̦, innem ejjel̦o̦k armej enaaj el̦l̦ã im mour. Bõtab, enaaj kakadul̦o̦k iien en̦ kõn wõt ro ear kããlõt er.
23 “El̦aññe jabdewõt ej jiroñwaj kom̦ im ba, ‘Armej in ej Christ,’ ak ‘Armej iien̦ ej Christ!’ kom̦win jab tõmake.
24 Enaaj wõr ro rej riab im ba bwe er Christ im enaaj bar wõr ri-kanaan riab. Rein renaaj kõm̦m̦an kõkal̦l̦e ko rel̦l̦ap im menin bwilõñ ko bwe ren kajjioñ m̦on̦e ro kar kããlõt er.
25 Keememej bwe ij kakkõl kom̦ kõn men kein.
26 Kõn men in, ñe armej renaaj jiroñwaj kom̦ im ba, ‘Epãd ilo ãne jem̦aden,’ kom̦win jab etal im pukote. Im ñe renaaj ba, ‘Epãd ilo ruum̦ ko itulowa,’ kom̦win jab tõmak er.
27 Ãinwõt an ejjaromrom jãn ijoko iturear im rome ijoko iturilik, enaaj ãindein an Nejin armej naaj pãd.*
28 Jabdewõt jikin ewõr juon men emej ie, bao ikõl̦ ko renaaj kobatok ippãn doon.
29 “Ãlikin wõt iien eñtaan eo ilo raan kan̦, al̦ enaaj marok im allõñ eban romaak, im iju ko ilañ renaaj wõtlo̦k, im kajoor ko ilañ renaaj em̦m̦akũtkũt.
30 Innem kõkal̦l̦e eo kõn Nejin armej enaaj wal̦o̦k ilañ, im armej in bwij otemjej ilo lal̦ in renaaj lukkuun bũrom̦õj.* Renaaj lo an Nejin armej itok ilo kõdo̦ ko ilañ kõn kajoor im aiboojoj el̦ap.
31 Im juon ainikien jilel ekanooj el̦l̦aaj enaaj wal̦o̦k. Innem Nejin armej enaaj jilkinl̦o̦k enjel̦ ro an bwe ren aintok ro kar kããlõt er jãn kona ko emãn ilo lal̦ in,* jãn jabõn ñan jabõn ilo lañ.
32 “Kom̦win katak jãn waanjoñak in kõn juon wõjke fig: Ñe ejino wal̦o̦k bõlõk ilo ra jiddik ko, kom̦ jel̦ã bwe epaaktok iien mããn̦ãn̦.*
33 Ilo ejja wãween in wõt, ñe kom̦ij lo an aolep men kein wal̦o̦k, kom̦win jel̦ã bwe Nejin armej epãd iturin kõjãm ko.
34 Ij jiroñ kom̦ bwe epepen in eban jako m̦ae iien men kein aolep renaaj wal̦o̦k.
35 Lañ im lal̦ renaaj jako bõtab naan ko aõ rejjãmin jako.
36 “Ikijjeen raan eo im awa eo, ejjel̦o̦k en̦ ejel̦ã. Enjel̦ ran̦ ilañ kab Nejin rejaje, ak Jemãn wõt ejel̦ã.
37 Men ko renaaj wal̦o̦k ñe Nejin armej enaaj pãd* renaaj ãinl̦o̦kwõt men ko rar wal̦o̦k ilo tõre ko an Noa.
38 Ilo kar raan ko m̦okta jãn Ibwijleplep eo, armej rar m̦ad wõt kõn aer m̦õñã im idaak im m̦are m̦ae raan eo Noa ear del̦o̦ñ ilowaan wa eo.*
39 Bareinwõt, rar jab kile men ko rar wal̦o̦k m̦ae iien ear itok Ibwijleplep eo im aolepeer rar mej. Enaaj bar ãindein ilo iien eo ñe Nejin armej enaaj pãd.
40 Enaaj wõr ruo em̦m̦aan rej pãd ilo juon jikin kallib, naaj bõk juon im kõjekdo̦o̦n eo juon.
41 Bareinwõt, enaaj wõr ruo kõrã rej irir wiit, naaj bõk juon im kõjekdo̦o̦n eo juon.
42 Kõn men in, kom̦win ekkõl wõt kõnke kom̦ij jab jel̦ã ñããt eo Irooj eo ami enaaj itok.
43 “Kom̦ jel̦ã bwe ñe juon armej en kar jel̦ã awa ta eo juon ri-ko̦o̦t enaaj itok, armej in enaaj kar emmej im jab kõtl̦o̦k an ri-ko̦o̦t eo del̦o̦ñe m̦weo im̦õn.
44 Ilo ejja wãween in wõt, kom̦ij aikuj kate kom̦ bwe kom̦win pojak kõnke Nejin armej enaaj itok ilo awa eo kom̦ij jab jel̦ã kake.
45 “Wõn ri-karejar eo etiljek im mãlõtlõt me irooj eo an ear jitõñe bwe en bõk eddon ri-karejar ro an, im lel̦o̦k kijeer ilo iien eo ejejjet?
46 Ri-karejar in enaaj m̦õn̦õn̦õ ñe irooj eo an ej itok im lo bwe ej kõm̦m̦ane eddo in an!
47 Ij jiroñ kom̦ bwe irooj eo enaaj jitõñe bwe en bõk eddon aolepen men ko m̦weien.
48 “Bõtab el̦aññe ri-karejar eo enana ej ba ilo bũruon im ba, ‘Ej to wõt an irooj eo aõ ro̦o̦ltok,’
49 innem ej jino m̦an ri-karejar ro jet, im kobal̦o̦k ippãn ri-kadek ro im ej m̦õñã im idaak ippãer,
50 irooj eo an enaaj itok ilo raan eo ri-karejar eo ejjab kõtmãne kake im awa eo ejaje kake.
51 Innem enaaj l̦ap an irooj eo kajeiki, im enaaj jol̦o̦ke ippãn ro retao. Eñin ijo enaaj jañ im kij dekein ñiin ie.
Footnotes
^ Lale “Pãd” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Ak “Kien eo.” Lale “Aelõñ eo an Anij” ilo Kõmel̦el̦e Ko.
^ Ilo Israel, ekkã an wõt im jin̦o ilo iien m̦õl̦o, im ekõm̦m̦an bwe en pen ñan itoitak.
^ Lale “Jabõt” ilo Kõmel̦el̦e Ko.
^ Lale “Pãd” ilo Kõmel̦el̦e Ko.
^ Ak “deñdeñõte ãnbwinnier kõn aer lukkuun bũrom̦õj.”
^ Kajin Grik, “kõto ko emãn.”
^ Ak “iien rak.”
^ Lale “Pãd” ilo Kõmel̦el̦e Ko.
^ Jekjekin wa eo waan Noa ear ãinwõt juon bo̦o̦k.
