Matu 26:1-75
-
An bũrij ro pukot kilen ñan m̦an Jesus (1-5)
-
Kar kapiti Jesus kõn juon bõkã in weil̦ eñaj (6-13)
-
Kwõjkwõjin Kijoone eo ãliktata im armej eo enaaj ketake (14-25)
-
Jinoin aer kõm̦m̦ane Kõjota eo An Irooj (26-30)
-
Kar kwal̦o̦k kõn an naaj Piter kaarmejjete Jesus (31-35)
-
Jesus ej jar ilo Getsemane (36-46)
-
Aer jibwe im kalbuuji Jesus (47-56)
-
Aer ekajete Jesus im̦aan ro rej uwaan Im̦õn Ekajet eo El̦ap an ri-Ju ro (57-68)
-
Piter ej kaarmejjete Jesus (69-75)
26 Ãlikin an Jesus ba aolep men kein, ear kõnnaan ñan ri-kal̦oor ro an im ba:
2 “Kom̦ jel̦ã bwe ruo raan jãn kiiõ enaaj iien Kwõjkwõjin Kijoone,* im armej ro renaaj liaakel̦o̦k Nejin armej* bwe ren m̦ane ilo aer dilaiki ilo jurõn al̦al̦.”
3 Innem bũrij ro reutiej im ri-tõl ro an ri-Ju ro rar kweilo̦k ippãn doon ilo mel̦an in m̦weo im̦õn bũrij l̦apl̦ap eo etan Keiapas,
4 im rar pukot kilen aer kõm̦m̦an ruõn Jesus bwe ren jibwe* im m̦ane.
5 Bõtab rar ba: “Jen jab kõm̦m̦ane men in ilo iien kwõjkwõj en̦, kõnke armej ran̦ remaroñ kõm̦m̦an poktak.”
6 Ke Jesus ear pãd ilo Betani, ear pãd ilo m̦weo im̦õn Saimõn, em̦m̦aan eo ekar lõba.
7 Im ke Jesus ear kõjota,* juon kõrã ear bõktok juon bõkã* in weil̦ eñaj im el̦ap on̦ããn, im ear kapiti bõran Jesus kake.
8 Ke ri-kal̦oor ro rar lo men in, rar inepata im ba: “Etke kõrã en̦ ejaam̦ ko̦kkure waan bõkã en̦?
9 Ñe emaroñ kar wiakake, enaaj kar lõñ jããn im emaroñ kar lel̦o̦k ñan ro rejeram̦õl.”
10 Jesus ear jel̦ã kõn ta eo rej kõnnaan kake im ear ba: “Etke kom̦ij kaabn̦õn̦õiki kõrã en̦? Men in ear kõm̦m̦ane ñan ña ekanooj in em̦m̦an.
11 Ro rejeram̦õl rej pãd ippemi aolep iien, ak ejjab aolep iien inaaj pãd ippemi.
12 Ke kõrã eo ear kapit eõ kõn weil̦ in eñaj, ear kõm̦m̦ane ñan kõpooj ãnbwinnũ ñe naaj kalibwin eõ.
13 Ij ba ñan kom̦ bwe ñe renaaj kwal̦o̦k kõn ennaan eo em̦m̦an ilo aolepen lal̦ in, naaj bar kwal̦o̦k kõn men in kõrã in ear kõm̦m̦ane bwe armej ren keememeje.”
14 Tokãlik Judas Iskariõt, eo im ej juon iaan rijjilõk ro 12, ear ilo̦k ñan ippãn bũrij ro reutiej
15 im ba: “Ta eo kom̦ naaj letok ñan ña ñe inaaj ketake Jesus ñan kom̦?” Innem rar kallim̦ur bwe renaaj lel̦o̦k 30 m̦õttan jããn jelba ñane.
16 Im jãn iien eo m̦aanl̦o̦k, Judas ear pukot juon iien em̦m̦an ñan an ketake Jesus.
17 Ilo raan eo m̦oktata ilo Kwõjkwõjin Bũreet Ejjab Kauwe,** ri-kal̦oor ro rar itok ñan ippãn Jesus im ba: “Ia eo kokõn̦aan kõjota* ie ilo iien Kwõjkwõjin Kijoone eo bwe kõmin ilen kõpooje?”
18 Im ear ba: “Kom̦win ilo̦k ñan Jerusalem im kom̦ naaj lo juon em̦m̦aan. Innem kom̦win ba ñane, ‘Ri-Kaki ej ba: “M̦õttan jidik enaaj jejjet iien eo aõ. Inaaj kõm̦m̦ane Kwõjkwõjin Kijoone eo ilo m̦weo im̦õm̦ ippãn ri-kal̦oor ro aõ.”’”
19 Innem ri-kal̦oor ro rar kõm̦m̦ane men ko Jesus ear ba, im rar kõpooji men ko ñan iien Kwõjkwõjin Kijoone eo.
20 Ke ear jota, e im ri-kal̦oor ro an 12 rar jijet ilo juon tebõl̦.
21 Im ke rej m̦õñã, ear ba: “Ij ba ñan kom̦ bwe juon iaami enaaj ketak eõ.”
22 Ke ri-kal̦oor ro rar roñ an ba men in, rar kanooj bũrom̦õj, im kajjojo iaaer ear kajjitõk ippãn im ba: “Irooj, ejjab ña, ejim̦we ke?”
23 Ear uwaak er im ba: “Armej eo ej likũt pein ilo bool̦ in ilo ejja iien eo wõt ij likũt peiũ ie, eñin ej armej eo enaaj ketak eõ.
24 Jejel̦ã bwe Nejin armej enaaj mej ekkar ñan Jeje ko, bõtab jerata ñan em̦m̦aan eo enaaj ketake Nejin armej! Enaaj kar em̦m̦anl̦o̦k ñane ñe en kar jab l̦otak.”
25 Judas, eo ej pojakin ketake Jesus ear ba: “Rabbai,* ejjab ña, ejim̦we ke?” Im eba: “Kwõjel̦ã uwaak eo.”
26 Ilo ejja iien eo wõt rej m̦õñã, Jesus ear bõk juon bũreet im jare. Ãlikin, ear kõrrãjete ñan elõñ m̦õttan im ajeje ñan ri-kal̦oor ro, im ear ba: “Kom̦win bõke im kañe. Men in ej kõkkar kõn ãnbwinnũ.”
27 Bareinwõt, ear bõk juon cup im jare im kam̦m̦oolol Anij. Ãlikin, ear lel̦o̦ke ñan er im ba: “Kom̦win aolep idaak jãne,
28 kõnke wain in ej kõkkar kõn bõtõktõkũ, im ej kapene ‘bujen eo’ an Anij. Bõtõktõkũ enaaj to̦o̦rl̦o̦k kõn elõñ armej bwe en jol̦o̦k jerawiwi ko aer.
29 Ij jiroñwaj kom̦ bwe ijjãmin bar idaak wain m̦ae iien inaaj idaak wain kããl ippemi ilo Aelõñ eo an* Jema.”
30 Innem ãlikin aer al im nõbar Anij, rar diwõjl̦o̦k im etal ñan Tol̦ Olive.
31 Im Jesus ear jiroñl̦o̦k er im ba: “Buñniin, kom̦ aolep naaj buñ kõn wõt men eo enaaj wal̦o̦k ñan ña, ãinwõt an Jeje ko ba: ‘Inaaj m̦an jabõt eo, im jiip ko ilo bwij eo renaaj ejjeplõklõk.’
32 Bõtab ãlikin aõ naaj jerkak jãn mej, inaaj etal im̦aamil̦o̦k ñan Galili.”
33 Ak Piter ear ba ñane: “Meñe aolep renaaj buñ kõn wõt men eo enaaj wal̦o̦k ñan kwe, ak ña, ijjãmin buñ!”
34 Im Jesus ear ba: “Ij ba ñan kwe bwe buñniin, m̦okta jãn an ikkũr kako, jilu alen am̦ naaj kaarmejjeteik eõ.”
35 Im Piter eba: “Ijjãmin kaarmejjeteik eok jekdo̦o̦n ñe inaaj aikuj mej ippam̦.” Im ri-kal̦oor ro jet rar bar ba ejja men in wõt.
36 Innem rar etal ñan juon jikin etan Getsemane, im Jesus ear ba ñan ri-kal̦oor ro: “Kom̦win jijet ijin bwe ij etal ñan ijuweo im jar.”
37 Innem ear bõk Piter im l̦õm̦aro ruo nejin Zebedi ippãnl̦o̦k, im ear jino an bũrom̦õj im lukkuun inepata.
38 Im ear ba ñan er: “Joñan aõ bũrom̦õj, inañin mej wõt jidik. Kom̦win pãdwõt ijin im ekkõl wõt.”*
39 Innem ear wõnm̦aanl̦o̦k jidik jãn ijo rej pãd ie. Im ear buñpedo im jar im ba: “Jema, ñe em̦m̦an, kwõn bõk cup* in jãn ña. Bõtab, en ekkar ñan kõn̦aan n̦e am̦ im jab kõn̦aan e aõ.”
40 Ke ear ro̦o̦ll̦o̦k ñan ijo ippãn ri-kal̦oor ro, erjel ej kiki. Im ear ba ñan Piter: “Ta kom̦ ban kar ekkõl wõt* ium̦win juon wõt awa ke?
41 Kom̦win ekkõl wõt im jab bõjrak jãn ami jar bwe kom̦win jab po ilo kapo. An* ekõn̦aan, ak kanniõk em̦õjn̦o̦.”
42 Innem ear bar ilo̦k bwe en jar, im ear ba: “Jema, el̦aññe cup in eban ilo̦k jãn eõ m̦ae iien ij ilimi, innem en jejjet ankilaam̦.”
43 Im ke ear bar ro̦o̦ll̦o̦k, erjel ej kiki kõnke rebane mejãer.
44 Innem ear bar ilo̦k alen kein kajilu bwe en jar, im ear jar kõn ejja men eo wõt ear jar kake.
45 Im ear jepl̦aak ñan ippãn ri-kal̦oor ro im ear ba: “Etke kom̦ij kiki im kakkije ilo iien rot in eaorõk? Ij ba ñan kom̦ bwe m̦õttan wõt jidik renaaj liaakel̦o̦k Nejin armej ñan ippãn rijjerawiwi ro.
46 Kom̦win jerkak bwe jen etal. Reilo̦k m̦õk! L̦eo ej itõn ketak eõ n̦e emoottok.”
47 Ej kõnono wõt ak Judas, juon iaan rijjilõk ro 12, ear tõpartok ijo. Juon jarlepju in armej rar itok ippãntok kõn jãje im al̦al̦. Bũrij ro reutiej im ri-tõl ro an ri-Ju ro rar jilkintok armej rein.
48 Em̦õj an kar eo ear ketake lel̦o̦k juon kõkal̦l̦e ke ear ba: “Eo inaaj mejenmaiki, eñin ej armej eo kom̦ij pukote. Kom̦win kab bõke im kalbuuji.”
49 Im Judas ear kajjul̦o̦k ñan ippãn Jesus im ba: “Yokwe eok Rabbai!”* im ear mejenmaiki.
50 Bõtab Jesus ear ba ñane: “Ta unin am̦ kar itok ñan ijin?” Innem armej ro rar itok im jibwe Jesus im bõke bwe ren kalbuuji.
51 Ak juon iaan ro rar pãd ippãn Jesus ear kadiwõjtok jãje eo an im jek lo̦jilñin ri-karejar* eo an bũrij l̦apl̦ap eo.
52 Innem Jesus ear ba: “Kwõn karo̦o̦l jãje n̦e am̦ ñan men n̦e nien. Aolep ro rej kõjerbal jãje renaaj mej kõn jãje.
53 Ta kwõj l̦õmn̦ak ijjab maroñ kajjitõk ippãn Jema bwe en jilkintok elõñl̦o̦k jãn 12 jarin tarin̦ae* in enjel̦ ñan jipañ ña kiiõ wõt ke?
54 Ak kiiõ ñe inaaj kõm̦m̦ane men in, enãj elemen an jejjet kũtien naan ko ilo Jeje ko me rej kwal̦o̦k bwe men kein renaaj wal̦o̦k?”
55 Innem Jesus ear ba ñan armej ro rar itok im ba: “Etke kom̦ij itok kõn jãje im al̦al̦ ñan ami itõn kalbuuji eõ ãinwõt ñe ña juon ri-ko̦o̦t? Aolep raan ikõn pãd ilo tampel̦ en̦ im katakin armej ie, ak etke kom̦ar jab bõk eõ im kalbuuji eõ?
56 Men kein aolep rej wal̦o̦k bwe en jejjet kũtien naan ko ri-kanaan ro rar je.” Innem aolep ri-kal̦oor ro rar etal jãne im ko.
57 Innem ro rar jibwe Jesus rar bõke ñan ippãn bũrij l̦apl̦ap eo etan Keiapas, im ri-tõl ro an ri-Ju ro kab skraib ro rar kobal̦o̦k.
58 Bõtab Piter ear pãd ettol̦o̦k im l̦oorel̦o̦k Jesus ñan ñe retõpar mel̦an m̦weo im̦õn bũrij l̦apl̦ap eo. Innem Piter ear ilo̦k im jijet ippãn ri-jerbal ro an m̦weo bwe en maroñ jel̦ã kõn ta eo enaaj wal̦o̦k.
59 Kiiõ bũrij ro reutiej im aolep ro uwaan Im̦õn Ekajet eo El̦ap an ri-Ju* rar kappok armej bwe ren riab n̦ae Jesus bwe en wõr unin aer liaakel̦o̦k ñan mej.
60 Bõtab, rar jab ellolo kein kam̦ool meñe elõñ armej rar riab n̦ae e. Innem ruo armej rar jãdetok
61 im ba: “L̦ein ear ba, ‘Imaroñ rupe tampel̦ eo an Anij im bar kalõke ium̦win jilu wõt raan.’”
62 Kõn men in, bũrij l̦apl̦ap eo ear jutak im ba ñan Jesus: “Etke kwõjjab uwaak? Ta kein rej n̦aruom̦ kaki?”
63 Bõtab Jesus ear jab keroro. Innem bũrij l̦apl̦ap eo ear ba: “Kwõn kallim̦ur im̦aan mejãn Anij eo emour im kwal̦o̦k m̦ool ñan kõm, kwe ke Christ, Nejin Anij?”
64 Jesus euwaake im ba: “Ejim̦we am̦ ba. Ak ij jiroñ kom̦ bwe jãn kiiõ im etal kom̦ naaj lo an Nejin armej jijet ituanbwijmaroñin pein Eo Ekajoor,* im an naaj itok ilo kõdo̦ ko ilañ.”
65 Innem bũrij l̦apl̦ap eo ear kekõl nuknuk ko an make, im ear ba: “Ej kõnono n̦ae Anij! Jejjab aikuj bar kappoktok ri-kam̦ool. Lale m̦õk, kom̦ij roñ wõt an kõnono n̦ae Anij.
66 Ta ami l̦õmn̦ak kiiõ?” Rar uwaak im ba: “L̦õn̦e ej aikuj mej.”
67 Im rar kaplouk mejãn im baiti. Ak ro jet rar jeptake,
68 im ba: “Kwe Christ, kwõn kam̦ool ñan kõm bwe kwe juon ri-kanaan im kwal̦o̦k wõn eo ear jeptak eok!”
69 Piter ear jijet wõt ilo mel̦an m̦weo ke juon jiroñ* ear kepaake im ba: “Kwe eo juon kwaar pãd ippãn Jesus, ri-Galili en̦!”
70 Bõtab ear kariabe jiroñ eo im̦aan mejãn armej ro ijo im ba: “Ijaje ta n̦e kwõj kõnnaan kake.”
71 Im ke Piter ear etal ñan iturin kõjãmin wõrwõr eo, bar juon jiroñ ear kile im ear ba ñan armej ro ijo: “Em̦m̦aan in ekõn pãd ippãn Jesus, ri-Nazeret en̦.”
72 Bõtab ear bar kariabe jiroñ eo, im ear kajje im ba: “Ijaje kajjien l̦een̦!”
73 Ãlikin jidik iien, armej ro rej jutak ijo rar itok ñan ippãn Piter im ba: “Lukkuun m̦ool ke kwe juon iaaer kõnke elukkuun alikkar ilo wãween am̦ kõnnaan.”*
74 Innem ear kajje im ba: “Jerata en itok ioõ el̦aññe ij riab. Ijaje kajjien l̦een̦!” M̦õjin wõt an kõnnaan ak ekkũr kako.
75 Im Piter ear keememejtok an kar Jesus ba ñane im ba: “M̦okta jãn an ikkũr kako, jilu alen am̦ naaj kaarmejjeteik eõ.” Innem ear diwõjl̦o̦k im lukkuun jañ.
Footnotes
^ Lale “Kwõjkwõjin Kijoone” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Ak “kalbuuji.”
^ Ak “jijet ilo tebõl̦ eo.”
^ Nien bõkã in ej kõm̦m̦an jãn juon dekã etan ‘alebaster.’ Lale “Alebaster” ilo Kõmel̦el̦e Ko.
^ Ak “Ilo raan eo m̦okta jãn Kwõjkwõjin Bũreet Ejjab Kauwe.” Ilo tõre ko an Jesus, Kwõjkwõjin Kijoone eo (Nisan 14) ear ekkejell̦o̦k ñan Kwõjkwõjin Bũreet Ejjab Kauwe (Nisan 15-21). Jet iien kar watõke Kwõjkwõjin Kijoone eo bwe ej m̦õttan Kwõjkwõjin Bũreet Ejjab Kauwe.
^ Lale “Kwõjkwõjin Bũreet Ejjab Kauwe” ilo Kõmel̦el̦e Ko.
^ Kajin Grik, “m̦õñã.”
^ Ak “Ri-Kaki.”
^ Ak “Kien eo an.” Lale “Aelõñ eo an Anij” ilo Kõmel̦el̦e Ko.
^ Ak “emmej ippa.”
^ “Cup” in ej kõkkar kõn an Anij kõtl̦o̦k an armej ro liaakel̦o̦k Jesus ñan mej meñe rar riab im ba bwe ear aikuj mej kõn an kõnono n̦ae Anij.
^ Ak “emmej ippa.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “ri-Kaki!”
^ Ak “ri-kõm̦akoko.”
^ Kajin Grik, “elõñl̦o̦k jãn 12 legion.” Ilo iien ko etto ilo jarin tarin̦ae eo an aelõñin Rom, juon legion ej tarrin 4,000 l̦o̦k ñan 6,000 rũttarin̦ae. Ilo Baibõl̦, naan in legion ej kõnono kõn juon joñan eo ekanooj l̦ap.
^ Kajin Grik, “Sanhedrin.”
^ Ak “jijet ituanbwijmaroñ im ewõr an kajoor.”
^ Jiroñ in ej juon ri-jerbal.
^ Ak “ton̦ in ainikiõm̦.”
