Matu 3:1-17
3 Elõñ iiõ tokãlik, Jon ri-Peptaij ear etal im kwal̦o̦k naan ilo ãne jem̦aden in Judia,
2 im ear ba: “Kom̦win ukel̦o̦k bwe Aelõñin lañ* epaaktok.”
3 Jon ej armej eo ri-kanaan Aiseia ear kõnnaan kake ke ear ba: “Juon ainikien ej lam̦õj jãn ãne jem̦aden im ba: ‘Kõpooj ial̦ eo an Jeova!* Kajim̦we ial̦ eo an.’”
4 Nuknuk eo an Jon ej kõm̦m̦an jãn kool̦an kamel̦, im kañũr eo an ej bar kõm̦m̦an jãn kilin menninmour. Im m̦õñã ko kijen ej jel̦o* im honey.
5 Innem aolep armej in Jerusalem im aolepen Judia kab aolep bukwõn ko ipel̦aakin Reba Jordan rar jibadekl̦o̦ke.
6 Im ear peptaiji er* ilo Reba Jordan, im rar kwal̦o̦k jerawiwi ko aer.
7 Ke ear lo bwe elõñ iaan Parisi im Saddusi* ro rar itok ñan jikin peptaij eo, ear jiroñl̦o̦k er im ba: “Kom̦ nejin jineik vaiper ko, wõn eo ear kakkõl kom̦ bwe kom̦win ko jãn raanin kwi eo an Anij?
8 Kõm̦m̦an ko ami ren kaalikkar bwe kom̦ij ukel̦o̦k.
9 Kom̦win jab l̦õmn̦ak ippemi make im ba, ‘Ebream ej jememmim.’ Ij ba ñan kom̦ bwe Anij emaroñ ukot dekã kein bwe ren erom nejin Ebream.
10 Em̦õj likũti juon ũlũl iturin okran wõjke ko. Jabdewõt wõjke ejjab em̦m̦an men ko leen ñe ej kalle naaj jeke im jol̦o̦ke ilo kijeek.
11 Ña ij peptaiji kom̦ ilo dãn bwe em̦õj ami ukel̦o̦k. Bõtab eo enaaj itok ãlikũ, ekajoorl̦o̦k jãn ña, im ijekkar ñan utũk juuj ko an. Armej in enaaj peptaiji kom̦ kõn jetõb kwõjarjar* im kõn kijeek.*
12 Ej jibwe juon kein jerbal* ñan kõjenolo̦k wiit ko jãn kilier, im enaaj lukkuun karreoiki jikin kõm̦m̦an wiit eo an im enaaj aini aolepen wiit ko ñan ilowaan im̦õn kakkon̦ eo an. Bõtab, enaaj tile kilin wiit ko ilo kijeek eo ejaje kun.”
13 Innem Jesus ear itok jãn Galili ñan Reba Jordan bwe Jon en peptaiji.
14 Bõtab Jon ekar kajjioñ bõbraiki ilo an ba: “Etke kwõj itok ñan ippa ke kwe eo kwõn kar peptaiji eõ?”
15 Im Jesus eba ñane: “Kwõn jab bõbraik eõ ilo iien in bwe ilo wãween in jej kõm̦m̦ane aolep men ko rejim̦we.”* Innem Jon ear bõjrak jãn an bõbraiki.
16 Ãlikin wõt an Jesus peptaij, ear kajju wal̦o̦ktok jãn dãn eo. Im lañ ear pel̦l̦o̦k im Jon ear lo an jetõb kwõjarjar* eo an Anij itok ioon Jesus ãinwõt juon m̦ul̦e.
17 Im juon ainikien jãn lañ ear ba: “Eñin Nejũ, eo ejitõnbõro ippa im ebuñbũruõ kake.”
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “lokõs.”
^ Ak “katulo̦k er ium̦win dãn.”
^ Parisi im Saddusi ej etan ruo kumi in ri-tõl ro an kabuñ ilo iien ko an Jesus. Lale “Parisi” im “Saddusi” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, kããlõt kom̦ kõn jetõb kwõjarjar im ko̦kkure kom̦ kõn kijeek.
^ Juon kein jerbal ãinwõt jabõl̦ im kar kõm̦m̦ane jãn al̦al̦.
^ Kajin Grik, “rewãnõk.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
