Matu 6:1-34
6 “Lale bwe unin ami kõm̦m̦ani men ko rejim̦we* en jab ñan kõmje mejãn armej. Ñe ãindein kõm̦m̦an ko ami, eban wõr ami jeraam̦m̦an jãn Jememi ilañ.
2 Innem ñe kwõj jipañ ro rejeram̦õl, kwõn jab kõmmejãje kake* ãinwõt ro retao. Rej kõm̦m̦ane men in ilo im̦õn kabuñ ko im ilo ial̦ ko bwe armej ren nõbar er. Em̦ool ij ba ñan kom̦ bwe em̦õj kadede aer bõk on̦ãer.
3 Ak ñe kwõj jipañ ro rejeram̦õl, jab kõtl̦o̦k an pã n̦e ituanmoon̦ jel̦ã ta n̦e pã n̦e ituanmiiñ ej kõm̦m̦ane
4 bwe ejjel̦o̦k en̦ en jel̦ã kõn menin lel̦o̦k ko am̦. Innem Jem̦am̦ ilañ eo ej lo men otemjej enaaj kõjeraam̦m̦an eok.
5 “Bareinwõt, ñe kom̦ij jar, kom̦win jab ãinwõt ro retao me rej jutak im jar ilo im̦õn kabuñ ko im iturin ial̦leplep ko bwe armej ren lo er. Em̦ool ij ba ñan kom̦ bwe rekõn̦aan bwe armej ren lo er ak eban wõr aer jeraam̦m̦an jãn Anij.
6 Ak ñe kwõj jar, kwõn etal ñan juon ruum̦ ilowaan m̦weo im̦õm̦ im ãlikin am̦ kiili kõjãmin, kwõn jar ñan Jem̦am̦ ilañ, eo ej pãd ijo ettino. Innem Jem̦am̦ ilañ, eo ej lo men otemjej, enaaj kõjeraam̦m̦an eok.
7 Im ñe kom̦ij jar, kom̦win jab ãlijinmen ãinwõt an armej in aelõñ ko jet kõm̦m̦ane. Rej l̦õmn̦ak bwe Anij enaaj roñjake er kõn an aetok aer jar.
8 Kom̦win jab anõk er kõnke Jememiwõj ilañ ejel̦ã ta ko kom̦ij aikuji m̦okta jãn ami kajjitõk ippãn.
9 “Innem en wãween dein ami jar:
“‘Jememwõj ilañ, en kwõjarjar etam̦,
10 en itok am̦ Aelõñ.* En jejjet ankilaam̦* ilo lal̦ in ãinwõt an jejjet ilo lañ.
11 Letok kijem* ñan rainin,
12 im jol̦o̦k ammim bõd, ãinwõt ammim jol̦o̦k an ro jet bõd ñe rej bõd n̦ae kõm.
13 Jipañ kõm bwe kõmin jab po ilo menin kapo ko im lo̦mo̦o̦ren kõm jãn ri-nana eo.’
14 “El̦aññe kom̦ij jol̦o̦k bõd ko an ro jet, Jememiwõj ilañ enaaj jol̦o̦k bõd ko ami.
15 Bõtab ñe kom̦ij jab jol̦o̦k bõd ko an ro jet, Jememiwõj ilañ eban jol̦o̦k bõd ko ami.
16 “Ñe kom̦ij jitlo̦k, kom̦win jab mejãn bũrom̦õj ãinwõt ro retao. Rej mejãn bũrom̦õj bwe armej ren jel̦ã ke rej jitlo̦k. Em̦ool ij ba ñan kom̦ bwe rekõn̦aan bwe armej ren lo er ak eban wõr aer jeraam̦m̦an jãn Anij.
17 Ak ñe kwõj jitlo̦k, kwõn kapit bõram̦ kõn weil̦ im kwal̦ mejam̦
18 bwe ro jet ren jab jel̦ã ke kwõj jitlo̦k, ak Jem̦am̦ ilañ wõt, eo ej pãd ijo ettino. Innem Jem̦am̦ ilañ, eo ej lo men otemjej, enaaj kõjeraam̦m̦an eok.
19 “Kom̦win bõjrak jãn ami koorl̦o̦k m̦weiuk ijin ioon lal̦ kõnke dile* im ejjo renaaj ko̦kkuri im ri-ko̦o̦t renaaj ko̦o̦ti.
20 Ak kom̦win koorl̦o̦k m̦weiuk ilañ ijo dile im ejjo reban ko̦kkuri im ri-ko̦o̦t reban ko̦o̦ti.
21 Bwe ijo men ko m̦weiõm̦ rej pãd ie, bũruom̦ enaaj bar pãd ie.
22 “Mãj ej ãinwõt l̦aam̦ ñan ãnbwin. Kõn men in, ñe mejam̦ ej kalimjek juon wõt men, aolepen ãnbwinnũm̦ enaaj meram.
23 Ak ñe mejam̦ eobrak kõn ebbanban,* aolepen ãnbwinnũm̦ enaaj marok. Ñe meram eo ilo kwe eoktak im erom marok, innem ãnbwinnũm̦ enaaj marok jilõñlõñ!
24 “Ejjel̦o̦k juon emaroñ karejar ñan ruo irooj kõnke enaaj yokwe juon im dike eo juon, im enaaj tiljek ñan juon im kõjdate eo juon. Kom̦ij jab maroñ karejar ñan Anij im ilo ejja iien eo wõt karejar ñan M̦weiuk.*
25 “Kõn men in ij ba ñan kom̦: Kom̦win bõjrak jãn ami inepata kõn wãween ami naaj mour, ãinwõt kõn ta ko kom̦ naaj m̦õñã, ak idaak, im kõn ta ko kom̦ naaj kõn̦aki. Mour ejjab aorõkl̦o̦k jãn m̦õñã ke? Im ãnbwin ejjab aorõkl̦o̦k jãn nuknuk ke?
26 Kom̦win kanooj l̦õmn̦ak kõn bao ko imejatoto, rejjab ekkat ine ak m̦adm̦õd ak aini leen keinikkan ko n̦a ilowaan im̦õn kakkon̦ ko, bõtab Jememiwõj ilañ ej naajdik er. Ta kom̦ij jab aorõkl̦o̦k jãn bao ko ke?
27 Wõn iaami emaroñ kaetokl̦o̦k an mour kõn an inepata kake?
28 Im etke kom̦ij inepata kõn nuknuk? Kom̦win ekkatak jãn wãween an wũt ko ilo mel̦aaj eddek. Wũt kein rejjab jerbal im rejjab keke aer nuknuk.
29 Ak ij ba ñan kom̦ bwe meñe Solomon ear kõn̦ak elõñ men ko raiboojoj, ak rar jab aiboojojin wõt juon iaan wũt kein.
30 El̦aññe Anij ej kõm̦m̦an bwe en aiboojoj menin eddek ko ilo mel̦aaj ko me rej pãd rainin im ilju rebwil ilo kijeek, ta eban l̦apl̦o̦k an lewaj ami nuknuk ke? Edik wõt ami tõmak.
31 Kom̦win jab inepata im ba: ‘Jenaaj m̦õñã ta?’ ak, ‘Jenaaj idaak ta?’ ak, ‘Jenaaj kõn̦ak ta?’
32 Men ko kein el̦ap an armej in aelõñ ko jibadeki. Jememiwõj ilañ ejel̦ã bwe kom̦ij aikuji aolep men kein.
33 “Kõn men in, kom̦win wõnm̦aanl̦o̦k wõt im pukot m̦okta Aelõñ eo im men ko rejim̦we* im̦aan mejãn Anij, im enaaj lewaj men kein wõj ñan kom̦.
34 Innem kom̦win jab inepata kõn ilju, kõnke inepata ko an ilju rej an ilju wõt. Inepata ko an rainin rebwe ñan rainin.
Footnotes
^ Ak “rewãnõk.”
^ Ak “uuk jilel ko ami.”
^ Ak “Kien eo am̦.” Lale “Aelõñ eo an Anij” ilo Kõmel̦el̦e Ko.
^ Ak “kõn̦aan ko am̦.”
^ Kajin Grik, “pilawã.”
^ Juon kain menninmour jidikdik im ej wõjeke nuknuk ko.
^ Mel̦el̦ein, ej kalimjek elõñ men. Kajin Grik, “nana.”
^ Ak “Jããn.”
^ Ak “rewãnõk.”
