Matu 7:1-29
7 “Kom̦win bõjrak jãn ami ekajete ro jet bwe Anij en jab ekajete kom̦.
2 Naaj ekajete kom̦ ilo ejja wãween eo wõt kom̦ij ekajete ro jet, joñak eo kom̦ij joñak kake ñan ro jet, eñin joñak eo naaj bar kõjerbale ñan kom̦.
3 Innem etke kwõj kalimjek pelo̦k jidikdik eo ilowaan mejãn eo jeim̦ ak jatũm̦ ak kwõjjab l̦õmn̦ak kõn al̦al̦ kileplep n̦e ilowaan mejam̦?
4 Im etke kwõnañin maroñ ba ñan jeim̦ ak jatũm̦ im ba, ‘In jol̦o̦k pelo̦k n̦e imejam̦,’ ke ilo m̦ool ewõr juon al̦al̦ kileplep ilowaan mejam̦?
5 Kwe ri-etao! Kwõn jol̦o̦k m̦okta al̦al̦ n̦e ekilep ilowaan mejam̦, innem enaaj em̦m̦an am̦ lale im jol̦o̦k pelo̦k eo edik jãn mejãn eo jeim̦ ak jatũm̦.
6 “Kom̦win jab lel̦o̦k men ko rekkwõjarjar ñan kidu ko im jab jol̦o̦k pearl ko ami n̦a im̦aan piik ko kõnke piik kein renaaj jujuuri men kein im oktak im ko̦kkure kom̦.
7 “Jab bõjrak jãn ami kajjitõk im naaj lewaj ñan kom̦, jab bõjrak jãn ami kappok im kom̦ naaj loe, jab bõjrak jãn ami kal̦l̦al̦l̦al̦ im naaj kõpel̦l̦o̦k ñan kom̦,
8 bwe jabdewõt eo ej kajjitõk enaaj bõke, jabdewõt eo ej kappok enaaj loe, im jabdewõt eo ej kal̦l̦al̦l̦al̦ naaj kõpel̦l̦o̦k ñane.
9 Wõn iaami enaaj lel̦o̦k dekã ñan eo nejin ñe ej kajjitõk pilawã?
10 Ak ñe ej kajjitõk ek, kwõnaaj ke lel̦o̦k jineik ñane?
11 Meñe kom̦ ri-nana ak kom̦ jel̦ã bwe kom̦win lel̦o̦k menin lel̦o̦k ko rem̦m̦an ñan ro nejimi. El̦aññe ãindein, innem ekanooj l̦apl̦o̦k an Jememi ilañ naaj lel̦o̦k men ko rem̦m̦an ñan ro rej kajjitõk ippãn!
12 “Kõn men in, aolep iien kom̦win kõm̦m̦an ñan ro jet ilo wãween eo kom̦ kõn̦aan bwe ren kõm̦m̦an ñan kom̦. Eñin ej mel̦el̦ein Kien eo im naan ko an ri-Kanaan ro.
13 “Kom̦win del̦o̦ñl̦o̦k ilo kõjãm eo eaidik, kõnke kõjãm eo ekilep im edepakpak ial̦ eo ie ej tõll̦o̦k ñan jorrããn im elõñ rej del̦o̦ñl̦o̦k ie.
14 Bõtab kõjãm eo eaidik im eapañ ial̦ eo ie ej tõll̦o̦k ñan mour indeeo im eiiet ro rej loe.
15 “Kõjparok kom̦ jãn ri-kanaan ro reriab, rej iwõj ñan ippemi ilo wãween wõt jiip, bõtab itulowa rej ãinwõt ol̦ip ko rellãj.
16 Kwõnaaj kile er kõn kõm̦m̦an ko aer.* Ewõr ke en̦ ej ae kũreep jãn kãlõklõk ko ak ae fig* jãn mar?
17 Jabdewõt wõjke em̦m̦an ej kalle leen ko rem̦m̦an, ak jabdewõt wõjke enana ej kalle leen ko renana.
18 Juon wõjke em̦m̦an eban kalle leen ko renana, im juon wõjke enana eban kalle leen ko rem̦m̦an.
19 Aolep wõjke ko enana leer rej jeki im tũli.
20 Ãindein, kom̦ naaj kile ri-kanaan rein reriab kõn kõm̦m̦an ko aer.
21 “Ejjab aolep ro rej kũr eõ im ba, ‘Irooj, Irooj,’ renaaj del̦o̦ñ ilo Aelõñin lañ.* Ro wõt renaaj del̦o̦ñ ej ro im rej kõm̦anm̦an ankilaan Jema, eo ej pãd ilañ.
22 Ñe raan eo enaaj itok, elõñ renaaj ba ñan ña: ‘Irooj, Irooj, kõmar jab kanaan kõn etam̦ ke, im kadiwõjl̦o̦k jetõb ko rettoon* kõn etam̦ ke, im kõm̦m̦an elõñ menin bwilõñ ko kõn etam̦ ke?’
23 Innem inaaj ba ñan er: ‘Ijaje kajjiemi! Kom̦win etal jãn ña bwe kom̦ij kõm̦m̦ani men ko renana!’
24 “Jabdewõt eo ej roñjake naan kein aõ im pokaki, ej ãinwõt juon em̦m̦aan eo ejel̦ãl̦o̦kjen̦ me ej kalõk m̦weo im̦õn ioon dekã.
25 Im ke ear wõt mijeljel im ibwij im l̦ap kõto, ear jab jorrããn m̦weo kõnke kar kalõke ioon dekã.
26 Bõtab, jabdewõt eo ej roñjake naan kein aõ im ejjab pokaki, ej ãinwõt juon em̦m̦aan eo ejajel̦o̦kjen̦ me ej kalõk m̦weo im̦õn ioon bok.
27 Im ke ear wõt mijeljel im ibwij im l̦ap kõto, m̦weo ear okjak im lukkuun jorrããn.”
28 Ke ear m̦õj an Jesus kwal̦o̦k naan kein, ear l̦ap an jarlepju eo bwilõñ kõn wãween an katakin er,
29 kõnke ear katakin er ãinwõt juon eo ewõr maroñ ippãn, im jab ãinwõt skraib ro aer.
Footnotes
^ Kajin Grik, “leer.”
^ Etan juon kain leen wõjke.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
