Pilippai 1:1-30
1 Jãn Paul im Timote, ro ri-karejeran Christ Jesus, ñan aolep ro rekkwõjarjar ilo Pilippai im rej juon wõt ippãn Christ Jesus, ekoba ro rej lale eklejia im rijjipañ ro:
2 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
3 Aolep iien ij kam̦m̦oolol aõ Anij ñe ij keememej kom̦
4 ilo aolep jar in akwel̦ap ko aõ kõn kom̦ aolep. Iien otemjej ij lañlõñ ñe ij jar im akwel̦ap kõn kom̦,
5 kõn jabawõt ko ami ñan* jerbalin kwal̦o̦k ennaan eo em̦m̦an jãn raan eo jinointata ñan kiiõ.
6 Ij lukkuun lõke bwe eo ear jino jerbal eo em̦m̦an ilo kom̦ enaaj wõnm̦aanl̦o̦k im kadedel̦o̦ke m̦ae raan eo an Christ Jesus.
7 Ejim̦we bwe in l̦õmn̦ak rot in kõn kom̦ aolep kõnke kom̦ij pãd ilo bũruõ, kom̦ eo kom̦ar rejetak eõ ke iar pãd ilo kalbuuj, im jojomare ennaan eo em̦m̦an im pãd im̦aan ri-utiej ro ñan kõm̦m̦an bwe en wõnm̦aanl̦o̦k wõt ennaan eo em̦m̦an. Ilo wãween in, jaar jim̦or bõk tokjãn jãn jouj eo el̦ap an Anij.
8 Anij ej aõ ri-kam̦ool kõn joñan aõ oñkake kom̦, bwe aõ yokwe kom̦ ej ãinwõt an Christ Jesus yokwe kom̦.
9 Eñin men eo ejjab bõjrak aõ jar kake, ej bwe yokwe eo ami en l̦apl̦o̦k wõt ilo jel̦ãl̦o̦kjen̦ eo ejim̦we im ilo el̦ap lol̦o̦kjen̦;
10 bwe kom̦win lukkuun lale ta ko raorõkl̦o̦k kõnke ñan iien eo enaaj jejjet raan eo an Christ, kom̦win maroñ erreo wõt im kom̦win jab kal̦õkatip ro jet;
11 im bwe kom̦win maroñ obrak kõn jerbal ko rewãnõk,* ko rej itok ikijjeen Jesus Christ, ñan bõktok nõbar im aiboojoj ñan Anij.
12 Ro jeiũ im jatũ, ikõn̦aan bwe kom̦win jel̦ã bwe wãween eo ij iioone kiiõ eoktak im juon wãween ñan kowõnm̦aanl̦o̦k ennaan eo em̦m̦an,
13 bwe aõ kalbuuj kõn wõt Christ ebuñbuñ ibwiljin ri-Waj ro an ri-Tõl eo Eutiejtata an Rom im aolep armej ro jet.
14 Kiiõ enañin aolep ro jeid im jatid ilo Irooj rekajoorl̦o̦k kõn wõt aõ kalbuuj, im el̦apl̦o̦k aer peran in kõnono kõn naanin Anij ilo aer jab mijak ñan jidik.
15 Em̦ool bwe jet armej rej kwal̦o̦k kõn Christ kõn wõt aer ebbanban im kõn̦aan akwããl, bõtab jet kõn juon bõro em̦m̦an.
16 Ro rej kwal̦o̦k kõn Christ kõn juon bõro em̦m̦an, rej kõm̦m̦ane men in itok wõt jãn yokwe, kõnke rejel̦ã bwe kar jitõñ eõ ñan jojomare ennaan eo em̦m̦an;
17 bõtab ro rej kõm̦m̦ane men in kõn ebbanban im akwããl, rej kõm̦m̦ane kõn aer kõn̦aan kõm̦m̦an pok, im ejjab kõn juon un em̦m̦an, kõnke rekõn̦aan bwe in iioon apañ ilo aõ kalbuuj.
18 Innem ta tokjãn men kein? Jekdo̦o̦n ta wãween eo rej kõm̦m̦ane, meñe ilo m̦on̦ ak ilo m̦ool, ak ennaan eo kõn Christ ej ajeeded, im ij lañlõñ kõn men in. Ilo m̦ool, inaaj bareinwõt lañlõñ wõt
19 kõnke ijel̦ã bwe men in enaaj bõktok lo̦mo̦o̦r ñan ña ikijjeen jar in akwel̦ap ko ami, im kõn jipañ eo jãn jetõb kwõjarjar,* eo Jesus Christ ej letoke ñan kõj.
20 Men in ej juon wõt ippãn men eo ij kijoororetok im kõjatdikdik eo aõ bwe in jab jook ilo jabdewõt wãween. Bõtab ilo aõ peran in kõnono, Christ en bõk an aiboojoj kiiõ ãinwõt kar aolep iien ko m̦oktal̦o̦k ikijjeen ãnbwinnũ, meñe ilo iien aõ mour ak mej.
21 Ñan ña, ñe ij mour, ij mour ñan Christ, im ñe imej, ej juon jeraam̦m̦an ñan ña.
22 Kiiõ, el̦aññe inaaj mour m̦aanl̦o̦k wõt ilo kanniõk, innem enaaj l̦apl̦o̦k leen jerbal ko aõ. Bõtab men eo inaaj kar kããlõte, ijjab kwal̦o̦ke.
23 Epen aõ kããlõt ikõtaan men kein ruo, kõnke ikõn̦aan rõl̦o̦k im pãd ippãn Christ. Ilo m̦ool, eñin men eo em̦m̦anl̦o̦k.
24 Bõtab, el̦apl̦o̦k an aorõk bwe in mour m̦aanl̦o̦k wõt ilo kanniõk kõn wõt kom̦.
25 Innem kõn aõ lukkuun tõmak bwe eñin men eo enaaj wal̦o̦k, ijel̦ã bwe inaaj pãdwõt im mour m̦aanl̦o̦k wõt ippemi aolep ñan jipañ kom̦ kõm̦m̦an wõnm̦aanl̦o̦k im bwe kom̦win lañlõñ ilo ami tõmak.
26 Ilo wãween in, ami lañlõñ en kanooj l̦ap ilo Christ Jesus kõn wõt ña ñe inaaj bar pãd ippemi.
27 Men eo wõt ikõn̦aan ej bwe kom̦win mour* ilo wãween eo ej ekkar ñan ennaan eo em̦m̦an kõn Christ, kõnke meñe inaaj iwõj im lo kom̦ ak meñe ijako jãn ippemi, in roñ im jel̦ã bwe kom̦ij jutak wõt pen ilo ami juon wõt ilo l̦õmn̦ak* im juon wõt bõro, im ilo ami jipañ doon ñan dãpij wõt tõmak eo ami ilo ennaan eo em̦m̦an,
28 im ilo ami jab mijak ro rej kõjdate kom̦ ñan jidik. Men kein rej kein kam̦ool ñan er bwe naaj ko̦kkure er, ak ñan kom̦, men kein rej kam̦ool bwe kom̦ naaj bõk lo̦mo̦o̦r, im men in ej jãn Anij.
29 Em̦õj lewaj jeraam̦m̦an eo bwe kom̦win jab likũt wõt ami tõmak ilo Christ, ak kom̦win bareinwõt eñtaan kõn wõt e.
30 Bwe kom̦ij eñtaan im kate kom̦ ãinwõt ami kar bar loe aõ eñtaan im kate eõ, im kiiõ kom̦ij roñ bwe ij iioone wõt wãween in.
Footnotes
^ Ak “kõn ami bõk kun̦aami ñan kowõnm̦aanl̦o̦k.”
^ Kajin Grik, “leen ko rewãnõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “mour ãinwõt ro rej jitijen.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
