Pilippai 2:1-30
2 El̦aññe kom̦ij rõjañ doon ilo ami juon wõt ippãn Christ, kaenõm̦m̦an doon ilo yokwe, l̦õmn̦ak kake doon, yokwe im tũriam̦okake doon,
2 innem enaaj l̦ap aõ lañlõñ kõn ami juon wõt bõro, im kõn ami jim̦or kwal̦o̦k yokwe ñan doon, im ami lukkuun bõrokuk ippãn doon im juon wõt ilo l̦õmn̦ak.
3 Kom̦win jab kõm̦m̦an jabdewõt men ilo illu ak ilo utiej bõro, bõtab kom̦win kwal̦o̦k ettã bõro* im watõk bwe ro jet reutiejl̦o̦k jãn kom̦,
4 ilo ami jab l̦õmn̦ak kõn kõn̦aan ko wõt ami, ak kom̦win bareinwõt l̦õmn̦ak kõn kõn̦aan ko an ro jet.
5 Kom̦win dãpij wõt l̦õmn̦ak in ear bareinwõt pãd ippãn Christ Jesus,
6 eo me meñe ej nemãmeen wõt Anij, ak ear jab l̦õmn̦ak in nibiji ijo jikin Anij, mel̦el̦ein, ear jab l̦õmn̦ak bwe ej aikuj joñan wõt juon ippãn Anij.
7 Ear jab ãindein, bõtab ear kaarmejjeteik men otemjej bwe en erom ri-kõm̦akoko im bõk nemãmeen armej.*
8 Ejjab men in wõt ak ke ear itok im mour ãinwõt armej,* ear kõttãiki im pokake wõt ñan mej, aet, ke ear mej ioon al̦al̦ in eñtaan* eo.
9 Kõn men in, Anij ear lelõñl̦o̦k e bwe en lukkuun utiej, im kõn an kanooj jouj, ear lel̦o̦k ñane ãt eo eutiejl̦o̦k jãn ãt otemjej,
10 bwe ilo etan Jesus, bukwe otemjej ren bukwelõlõ—ro ilo lañ im ro ilo lal̦ im ro ilo ium̦win lal̦—
11 im lo otemjej ren kwal̦o̦k aer kile bwe Jesus Christ ej Irooj, bwe aiboojoj en ilo̦k ñan Anij, eo ej Jemãdwõj.
12 Innem ro aõ jitõnbõro, ãinwõt ami kõn pokake eõ aolep iien, ejjab ilo iien ko wõt ij pãd ippemi, ak el̦apl̦o̦k ilo iien in ke ijako jãn kom̦, ãindein kom̦win wõnm̦aanl̦o̦k wõt im kate kom̦ kõn mijak im wũdiddid bwe kom̦win maroñ bõk lo̦mo̦o̦r.
13 Bwe Anij ej kõkajoor kom̦ ilo an lewaj ñan kom̦ kõn̦aan im kajoor eo ñan em̦m̦akũt, im ej kõm̦m̦ane men in ekkar ñan men eo ej m̦õn̦õn̦õ kake.
14 Kom̦win kõm̦m̦an men otemjej ilo ejjel̦o̦k ellotaan im akwããl,
15 bwe en ejjel̦o̦k ruomi im n̦otaami, im ãinwõt ro nejin Anij, kom̦win jab lippijinjin ilo ami pãd ibwiljin epepen in eankeke im enana, ro kom̦ij romaak ãinwõt meram ibwiljier ilo lal̦ in
16 ilo ami dãpij wõt ennaan eo kõn mour. Ilo wãween in, enaaj wõr unin aõ lañlõñ ilo raan eo an Christ kõn aõ jel̦ã bwe iar jab ettõr waan ak kate eõ jerbal waan.
17 Bõtab, jekdo̦o̦n ñe inaaj ãinwõt juon dãnnin joortak rej lutõkl̦o̦k ioon menin katok eo kõn jerbal eo eokkwõjarjar, eo im tõmak eo ami ear tõl kom̦ ñan kõm̦m̦ane, inaaj m̦õn̦õn̦õ im ij lañlõñ ippemi aolep.
18 Ilo ejja wãween in wõt, kom̦ij aikuj bareinwõt m̦õn̦õn̦õ im lañlõñ ippa.
19 Kiiõ ij kõjatdikdik ilo Irooj Jesus bwe ejjabto jãn kiiõ inaaj jilkinwaj Timote, bwe in l̦ak roñ ennaan kõn kom̦, men in en kõkajoor eõ.
20 Bwe ejjel̦o̦k bar juon ij lo bwe ej ãinwõt e im enaaj lukkuun m̦ool an kea kõn kom̦.
21 Aolep armej ro jet rej l̦oor kõn̦aan ko aer make im jab kõn̦aan ko an Jesus Christ.
22 Ak e, kom̦ jel̦ã bwe em̦õj an kam̦ool bwe el̦ap an wõr tokjãn. Ãinwõt juon ajri eo ej pãd iturin jemãn, ear kijejeto ilo an jerbal ippa ñan kowõnm̦aanl̦o̦k ennaan eo em̦m̦an.
23 Innem ij kõjatdikdik bwe e eo inaaj jilkinwaj ãlikin wõt aõ jel̦ã ta ko renaaj wal̦o̦k ñan ña.
24 Ilo m̦ool, ij likũt aõ kõjatdikdik ilo Irooj bwe ejjabto jãn kiiõ, inaaj bareinwõt iwõj.
25 Bõtab ilo tõre in, ij l̦õmn̦ak ekkar bwe in jilkinwaj Epaprodaitõs, eo jatũ ilo tõmak im m̦õtta ilo jerbal im rũttarin̦ae an Christ, im ej bareinwõt ami ri-jerbal im rijjilõk ñan aikuj ko aõ.
26 Unin ej kõnke elukkuun kõn̦aan lo kom̦ aolep, im ebũrom̦õj bwe kom̦ jel̦ã kõn an kar nañinmej.
27 Aet ear nañinmej, joñan ebaj mej wõt jidik. Bõtab Anij ear tũriam̦okake e, ilo m̦ool, ejjab e wõt, ak ear bareinwõt tũriam̦okake eõ bwe en jab l̦apl̦o̦k aõ bũrom̦õj.
28 Kõn men in, ij m̦õkaj in jilkinwaj e bwe ñe kom̦ loe, kom̦win bar lañlõñ, im en bareinwõt dikl̦o̦k aõ inepata.
29 Innem kom̦win karwaineneiki kõn el̦ap lañlõñ, ãinwõt ami kõm̦m̦ane aolep iien ñan ro doon Irooj, im kom̦win wõnm̦aanl̦o̦k wõt im kaorõk kain armej rot in,
30 kõnke ebaj mej wõt jidik kõn an jerbal ñan Christ.* Ear likũt mour eo an ilo kauwõtata* bwe en jipañ eõ kõnke kom̦ jako jãn iturũ ñan ami jipañ eõ.
Footnotes
^ Ak “bõk l̦õmn̦ak ko rettã.”
^ Ak “erom armej.”
^ Kajin Grik, “ke ear wal̦o̦k ilo nemãmeen armej.”
^ Lale “Al̦al̦ in eñtaan” ilo Kõmel̦el̦e Ko.
^ Ak emaroñ, “kõn jerbal eo an Irooj.”
^ Ak “kõjekdo̦o̦n mour eo an.”
