Pilippai 3:1-21
3 Ãliktata, ro jeiũ im jatũ, kom̦win wõnm̦aanl̦o̦k wõt im lañlõñ ilo Irooj. Ijjab ñate aõ jejewaj ñan kom̦ kõn men kein iar bar jeje kaki m̦oktal̦o̦k, im men kein rej ñan kõjparok kom̦.
2 Kom̦win kõjparok kom̦ jãn ro rej ãinwõt kidu, im jãn ro rej kõm̦m̦an jorrããn, im jãn ro rej kowõnm̦aanl̦o̦k m̦wijm̦wij.*
3 Bwe kõj jej bõk m̦wijm̦wij eo em̦ool, kõj eo me jej kabuñ ñan Anij ikijjeen jetõb kwõjarjar* eo an, im jej kõmjãje kõn Christ Jesus im jejjab likũt ad lõke ilo men ko an kanniõk.
4 Bõtab ilo m̦ool, ña eo ewõr unin aõ lõke men ko an kanniõk jãn jabdewõt armej.
El̦aññe jabdewõt armej ej l̦õmn̦ak bwe ewõr unin an lõke men ko an kanniõk, eokwe elõñl̦o̦k un ko ippa jãn jabdewõt armej:
5 iar m̦wijm̦wij ilo raan eo kein karalitõk, ña juon ri-Israel jãn bwijjin Benjamin, ij juon ri-Hibru bwe iar l̦otak jãn ri-Hibru; im ikijjeen kien eo, ña kar juon Parisi;*
6 ikijjeen kijejeto, iar kaeñtaan eklejia eo, ikijjeen wãnõk kõn kien eo, ear ejjel̦o̦k n̦otaõ.
7 Bõtab, meñe iar bõk men kein, ikar watõki bwe ejjel̦o̦k tokjãer* kõn wõt Christ.
8 Ejjab men in wõt, ak ij bareinwõt watõk men otemjej bwe ejjel̦o̦k tokjãer kõn wõt jel̦ãl̦o̦kjen̦ eo ekanooj aorõk kõn Christ Jesus aõ Irooj. Kõn wõt e, iar julo̦ki men kein otemjej im ij watõki kwõpej, bwe in maroñ bõk Christ
9 im bwe ren watõk eõ bwe ij juon wõt ippãn, ejjab kõn aõ wãnõk ilo aõ l̦oor Kien eo, bõtab ej kõn wãnõk eo ikijjeen tõmak ilo Christ, wãnõk eo ej itok jãn Anij, im ej pedped ioon tõmak.
10 Kõttõpar eo aõ in ej bwe in jel̦ã kõn e im kajoorin jerkakpeje eo an, im bwe in eñtaan ãinwõt e im kõttãik ña make ñan mej, ãinwõt mej rot eo an,
11 bwe in lale ewõr ke jabdewõt wãween ñan aõ maroñ bõk jerkakpeje eo m̦okta.
12 Ejjab mel̦el̦ein bwe em̦õj kadede aõ bõke ak bwe em̦õj aõ tõpare, bõtab ij kate eõ wõnm̦aanl̦o̦k wõt bwe in lale ñe imaroñ bõk men eo Christ Jesus ear kããlõt eõ ñan bõke.*
13 Ro jeiũ im jatũ, ijjab watõk bwe em̦õj aõ tõpare men in, bõtab eñin men eo ijel̦ã: Bwe ilo aõ mel̦o̦kl̦o̦k men ko m̦okta im kate eõ ñan kõttõpar men ko im̦aan,
14 ij lukkuun kate wõt eõ ñan tõpar jinõkjeej eo kõn kũr eo jãn lañ an Anij ikijjeen Christ Jesus.
15 Kõn men in, kõj ro im jerũtto ilo tõmak, jen bõk kain l̦õmn̦ak rot in. Bõtab el̦aññe kom̦ij l̦õmn̦ak ilo bar jet wãween reoktakl̦o̦k, innem Anij enaaj kwal̦o̦k wãween l̦õmn̦ak eo ejim̦we ñan kom̦.
16 Kõn men in, ijo jaar tõpare ilo ad kar kõm̦m̦an wõnm̦aanl̦o̦k, jen wõnm̦aanl̦o̦k wõt im etetal ilo ejja wãween in wõt.
17 Ro jeiũ im jatũ, kom̦win juon wõt bõro ilo ami kajjioñe eõ, im kom̦win kanooj in lale waanjoñak ko an ro rej etetal ekkar ñan joñak eo kõmar likũt ñan kom̦.
18 Bwe ekanooj lõñ—ekkã aõ kar kwal̦o̦k kõn er ak kiiõ ij jañ ilo aõ kwal̦o̦k kõn er—ro me wãween aer etetal ej kaalikkar bwe rej ri-kõjdat al̦al̦ in eñtaan* eo an Christ.
19 Jem̦l̦o̦k eo aer ej ñan jeepepl̦o̦k, lo̦jieer ej aer anij, aiboojoj eo aer ej men ko rekajjookok rej kõm̦m̦ani, im rej l̦õmn̦ak wõt kõn men ko an lal̦ in.
20 Bõtab kõj, ijo jikid ej ilañ,* im jej kõttar im kijoororetok juon ri-lo̦mo̦o̦r jãn ijen̦, eo ej Irooj Jesus Christ,
21 eo enaaj ukot ãnbwin ko ãnbwinnid rettã bwe ren ãinwõt ãnbwin eo ãnbwinnin eaiboojoj ikijjeen kajoor eo an el̦ap, eo enaaj kõmaroñe ñan likũt men otemjej bwe ren pãd ium̦win maroñ eo an.
Footnotes
^ Ak “ro rej m̦wijit kanniõkier.” Lale “M̦wijm̦wij” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Lale “Parisi” ilo Kõmel̦el̦e Ko.
^ Ak emaroñ, “ak iar m̦õn̦õn̦õ in kõjekdo̦o̦ni.”
^ Kajin Grik, “ear doore ioõ.”
^ Lale “Al̦al̦ in eñtaan” ilo Kõmel̦el̦e Ko.
^ Ak “jej jitijen in lañ.”
