Pilippai 4:1-23
4 Kõn men in, ro jeiũ im jatũ rejitõnbõro ippa, ro ij yokwe er im oñkake er, ro rej bõktok aõ lañlõñ im rej ãinwõt kũrawũn ñan bõra, kom̦win jutak pen ilo wãween in ilo Irooj.
2 Ij akwel̦ap ñan Euodia im Sintike bwe ren bõrokuk ilo juon wõt l̦õmn̦ak ilo Irooj.
3 Ij bareinwõt akwel̦ap ñan kom̦ ri-jerbal ro m̦õtta retiljek* bwe en jab bõjrak ami jipañ kõrã rein, ro rar kijejeto ilo aer jerbal* ippa kõn ennaan eo em̦m̦an, ekoba Klement im ri-jerbal ro jet m̦õtta, ro etaer epãd ilo bokin mour.
4 Kom̦win lañlõñ ilo Irooj iien otemjej. Bar juon alen ij ba, Kom̦win lañlõñ!
5 En alikkar ñan armej otemjej ke kom̦ ri-mel̦el̦e. Irooj ej epaak.
6 Kom̦win jab inepata kõn jabdewõt, bõtab ilo men otemjej kõn jar im akwel̦ap im kam̦m̦oolol, kom̦win kwal̦o̦k aolep kajjitõk ko ami ñan Anij,
7 im aenõm̦m̦an eo jãn Anij, eo el̦ap jãn jel̦ã otemjej enaaj kõjparok bũruomi im l̦õmn̦ak* ko ami ikijjeen Christ Jesus.
8 Ãliktata, ro jeiũ im jatũ, jabdewõt men ko rem̦ool, jabdewõt men ko relukkuun aorõk, jabdewõt men ko rewãnõk, jabdewõt men ko rerreo, jabdewõt men ko rej kõm̦akũt juon ñan kwal̦o̦k yokwe, jabdewõt men ko remmejaja, jabdewõt men ko rem̦m̦an, im jabdewõt men ko rej menin nõbar, kom̦win wõnm̦aanl̦o̦k wõt im l̦õmn̦ak* kõn men kein.
9 Men ko kom̦ar katak im tõmaki im roñ im loi jãn ña, kom̦win kõm̦m̦ani men kein, innem aenõm̦m̦an eo jãn Anij enaaj pãd ippemi.
10 El̦ap aõ lañlõñ ilo Irooj bwe kiiõ kom̦ij bar kwal̦o̦k ami l̦õmn̦ak kake ña. Meñe kom̦ar l̦õmn̦ak kake ña, ak ewõr iien ear apañ ñan ami kwal̦o̦ke.
11 Ijjab ba men in kõnke ij pãd ilo aikuj, kõnke em̦õj aõ katak im jel̦ã kilen jokwane,* jekdo̦o̦n ta wãween ko ij pãd ie.
12 Ijel̦ã kilen mour jekdo̦o̦n ñe ejabwe men ko ippa im ñe elõñ men ko ippa. Em̦õj aõ kiiõ jel̦ã kilen jokwane ilo men otemjej im ilo jabdewõt wãween meñe ilo iien kwõle ak ilo iien mat, ñe elõñ men ko ippa ak ñe ejjel̦o̦k.
13 Unin ej kõnke imaroñ in kõm̦m̦an men otemjej ikijjeen eo ej letok kajoor ñan ña.
14 Ijoke, elukkuun em̦m̦an bwe kom̦ar jipañ eõ ilo aõ pãd ilo eñtaan.
15 Ilo m̦ool, kom̦ ri-Pilippai, kom̦ bareinwõt jel̦ã bwe ãlikin ami kar jino jel̦ã kõn ennaan eo em̦m̦an, ke iar ilo̦k jãn Masedonia, ejjel̦o̦k bar juon eklejia ear jipañ eõ ak m̦õn̦õn̦õ in bõk jipañ jãn ña ijello̦kun wõt kom̦.
16 Ke iar pãd ilo Tessalonika, kom̦ar jilkintok kein jipañ kõn aikuj ko aõ, ejjab juon wõt alen, ak ruo alen.
17 Ejjab bwe ij kappok menin letok, bõtab ikõn̦aan bwe leen jerbal ko ami rem̦m̦an ren bõktok el̦ap jeraam̦m̦an ñan kom̦.
18 Ilo m̦ool, aolep men ko ij aikuji ewõr ippa im rel̦l̦ap jãn joñan. Kiiõ ke Epaprodaitõs ear bõktok menin letok ko ami, ekabwe aolep aikuj ko aõ. Men kein rej ãinwõt menin joortak ko rebwiin mãlu me rej kabuñbũruon Anij.
19 Kõn men in, Anij eo aõ enaaj kabwe aolep aikuj ko ami, ekkar ñan aiboojojin m̦weiie eo an ikijjeen Christ Jesus.
20 Kiiõ, aiboojoj en ilo̦k ñan eo ej ad Anij im ej Jemãd, ñan indeeo im indeeo. Amen.
21 Lel̦o̦k aõ yokwe ñan aolep ro rekkwõjarjar im rej juon wõt ippãn Christ Jesus. Ro jeid im jatid rej pãd ije ippa rej bar lewaj aer yokwe kom̦.
22 Aolep ro rekkwõjarjar, el̦aptata ro ilo m̦weo im̦õn Sizar,* rej lewaj aer yokwe kom̦.
23 Jouj eo el̦ap an Irooj Jesus Christ en pãd ippemi kõn ami kwal̦o̦k l̦õmn̦ak* ko rejim̦we.
Footnotes
^ Ak “rem̦ool.”
^ Ak “lukkuun kate er jerbal.”
^ Ak “l̦ol̦ãtãt; maroñ in l̦õmn̦ak.”
^ Ak “kõl̦mãnl̦o̦kjen̦.”
^ Ak “jel̦ã make kabwe aikuj ko aõ.”
^ Ak “Irooj L̦apl̦ap eo an Rom.”
^ Naan eo ilo kajin Grik ej pneuʹma. Lale “Pneu′ma” ilo Kõmel̦el̦e Ko.
