Rom 12:1-21
12 Kõn men in, ro jeiũ im jatũ, kõn an l̦ap an Anij tũriam̦o, ij akwel̦ap ñan kom̦ bwe kom̦win ajel̦o̦k ãnbwinnimi ãinwõt juon menin katok emour im eokkwõjarjar, im ebuñbũruon Anij kake. Ilo wãween in, kom̦ maroñ karejar ñan Anij kõn aolepen ami l̦ol̦ãtãt.
2 Kom̦win bõjrak jãn ami l̦oor armej in lal̦ in,* bõtab kom̦win kõm̦m̦an oktak ilo ami ukot l̦õmn̦ak ko ami, bwe kom̦win kam̦ool ñan kom̦ make kõn ta ankilaan Anij, eo em̦m̦an im ekkar im eweeppãn.
3 Innem kõn wõt jouj eo el̦ap Anij ear kwal̦o̦k ñan ña, ij ba ñan kom̦ aolep bwe kom̦win jab kautiej kom̦ make el̦ap jãn joñan. Bõtab, en jim̦we ami l̦õmn̦ak kõn kom̦ make ekkar ñan joñan tõmak eo Anij ear lewaj* ñan kom̦ kajjojo.
4 Elõñ m̦õttan ko ilo juon ãnbwin, bõtab aolep m̦õttan kein eoktak aer jerbal jãn doon.
5 Ãindein bar kõj, meñe jelõñ bõtab jej juon wõt ãnbwin ippãn Christ, im m̦õttan kein rej koba ippãn doon.
6 Innem ewõr ippãd menin letok ko ekkar ñan jouj eo el̦ap kar kwal̦o̦k ñan kõj, im menin letok kein reoktak jãn doon. El̦aññe menin letok eo ad ej ñan kwal̦o̦k kanaan ko, jen kanaan ekkar ñan joñan tõmak eo ad.
7 El̦aññe menin letok eo ad ej ñan jerbal, jen kõm̦m̦ane jerbal in; el̦aññe ej bwe juon en katakin, innem en katakin;
8 el̦aññe ej ñan rõjañ,* en lel̦o̦k naanin rõjañ;* el̦aññe ej ñan lel̦o̦k,* en kõm̦m̦ane men in kõn juon bõro em̦ool; el̦aññe ej ñan tõl,* en kõm̦m̦ane men in ilo tiljek;* im el̦aññe ej ñan kwal̦o̦k tũriam̦o, en kwal̦o̦ke ilo m̦õn̦õn̦õ.
9 En ejjel̦o̦k etao ilo ami kwal̦o̦k yokwe. Kom̦win jõjõik men ko renana, im dãpij wõt men ko rem̦m̦an.
10 Kom̦win kanooj yokwe doon ãinwõt jemjein jemjati. Ñe ej itok ñan kwal̦o̦k kautiej ñan doon, kom̦ eo m̦oktata kom̦win kõm̦m̦ane* men in.
11 Kom̦win niknik* im jab jowan.* Kom̦win kõtl̦o̦k bwe jetõb kwõjarjar* en kõm̦m̦an bwe kom̦win kijejeto. Kom̦win ri-kõm̦akoko ñan Jeova.*
12 Kom̦win lañlõñ kõn kõjatdikdik eo, kijenmej ium̦win eñtaan, im niknik ilo jar.
13 Kom̦win jipañl̦o̦k ro rekkwõjarjar kõn aikuj ko aer, im aolep iien kom̦win kwal̦o̦k karwainene.
14 Kom̦win wõnm̦aanl̦o̦k wõt im kõjeraam̦m̦an ro rej kaeñtaan kom̦. Kõjeraam̦m̦an er im jab ko̦o̦le er.
15 Kom̦win lañlõñ ippãn ro rej lañlõñ im jañ ippãn ro rej jañ.
16 Kom̦win l̦õmn̦ak kake ro jet ilo ejja wãween eo wõt kom̦ij l̦õmn̦ak kake kom̦ make. Kom̦win jab bõk l̦õmn̦ak ko reutiej,* bõtab kom̦win bõk l̦õmn̦ak ko rettã. Kom̦win jab l̦õmn̦ak bwe el̦ap ami mãlõtlõt.
17 Kom̦win jab ukot nana kõn nana ñan jabdewõt armej. Kom̦win l̦õmn̦ak kõn ta ko rem̦m̦an ekkar ñan l̦õmn̦ak ko an aolep armej.*
18 El̦aññe kom̦ maroñ, kom̦win kate kom̦ joñan wõt ami maroñ ñan mour ilo aenõm̦m̦an ippãn armej otemjej.
19 Kom̦ ro rejitõnbõro ippa, kom̦win jab idenon̦e ñan kom̦ make, ak kom̦win likũt men otemjej ñan illu eo an Anij kõnke Jeje ko rej ba: “‘Kun̦aõ idenon̦e, inaaj n̦aon̦ãer kõn wõt jerbal ko aer renana,’ Jeova* ej ba.”
20 Bõtab “el̦aññe eo ej kõjdate eok ekwõle, kwõn naajidiki, im el̦aññe emaro, kwõn lel̦o̦k limen bwe en idaak. Ilo wãween in, kwõj ejouj mãlle ko rebwil n̦a ioon bõran.”*
21 Kwõn jab kõtl̦o̦k bwe nana en anjo̦ ioom̦, ak kwõn wõnm̦aanl̦o̦k wõt im anjo̦ ioon nana kõn em̦m̦an.
Footnotes
^ Ak “jukjukun pãd in.” Lale “Jukjukun pãd” ilo Kõmel̦el̦e Ko.
^ Ak “kõjjemo̦o̦je; ajeje.”
^ Ak “kakapilõk.”
^ Ak “kakapilõk.”
^ Ak “ajej.”
^ Ak “loloodjake.”
^ Ak “m̦ool.”
^ Ak “jinoe.”
^ Ak “tiljek; kijejeto.”
^ Ak “pãd bajjek.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “likũt l̦õmn̦ak ko ami ilo men ko reutiej.”
^ Ak “rem̦m̦an im̦aan mejãn aolep armej.”
^ Lale “Jeova” ilo Kõmel̦el̦e Ko.
^ Mel̦el̦ein, kamed bũruon im kõmeraikl̦o̦k an illu.
