Rom 16:1-27
16 Ij kwal̦o̦k kajjien Pibe ñan kom̦, juon jeid im jatid kõrã. Kõrã in ej juon ri-jerbal ilo eklejia eo ilo Senkria.
2 Ij kwal̦o̦k kajjien bwe kom̦win karwaineneiki ilo etan Irooj ilo juon wãween ekkar ñan ro rekkwõjarjar im kom̦win lel̦o̦k ñane jabdewõt men ej aikuji kõnke ear juon ri-jojomar ñan elõñ, ekoba ña.
3 Lel̦o̦k aõ yokwe Priska im Akula, ri-jerbal ro m̦õtta ilo Christ Jesus,
4 ro rar likũt mour ko aer ilo kauwõtata ñan kõjparok ña, im ña kab aolep eklejia ko an ri-aelõñ ko kõmij kam̦m̦oolol erro.
5 Bar lel̦o̦k aõ yokwe eklejia eo ilo m̦weo im̦weerro. Lel̦o̦k aõ yokwe Epenitõs, eo ejitõnbõro ippa, im ej juon iaan ro m̦oktata rar erom ri-kal̦ooran Christ ilo Eijia.*
6 Lel̦o̦k aõ yokwe Meri, eo el̦ap an jerbal ñan kom̦.
7 Lel̦o̦k aõ yokwe Andronaikõs im Junias, l̦õm̦aro nukũ im m̦õtta ilo kar kalbuuj. El̦ap an rijjilõk ro jel̦ã kõn erro im etol̦o̦k aerro ri-kal̦ooran Christ jãn ña.
8 Lel̦o̦k aõ yokwe Amplietõs, eo ejitõnbõro ippa ilo Irooj.
9 Lel̦o̦k aõ yokwe Õrbenõs, ri-jerbal eo m̦õttad ilo Christ, im Stekis, eo ejitõnbõro ippa.
10 Lel̦o̦k aõ yokwe Apelles, eo ebuñbũruon Christ ippãn. Bar lel̦o̦k aõ yokwe ro ilo m̦weo im̦õn Aristobulõs.
11 Lel̦o̦k aõ yokwe Herodion, eo nukũ. Lel̦o̦k aõ yokwe ro ilo m̦weo im̦õn Narsissõs im rej ri-kal̦ooran Irooj.
12 Lel̦o̦k aõ yokwe Traipina im Traiposa, kõrã ran̦e el̦ap aer kate er ilo aer jerbal ñan Irooj. Lel̦o̦k aõ yokwe Persis, eo ejitõnbõro ippãd, kõnke el̦ap an kate ilo an jerbal ñan Irooj.
13 Lel̦o̦k aõ yokwe Rufus, eo Irooj ear kããlõte, im bar lel̦o̦k aõ yokwe kõrã eo jinemro.
14 Lel̦o̦k aõ yokwe Asinkritõs, Pligõn, Hermis, Patrobas, Hermas, im ro jeid im jatid me rej pãd ippãer.
15 Lel̦o̦k aõ yokwe Pilologõs im Julia, Niriõs im kõrã eo jatin,* im Olimpas, im aolep ro rekkwõjarjar rej pãd ippãer.
16 Kom̦win yokyokwe doon kõn mejenma eokkwõjarjar. Aolep eklejia ko an Christ rej lewaj aer yokwe kom̦.
17 Ro jeiũ im jatũ, ij rõjañ kom̦ bwe kom̦win kanooj lale wõn ro rej kõm̦m̦an jepel im kõm̦m̦an menin l̦õkatip. Men kein rej jum̦ae katak ko kom̦ar bũki, im kom̦win kõjparok kom̦ jãn armej rein.
18 Armej rot n̦e rejjab ri-kõm̦akoko ñan Christ ad Irooj, bõtab rej ri-kõm̦akoko ñan kõn̦aan ko aer make.* Rej kareel bũruon ro ejjel̦o̦k aer jel̦ã ilo aer kõjerbal naan ko em̦m̦an pel̦l̦o̦kier im naanin nõbar ko retao.
19 Aolep rejel̦ã kõn ami pokake, im el̦ap aõ lañlõñ kõn kom̦. Bõtab ikõn̦aan bwe kom̦win mãlõtlõt ilo men ko rem̦m̦an, im kom̦win jaje ilo men ko renana.
20 Ejjabto jãn kiiõ, Anij, eo ej letok aenõm̦m̦an, enaaj kapedakilkil Setan kõn lo̦piden neemi. Jouj eo el̦ap an ad Irooj Jesus en pãd ippemi.
21 Timote, ri-jerbal e m̦õtta, ej lewaj an yokwe kom̦. Lusiõs, Jeson, im Sosipeter, l̦õm̦arã nukũ, rej bar lewaj aer yokwe kom̦.
22 Ña Tertiõs, ri-jeje eo an lõta in, ij bar lewaj aõ yokwe kom̦ ilo etan Irooj.
23 Geiõs, eo ij jokwe ippãn im eo eklejia eo ej kweilo̦k ilo m̦weo im̦õn, ej lewaj an yokwe kom̦. Erastõs, ri-lale jããn eo an jikin e, ej lewaj an yokwe kom̦, im l̦eo jatin* etan Kwartos, ej bar lewaj an yokwe kom̦.
24 *——
25 Jen nõbar Anij, eo emaroñ kõm̦m̦an bwe kom̦win jutak pen ekkar ñan ennaan eo em̦m̦an iar kwal̦o̦ke im jerbalin kwal̦o̦k naan eo kõn Jesus Christ. Ennaan in em̦m̦an ej ekkejell̦o̦k ippãn men eo ettino im eokkwõjarjar me em̦õj an kiiõ alikkar. Men in ekar n̦ojak ium̦win juon iien eaetok,
26 bõtab em̦õj kiiõ kwal̦o̦ke im kaalikkare ibwiljin aolep ri-aelõñ ko ikijjeen kanaan ko ilo Jeje ko. Men in ej ekkar ñan kakien eo an Anij eo ej ñan indeeo, bwe armej ro ren kwal̦o̦k aer tõmak im pokake e.
27 Anij, eo ej make wõt mãlõtlõt, ej tõllo̦kũn ñan bõk nõbar ñan indeeo ikijjeen Jesus Christ. Amen.
Footnotes
^ Lale “Eijia” ilo Kõmel̦el̦e Ko.
^ Ilo kajin Grik ejjab alikkar wõn eo erũtto iaaerro.
^ Ak “ri-kõm̦akoko ñan lo̦jieer.”
^ Ilo kajin Grik ejjab alikkar wõn eo erũtto iaaerro.
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
