Rom 3:1-31
3 Ak kiiõ ta eo ej kõm̦m̦an an ri-Ju ro em̦m̦anl̦o̦k jãn ro jet, ak ta tokjãn m̦wijm̦wij?
2 Rein rem̦m̦anl̦o̦k ilo aolep wãween. M̦oktata, kar lel̦o̦k ñan er naan ko rekkwõjarjar an Anij.
3 Ak ta el̦aññe jet iaaer ejjel̦o̦k aer tõmak, men in enaaj ke kaalikkar bwe Anij ejjab tiljek?
4 Eban ñan jidik! Anij enaaj m̦ool wõt jekdo̦o̦n ñe armej otemjej rej ri-riab, ãinwõt an Jeje ko ba: “Ilo wãween in, enaaj alikkar am̦ wãnõk ilo naan ko am̦ im kwõnaaj maroñ anjo̦ ñe rej ekajete eok.”
5 Bõtab, el̦aññe ad kõm̦m̦ani men ko rejjab jim̦we ej kaalikkar bwe Anij ewãnõk, innem ta eo jenaaj ba? Ebõd ke ñe Anij ej kwal̦o̦k an illu n̦ae kõj? (Eñin ej l̦õmn̦ak eo an jet armej.)
6 Ejjab ñan jidik! Ñe en kar ãindein, enaaj ewi wãween an Anij ekajete lal̦ in?
7 Bõtab el̦aññe aõ riab ej kõm̦m̦an bwe m̦ool eo kõn Anij en alikkarl̦o̦k wõt im ej bõktok nõbar ñane, innem etke kar ekajet eõ im ba bwe ña juon rijjerawiwi?
8 Ak etke jejjab ba, “Jen kõm̦m̦ani men ko renana bwe en wal̦o̦k men ko rem̦m̦an,” ãinwõt an jet armej riab im ba bwe jej ba men in? Ekkar bwe armej rein ren bõk kaje eo naaj kajeik er kake.
9 Innem ta kiiõ? Jem̦m̦anl̦o̦k ke jãn ro jet? Ejjab ñan jidik! Em̦õj ad kaalikkar m̦oktal̦o̦k bwe ri-Ju im ri-Grik rej aolep pãd ium̦win jerawiwi,
10 ãinwõt an Jeje ko ba: “Ejjel̦o̦k armej en̦ ewãnõk, ejjel̦o̦k juon ñan jidik,
11 ejjel̦o̦k juon en̦ elol̦o̦kjen̦ im ejjel̦o̦k juon en̦ ej kappukote Anij.
12 Aolep armej em̦õj aer oktakl̦o̦k, em̦õj aer aolep oktak im ejjel̦o̦k tokjãer. Ejjel̦o̦k en̦ ej kwal̦o̦k jouj, ejjel̦o̦k juon ñan jidik.”
13 “Bũrueer ej ãinwõt juon lõb epel̦l̦o̦k, rar m̦on̦e ro jet kõn loer.” “Baijin in jineik ko repãd ilo tieer.”
14 “Im lo̦ñier eobrak kõn naanin ko̦o̦le im meo̦.”
15 “Ne ko neer reiur ñan kato̦o̦rl̦o̦k bõtõktõk.”
16 “Rej kõm̦m̦an jorrããn im kaeñtaan armej ro,
17 im rejaje kõn ial̦an aenõm̦m̦an.”
18 “Ejjel̦o̦k aer mijak Anij.”
19 Kiiõ jejel̦ã bwe aolep men ko Kien eo ej ba, ej kõnono ñan ro rej pãd ium̦win Kien eo, bwe aolep armej ren ikõñ im aolepen lal̦ in en maroñ pãd ium̦win ekajet eo an Anij.
20 Kõn men in, ejjel̦o̦k juon* enaaj wãnõk im̦aan mejãn Anij ilo an kõm̦m̦ani men ko kien eo ej ba, kõnke kien eo ej kaalikkar ta lukkuun mel̦el̦ein jerawiwi.
21 Em̦õj kaalikkar bwe wãween an Anij kõwãnõk armej ro ejjab wawa ioon kien eo, ãinwõt an Kien Moses im ri-Kanaan ro kwal̦o̦k kake.
22 Anij ej kõwãnõk armej ikijjeen aer tõmak ilo Jesus Christ, im ej kõm̦m̦ane men in ñan aolep ro rej tõmak, kõnke ejjel̦o̦k kalijekl̦o̦k ippãn.
23 Aolep armej rej rijjerawiwi im relikjab jãn aiboojoj eo an Anij.
24 Bõtab, Anij ej kõwãnõk er ikijjeen an kar Christ Jesus katok kõn mour eo an ñan kõl̦l̦ãik on̦ããn aer rõl̦o̦k jãn jerawiwi, im men in ej juon menin letok ejjel̦o̦k on̦ããn jãn Anij kõn wõt jouj eo an el̦ap.
25 Anij ear ajetok Christ ãinwõt juon menin katok bwe jen maroñ aenõm̦m̦an ippãn ilo ad likũt ad tõmak ilo bõtõktõkin. Anij ear kõm̦m̦ane men in ñan kaalikkar an wãnõk, kõnke ear jol̦o̦k bõd ko an ro rar jerawiwi ilo iien ko remootl̦o̦k kõn wõt an meanwõd.*
26 Bareinwõt, ear kõm̦m̦ane men in ñan kwal̦o̦k an wãnõk ilo tõre kein ilo an naaj kõwãnõke armej eo ej tõmak ilo Jesus.
27 Innem ewõr ke unin kõmjãje? Ejjel̦o̦k ñan jidik. Kien ta eo ej bõbraik kõmjãje? Kien eo kõn ta ko armej rej aikuj kõm̦m̦ani ke? Ejjab, ej kien eo ikijjeen tõmak,
28 kõnke jej kile bwe juon armej ewãnõk ikijjeen tõmak im jab kõn an kõm̦m̦ani men ko kien eo ej ba.
29 Ta Anij ej Anij an ri-Ju ro wõt ke? Ejjab bar Anij an ri-aelõñ ko ke? Aet, ej bar Anij an ri-aelõñ ko.
30 Innem kõnke Anij ej juon wõt, enaaj kõwãnõk ro em̦õj aer m̦wijm̦wij kõn wõt tõmak eo aer, im enaaj kõwãnõk ro rejjab m̦wijm̦wij kõn wõt tõmak eo aer.
31 Mel̦el̦ein ke bwe jej jol̦o̦k kien eo kõn ad tõmak? Ejjab ñan jidik! Ilo m̦ool, jej rejetake kien eo.
