Rom 6:1-23
6 Innem ta eo jenaaj ba? Jej aikuj ke wõnm̦aanl̦o̦k im jerawiwi bwe en l̦apl̦o̦k wõt jouj eo el̦ap an Anij?
2 Ejjab ñan jidik! Kiiõ ke ejako ad pãd ium̦win jerawiwi, etke jej wõnm̦aanl̦o̦k wõt im mour ilo jerawiwi?
3 Ak kom̦ij jab jel̦ã ke bwe kõj aolep ro rar peptaij ilo Christ Jesus jaar bar peptaij ilo mej eo an?
4 Kõn men in, kar kalibwin kõj n̦a ippãn ke jaar peptaij ilo mej eo an. Ilo wãween in, ãinwõt an kar Christ jerkakpeje ikijjeen aiboojoj eo an Jemãn im bõk juon mour ekããl, jen bareinwõt bõk juon mour ekããl.
5 El̦aññe jenaaj juon wõt ippãn ilo ad mej ãinwõt kar e, jenaaj bar juon wõt ippãn ilo ad jerkakpeje ãinwõt kar e.
6 Jejel̦ã bwe em̦õj dilaiki kar wãween mour eo ad m̦okta n̦a ippãn ilo jurõn al̦al̦ eo bwe kõn̦aan ko renana an ãnbwinnid ren jab bar irooj iood. Ilo wãween in, jeban bar ri-kõm̦akoko ñan jerawiwi.
7 Ñe juon armej ej mej, em̦õj an rõl̦o̦k* jãn jerawiwi ko an.
8 Bareinwõt, el̦aññe jaar mej ippãn Christ, innem jej tõmak bwe jenaaj bar mour ippãn.
9 Jejel̦ã bwe em̦õj an Christ jerkak jãn mej im ejjãmin bar mej, im ejako an mej irooj ioon.
10 Ke ear mej, ear mej kõn jerawiwi* juon wõt alen. Bõtab kõn mour eo an, ear mour ñan Anij.
11 Ilo ejja wãween in wõt, kom̦win watõk kom̦ make ãinwõt ñe em̦õj ami mej jãn jerawiwi, bõtab kiiõ kom̦ij mour ñan Anij ikijjeen Christ Jesus.
12 Kõn men in, kom̦win jab kõtl̦o̦k an jerawiwi wõnm̦aanl̦o̦k wõt im irooj ãinwõt juon kiiñ ioon ãnbwinnimi, eo ej dien mej, bwe kom̦win jab l̦oore kõn̦aan ko an ãnbwinnimi.
13 Kom̦win jab lel̦o̦k ãnbwinnimi* ñan jerawiwi bwe ren ãinwõt kein jerbal ñan kõm̦m̦ani men ko rejjab jim̦we, bõtab kom̦win lel̦o̦k kom̦ make ñan Anij ãinwõt ro em̦õj aer mour jãn mej. Bareinwõt, kom̦win lel̦o̦k ãnbwinnimi* ñan Anij bwe ren ãinwõt kein jerbal ko ñan kõm̦m̦ani men ko rejim̦we.
14 Jerawiwi en jab irooj ioomi kõnke ejako ami pãd ium̦win kien eo, bõtab kom̦ij kiiõ pãd ium̦win jouj eo el̦ap an Anij.
15 Innem ta mel̦el̦e eo ijin? Mel̦el̦ein ke bwe ejjel̦o̦k jorrããn ñe jej kõm̦m̦an jerawiwi kõnke jejjab pãd ium̦win kien bõtab jej pãd ium̦win jouj eo el̦ap an Anij? Ejjab ñan jidik!
16 Kom̦ij jab jel̦ã ke bwe ñe kom̦ij ajel̦o̦k kom̦ ãinwõt juon ri-kõm̦akoko ñan jabdewõt bwe kom̦win pokake e, innem kom̦ij ri-kõm̦akoko ñan armej in kom̦ij pokake? Kom̦ maroñ ri-kõm̦akoko ñan jerawiwi, eo ej tõll̦o̦k ñan mej, ñe ejjab, kom̦ maroñ ri-kõm̦akoko ñan pokake, eo ej tõll̦o̦k ñan wãnõk.
17 Bõtab jej kam̦m̦oolol Anij bwe meñe kom̦ar ri-kõm̦akoko ñan jerawiwi, ak kiiõ kom̦ij pokake katak ko kar liwaj ñan kom̦ jãn bũruomi.
18 Innem kõnke kar kanemkwõj kom̦ jãn jerawiwi, kom̦ar oktak im ri-kõm̦akoko ñan wãnõk.
19 Ij kõjerbal naan ko epidodo an armej maroñ mel̦el̦e kaki kõnke kom̦ m̦õjn̦o̦ ilo kanniõk. Kom̦win lel̦o̦k ãnbwinnimi bwe ren ri-kõm̦akoko ñan wãnõk, eo ej tõll̦o̦k ñan kwõjarjar ãinwõt ami kar lel̦o̦k ãnbwinnimi bwe ren ri-kõm̦akoko ñan men ko rettoon im renana ñan ami kõm̦m̦ani men ko renana.
20 Ke kom̦ar ri-kõm̦akoko ñan jerawiwi, kom̦ar jab pãd ilo wãnõk.
21 Innem ta kar leen kõm̦m̦an ko ami? Ej men ko kom̦ij jook kaki kiiõ. Jem̦l̦o̦kier ej mej.
22 Ak kiiõ ke kar kanemkwõj kom̦ jãn jerawiwi im kom̦ij ri-kõm̦akoko ñan Anij, leen kõm̦m̦an ko ami ej kwõjarjar, im jem̦l̦o̦kier ej mour indeeo.
23 On̦ããn jerawiwi ej mej, bõtab menin letok eo an Anij ej mour indeeo ikijjeen Christ Jesus ad Irooj.
Footnotes
^ Ak “anemkwõj.”
^ Mel̦el̦ein, ñan jol̦o̦k jerawiwi.
^ Ak, “m̦õttan ko ilo ãnbwinnimi.”
^ Ak, “m̦õttan ko ilo ãnbwinnimi.”
