Rom 7:1-25
7 Ro jeiũ im jatũ, (ij kõnono ñan ro rejel̦ã kõn kien) kom̦ij jab jel̦ã ke bwe Kien Moses ej irooj ioon juon armej toon wõt an mour?
2 Ñan waanjoñak, el̦aññe em̦õj an juon kõrã m̦are, kien ej liãpe ñan l̦eo pãleen toon wõt an l̦eo mour, bõtab el̦aññe l̦eo emej, kõrã in erõl̦o̦k jãn kien* eo an l̦eo pãleen.
3 Kõn men in, ñe lio ej pãleek bar juon em̦m̦aan bõtab l̦eo pãleen ej mour wõt, naaj watõke kõrã in bwe ej juon ri-lejãn.* Bõtab ñe l̦eo pãleen emej, kõrã in erõl̦o̦k jãn kien eo an l̦eo, im ejjab e juon ri-lejãn ñe ej bar pãleek juon em̦m̦aan.
4 Ejja ãindeinl̦o̦k wõt ro jeiũ im jatũ, kom̦ar mej* jãn Kien Moses ikijjeen ãnbwinnin Christ. Kõn men in, kom̦ij kiiõ an Christ, eo ear jerkakpeje, bwe jen maroñ kwal̦o̦k leen ko renaaj bõktok aiboojoj ñan Anij.
5 Ke jaar mour ekkar ñan kõn̦aan ko an kanniõk, Kien Moses ear lukkuun kaalikkar bwe kõn̦aan ko renana an kanniõk rej kõm̦m̦an an ãnbwinnid* jerawiwi, im jerawiwi ej kõm̦m̦an bwe jen kwal̦o̦k leen ko rej tõll̦o̦k ñan mej.
6 Ak kiiõ jerõl̦o̦k jãn Kien Moses kõnke em̦õj ad mej jãn Kien in me ear liãpe kõj, bwe jen maroñ ri-kõm̦akoko ilo juon wãween ekããl ikijjeen jetõb kwõjarjar,* im jab ri-kõm̦akoko ilo wãween eo m̦okta ikijjeen men ko kar jei.
7 Innem ta eo jenaaj ba kiiõ? Kien Moses ej ke jerawiwi? Ejjab ñan jidik! Ilo m̦ool, iban kar jel̦ã ta in jerawiwi el̦aññe en kar jab Kien Moses. Ñan waanjoñak, iban kar jel̦ã ta in an̦okn̦ak el̦aññe Kien Moses ear jab ba: “Kwõn jab an̦okn̦ak.”
8 Bõtab kõn wõt kien eo, epel̦l̦o̦k iien ñan an jerawiwi kõm̦m̦an bwe in an̦okn̦ak ilo elõñ wãween. El̦aññe en kar ejjel̦o̦k kien, enaaj kar mej* jerawiwi.
9 Ilo m̦ool, iar mour ke ekar ejjel̦o̦k kien ippa. Bõtab ke ear itok kien eo, jerawiwi ebar mour,* bõtab imej.
10 Im em̦õj aõ kile bwe kien eo me en kar tõll̦o̦k kõj ñan mour, ej tõll̦o̦k kõj ñan mej.
11 Kõn wõt kien eo, ear pel̦l̦o̦k iien ñan an jerawiwi kapoik eõ im m̦an eõ.
12 Kien Moses eokkwõjarjar, im kien ko ie rekkwõjarjar im rejim̦we im rem̦m̦an.
13 Kõn men in, men eo em̦m̦an ear ke kõm̦m̦an bwe in mej? Ejjab ñan jidik! Jerawiwi ear kõm̦m̦an bwe in mej. Kõn wõt men eo em̦m̦an, jerawiwi ear kõm̦m̦an bwe in mej bwe en alikkar ta in jerawiwi. Kien eo ej kaalikkar bwe jerawiwi elukkuun nana.
14 Jejel̦ã bwe Kien Moses ej jãn Anij, bõtab ña ij kanniõk im bõtõktõk im kar wiakake eõ bwe in ri-kõm̦akoko ñan jerawiwi.
15 Ijjab mel̦el̦e kõn kõm̦m̦an ko aõ. Bwe men ko ikõn̦aan, ijjab kõm̦m̦ani, ak men ko idiki, ij kõm̦m̦ani.
16 Bõtab el̦aññe ij kõm̦m̦ani men ko ijjab kõn̦aan, mel̦el̦ein bwe ij errã bwe em̦m̦an Kien Moses.
17 Ak kiiõ ejjab ña eo ij kõm̦m̦ani men kein, jerawiwi eo ilo ña ej kõm̦m̦ani men kein.
18 Ijel̦ã bwe ejjel̦o̦k men en̦ em̦m̦an ej pãd ilo ña ak ilo ãnbwinnũ,* kõnke ewõr aõ kõn̦aan ñan kõm̦m̦ane men eo em̦m̦an bõtab ejjel̦o̦k aõ maroñ ñan kõm̦m̦ane.
19 Ijjab kõm̦m̦ane men eo em̦m̦an me ikõn̦aan, bõtab ij kõm̦m̦ane men eo enana me ijjab kõn̦aan.
20 Innem el̦aññe ij kõm̦m̦ane men eo ijjab kõn̦aan, ejjab ña eo ij kõm̦m̦ane, jerawiwi eo ilo ña ej kõm̦m̦ane men in.
21 Ij kile bwe ewõr juon kien ej jerbal ilo ña: El̦aññe ikõn̦aan kõm̦m̦ane men eo ejim̦we, eitok wõt bwe in kõm̦m̦ane men eo enana.
22 Bũruõ elukkuun m̦õn̦õn̦õ kõn kien eo an Anij,
23 bõtab ij bar lo juon kien ilo ãnbwinnũ* ej jum̦aik kien eo ilo l̦ol̦ãtãt e aõ, im ej tõll̦o̦k eõ bwe in ri-kõm̦akoko ñan kien jerawiwi, eo ej pãd ilo ãnbwinnũ.*
24 El̦ap wõt aõ jerata! Wõn enaaj lo̦mo̦o̦ren eõ jãn ãnbwin in ej tõll̦o̦k eõ ñan mej?
25 Ij kam̦m̦oolol Anij bwe enaaj lo̦mo̦o̦ren eõ ikijjeen Jesus Christ ad Irooj! Kõn men in, ilo l̦ol̦ãtãt e aõ, ij ri-kõm̦akoko ñan kien eo an Anij, bõtab ilo ãnbwinnũ, ij ri-kõm̦akoko ñan kien jerawiwi.
Footnotes
^ Ak “maroñ.”
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Ak “rõl̦o̦k.”
^ Ak, “m̦õttan ko ilo ãnbwinnid.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “ejjel̦o̦k.”
^ Ak “elukkuun alikkar ke ña rijjerawiwi.”
^ Kajin Grik, “kanniõkũ.”
^ Ak, “m̦õttan ko ilo ãnbwinnũ.”
^ Ak, “m̦õttan ko ilo ãnbwinnũ.”
