Rom 8:1-39
-
Mour im anemkwõj ikijjeen jetõb kwõjarjar (1-11)
-
Jetõb kwõjarjar ej kam̦ool wõn ro rej erom nejin Anij (12-17)
-
Menin kõm̦anm̦an ko rej kõttar aer bõk anemkwõj ãinwõt ke rej ajri ro nejin Anij (18-25)
-
‘Jetõb kwõjarjar ej akwel̦ap kõn kõj’ (26, 27)
-
An Anij karõkl̦o̦k im̦aan (28-30)
-
Bõk anjo̦ ikijjeen yokwe eo an Anij (31-39)
8 Kõn men in, ejjel̦o̦k ruõn ro rej bõro wõt juon ippãn Christ Jesus.
2 Ilo m̦ool, kien jetõb kwõjarjar* ear lewaj mour bwe kom̦win maroñ bõro wõt juon ippãn Christ Jesus. Kien in em̦õj an bareinwõt kanemkwõj kom̦ jãn kien jerawiwi im kien mej.
3 Men eo Kien eo ear jab maroñ kõm̦m̦ane kõn wõt an armej jab weeppãn, eokwe Anij ear kõm̦m̦ane, ikijjeen an kar jilkintok eo ej make wõt Nejin ilo nemãmeen wõt armej* bwe en jol̦o̦k jerawiwi. Ilo wãween in, Anij ej liaakel̦o̦k jerawiwi ko an armej,
4 bwe jen maroñ kajejjet naanin jiroñ ko rewãnõk ilo Kien eo ilo ad mour ekkar ñan jetõb kwõjarjar* im jab ekkar ñan kõn̦aan ko an kanniõk.
5 Ro rej mour ekkar ñan kõn̦aan ko an kanniõk rej l̦õmn̦ak kõn men ko an kanniõk, ak ro rej mour ekkar ñan jetõb kwõjarjar,* rej l̦õmn̦ak kõn men ko an jetõb kwõjarjar.*
6 El̦aññe jej l̦õmn̦ak kõn kõn̦aan ko an kanniõk, men in enaaj tõll̦o̦k ñan mej. Ak el̦aññe jej l̦õmn̦ak kõn men ko an jetõb kwõjarjar,* men in enaaj tõll̦o̦k ñan mour im aenõm̦m̦an.
7 Ro rej l̦õmn̦ak kõn kõn̦aan ko an kanniõk, mel̦el̦ein bwe rej ri-kõjdat an Anij, kõnke kõn̦aan ko an kanniõk rejjab pokake kien Anij. Ilo m̦ool, kõn̦aan ko an kanniõk reban pokake kien Anij.
8 Kõn men in, ro rej mour ekkar ñan kõn̦aan ko an kanniõk rejjab maroñ kabuñbũruon Anij.
9 Ijoke, el̦aññe jetõb kwõjarjar* ej lukkuun pãd ippemi, innem kom̦ij jab mour ekkar ñan kõn̦aan ko an kanniõk, bõtab kom̦ij mour ekkar ñan jetõb kwõjarjar.* Kõn men in, el̦aññe jabdewõt ejjab bõk l̦õmn̦ak* ko an Christ, innem armej in ejjab doon Christ.
10 Bõtab el̦aññe kom̦ij bõro wõt juon ippãn Christ, jetõb kwõjarjar* ej lewaj mour kõnke em̦õj watõk kom̦ ri-wãnõk meñe ãnbwinnimi emej kõn wõt jerawiwi.
11 Ak kiiõ, el̦aññe jetõb kwõjarjar* eo an eo ear kõjerkak Jesus jãn mej ej pãd ippemi, mel̦el̦ein bwe Eo ear kõjerkak Christ Jesus jãn mej enaaj bar kõjerbale jetõb kwõjarjar* eo an ñan kõmour ãnbwinnimi.
12 Kõn men in, ro jeiũ im jatũ, ewõr kun̦aad, bõtab ejjab bwe jen mour ekkar ñan kõn̦aan ko an kanniõk,
13 kõnke el̦aññe kom̦ij mour ekkar ñan kõn̦aan ko an kanniõk, kom̦ naaj mej. Bõtab el̦aññe kom̦ij lukkuun bõjrak jãn kõm̦m̦an ko renana ikijjeen jipañ eo jãn jetõb kwõjarjar,* kom̦ naaj mour.
14 Aolep ro jetõb kwõjarjar* ej tõl er rej lukkuun nejin Anij.
15 Jetõb kwõjarjar* ear jab kõm̦m̦an bwe kom̦win erom ri-kõm̦akoko im bar jino mijak, bõtab ear kõm̦m̦an bwe kom̦win erom nejin Anij, im jetõb in ej kõm̦akũt kõj bwe jen kũri im ba: “Abba,* Jema!”
16 Jetõb kwõjarjar* ej make kam̦ool ñan kõj* bwe jej nejin Anij.
17 El̦aññe kõj nejin, innem kõj bar ri-jolõt. Aet, enaaj wõr ad jolõt jãn Anij, im jenaaj ri-jolõt ippãn Christ. El̦aññe jenaaj eñtaan ippãn Christ, jenaaj bareinwõt bõk aiboojoj ippãn.
18 Ij watõk men ko jej eñtaan kaki kiiõ bwe ejjel̦o̦k tokjãer ñe jej keidi ñan aiboojoj eo jenaaj bõke me Anij enaaj kwal̦o̦ke.
19 Menin kõm̦anm̦an ko rej kijooror im kõttar wõt iien eo naaj kwal̦o̦k kõn aiboojoj eo an ro nejin Anij.
20 Em̦õj likũt menin kõm̦anm̦an ko ium̦win juon mour eo ejjel̦o̦k tokjãn, ijoke ejjab kõn kõn̦aan eo aer make, bõtab ej kõn kõn̦aan eo an Anij. Ak ilo ejja iien eo wõt, ear letok juon kõjatdikdik
21 bwe juon iien menin kõm̦anm̦an ko renaaj anemkwõj jãn aer kõm̦akoko ñan jerawiwi im mej, im renaaj bõk anemkwõj eo eaiboojoj ãinwõt ke rej ajri ro nejin Anij.
22 Jejel̦ã bwe ejjab bõjrak an aolep menin kõm̦anm̦an ko iññũr im eñtaan ippãn doon ñan kiiõ.
23 Ejjab er wõt, ak bar kõj ro rar bõk jetõb kwõjarjar,* eo ej ãinwõt jom̦õkaj in menin jolõt ko ad. Jej bar iññũr ilo bũruod ilo ad kijooror im kõttaretok iien eo Anij enaaj bõk kõj bwe jen ro nejin. Emaroñ kõm̦m̦ane men in kõnke Christ ear kõl̦l̦ã on̦ããn ad rõl̦o̦k jãn ãnbwinnid.
24 Jaar bõk lo̦mo̦o̦r kõn wõt kõjatdikdik in. Bõtab el̦aññe jej loe* men eo jej kõjatdikdik kake, innem ejako an juon kõjatdikdik. Juon armej emaroñ ke kõjatdikdik kõn juon men ej loe?
25 Ak el̦aññe jej kõjatdikdik kõn men eo jejjab loe, jenaaj kijoorore an itok im kijenmej wõt ilo ad kõttare.
26 Ejja ãindeinl̦o̦k wõt, jetõb kwõjarjar* ej bar jipañ kõj kõn m̦õjn̦o̦ ko ad. Apañ eo in ej bwe ewõr iien jej aikuj jar, ijoke jejaje ta eo jej aikuj jar kake, bõtab jetõb kwõjarjar* ej make akwel̦ap kõn kõj ñe jej iññũr ilo bũruod.
27 Bareinwõt, eo ej etale bũruon armej emel̦el̦e kõn ta eo jetõb kwõjarjar* ej ba, kõnke jetõb kwõjarjar* ej akwel̦ap kõn ro rekkwõjarjar ekkar ñan ankilaan Anij.
28 Jejel̦ã bwe Anij ej kõm̦m̦an bwe aolep jerbal ko an ren kon̦ ippãn doon bwe en em̦m̦an ñan ro rej yokwe e, ro ear kũr er ekkar ñan ankilaan,
29 kõnke rein ear kããlõt er m̦oktata ej ro ear karõkl̦o̦k im̦aan bwe ren ãinwõt eo Nejin. Ilo wãween in, Nejin emaroñ m̦aanje ibwiljin aolep ro jatin.
30 Innem ro em̦õj an kar karõkl̦o̦k im̦aan kõn er ej ro ear bar kũr er. Im ro ear kũr er, ej bar ro ear kõwãnõk er. Ãliktata, ro ear kõwãnõk er, ear bareinwõt kaiboojoj er.
31 Innem ta eo jemaroñ ba kõn men kein? El̦aññe Anij ej jutak ilikid, innem wõn emaroñ jum̦ae kõj?
32 El̦aññe Anij ear kõtl̦o̦k an Nejin eñtaan im mej kõn kõj aolep, ta e im Nejin reban bareinwõt m̦õn̦õn̦õ in letok aolep men ko jet ñan kõj ke?
33 Wõn emaroñ liaakel̦o̦k ro Anij ear kããlõt er? Ejjel̦o̦k en̦ emaroñ kõnke Anij eo ej kõwãnõk rein.
34 Wõn emaroñ liaakel̦o̦k er? Ejjel̦o̦k en̦ emaroñ kõnke Christ Jesus eo ear mej, ejjab men in wõt, ak ear jerkakpeje, im ej pãd ituanbwijmaroñin pein Anij, im ej bar akwel̦ap kõn kõj.
35 Wõn emaroñ kõjepel kõj jãn yokwe eo an Christ? Eñtaan ak inepata ak matõrtõr ak kwõle ak jeram̦õl* ak kauwõtata ak jãje remaroñ ke kõjepel kõj jãn yokwe eo an Christ?
36 Jeje ko rej ba: “Aolep iien rej m̦an kõm kõn wõt kwe kõnke kõmij armej ro am̦, im rej watõk kõm ãinwõt jiip ko me rej aikuj m̦ani.”
37 Ijoke jej lukkuun bõk anjo̦ ioon aolep men kein ikijjeen eo ej yokwe kõj.
38 Ij lukkuun tõmak bwe ejjel̦o̦k iaan men kein ãinwõt mej ak mour ak enjel̦ ran̦ ak kien ko ak men ko kiiõ ak men ko tokãlik ak kajoor ko
39 ak men ko ilañ ak men ko ilal̦ ak jabdewõt menin kõm̦anm̦an enaaj maroñ kõjepel kõj jãn yokwe eo an Anij, eo ej kwal̦o̦ke ikijjeen Christ Jesus ad Irooj.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “ilo ãnbwinnin armej ãinwõt kõj, kõj ro me rejerawiwi.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Juon naanin Hibru ak Aramaic im ej mel̦el̦ein “O Jema!”
^ Ak “Kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “em̦õj an wal̦o̦k.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “keelwaan.”
