Nan eo an Jehovah Ej Mour Wõt

Katak ko Relap Jen Book in Malachi

TEMPLE eo kar kõkãle ilo Jerusalem ear dedelok air kõmmane elõñlok jen 70 yiõ ko remotlok. Ak, ke ear motlok ien, mour in jitõb eo an Ri Jew ro ear mõjnolok. Priest ro bareinwõt rar oktak im nana. Wõn eo enaj kõmman bwe ren kile lukkun wãwen bed eo air im kajeoñ in jibañ ir ñan air bar ruaklok ñan Anij? Jehovah ej lelok jerbal in ñan ri kanan Malachi.

Malachi ear kajerbal nan ko rekajur ilo book eo eliktata ilo Jeje ko ilo kajin Hebrew ijo ebed kanan in ekakõrmol an Anij. Elañe jej eoroñ nan in kanan eo an Malachi, men in enaj jibañ kij kebojak kin “ran eo elab im kaamijak an [Jehovah],” ñe jukjuk im bed in enana enaj jemlok.​​—Malachi 4:⁠5.

PRIEST RO “RAR TEL ELÕÑ ARMIJ BWE REN KÕMMÕNI MEN KO REBWID”

(Malachi 1:1–​2:​17)

Jehovah ej kwalok eñjake ko an ñan Israel, ilo an ba: “Ij yokwe kom ien otemjej.” Ak priest ro rar kitõtõkake etan Anij. Ewi wãwen? “Komij ajitok mõñã ko renana ion lokatok eo aõ” im ilo ami bõktok “juõn menin mour ebilo ak eajkub ak enañinmij” ñan ami katok kake.​​—Malachi 1:​2, 6-8.

Priest ro rar “tel elõñ armij bwe ren kõmmõni men ko rebwid.” Armij ro rej “rube kallimur ko [air] ñõn dron.” Jet rar belek kõrã ro rejjab Ri Jew. Ro jet rar rupe kallimur eo air ‘ñõn limaro beleir.’​​—Malachi 2:​8, 10, 11, 14-​16.

Emwij Uaki Kajitõk ko Rej Bedbed ion Bible:

2:2​​—Ilo wãwen et Jehovah ear ‘koole men ko priest ro rar jerammõn kaki’? Anij ear kõmman men in ilo an ukõt kajerammõn ko an priest ro ñan jerata.

2:3​​—Ta melelen ñan “ir turin [mejen priest ro] kin kũbwen menin mour ko”? Ekkar ñan Kien eo, kũbwen menin mour ko rar katok kaki rar aikwij bõkloki ilikin camp eo im tili kin kijeek. (Livitikõs 16:​27) Ñan iri mejen priest ro kin kũbwen menin mour ko ear melelen bwe Jehovah ear karmijete menin katok ko im bwe ear kitõtõkake ro rar liloki.

2:​13​​—Lokatok eo kar katutuiki kin dennin kemjalal ko an wõn? Kar dennin kemjalal ko an limaro rar itok ñan temple eo im kwalok burueir ilo jar ñan Jehovah. Ta eo ear kaburomõj ir? Ri Jew lõmaro beleir  rar jebel jen ir kin un ko rejjab jimwe im illok jen ir, bõlen ñan mareik jiroñ ro jen ailiñ ko jet.

Tokjen Katak ko ñan Kij:

1:​10. Jehovah ear jab buñburuen kake menin katok ko an priest ro rekibbon, ro me rar kajitõk wõnãn air kõmman jerbal ko redik einwõt kili aor ko ak tili kijeek ko ion lokatok eo. Elap an aorõk bwe jerbal ko ad ikijen kabuñ, ekoba men eo jej kõmmane ilo jerbal in kwalok nan, en walok jen yokwe ejelok kibbon ie ñan Anij im ri turid, im jab ñan bõk money!​​—Matu 22:​37-​39; 2 Dri Korint 11:⁠7.

1:​14; 2:​17. Jehovah ejamin kõtlok men in mon.

2:​7-9. Ro rej bõk jerammõn eo ñan katakin ilo congregation eo rej aikwij kõmman bwe men ko rej katakin kaki ren burukuk ibben Nan in Anij, Bible eo, im book ko jet rej bedbed ion Bible me “dri kõmñe eo etiljek” ej litoki.​​—Luk 12:42; Jemes 3:​11.

2:​10, 11. Jehovah ej kõtmene bwe ri kabuñ ro an ren bokake nan in kakabilek eo ñan mare “ilo Iroij wõt.”​​—1 Dri Korint 7:​39.

2:​15, 16. Ri kabuñ ro remol rej kaorõk kallimur in mare eo ibben limaro beleir jen ke rar likao.

‘IROIJ EKAJUR BÕTATA ENAJ ITOK ÑAN TEMPLE EO AN’

(Malachi 3:1–​4:⁠6)

“Iroij [Jehovah Anij] . . . enaj mõkaj an iwõj ñõn Temple eo an” ibben “ri keañ eo” kin bujen eo [Jesus Christ]. Anij enaj “weaktok im ekajete” armij ro an im emõkaj an naj konono nae ro otemjej rej kõmman nana. Bareinwõt, “juõn book” in kememej naj jeje kin ro rej mijak Jehovah.​​—Malachi 3:​1, 3, 5, 16.

Ran eo ‘ebwil’ einwõt jikin kijeek enaj itok im kokkure aolep ro renana. Mokta jen an itok ran eo, enaj jilkintok juõn ri kanan ñan “kakobaik ro jemeir kab ro nejier bwe en bar emmõn kõtair.”​​—Malachi 4:​1, 5, 6.

 Emwij Uaki Kajitõk ko Rej Bedbed ion Bible:

3:​1-3​​—Ñããt eo “Iroij” eo im “ri keañ” eo kin bujen eo rar itok ñan temple eo, im wõn eo kar jilkintoke imair? Ikijen juõn eo ear jutak ikijen, Jehovah ear itok ñan temple eo an im karreoiki ilo Nisan 10, 33 C.E. Eñin kar ien eo ke Jesus ear kadiojlok aolep ro rej wiaik im wiakake ilo temple eo. (Mark 11:​15) Men in ear walok jilu im jimettan yiõ ko elikin kar kabite Jesus einwõt King eo kar kãlete. Eindeinlok wõt, jilu im jimettan yiõ ko elikin kar kairoij e einwõt King ilañ, Jesus ear itok ibben Jehovah ñan temple eo ilo jitõb im lo bwe ear wõr juõn aikwij ñan karreoik armij ro an Anij. Ilo ebeben eo kein kajuõn, kar jilkinlok John ri Baptais ñan keboje Ri Jew ro kin itok eo an Jesus Christ. Ilo ran kein, kar jilkintok juõn ri keañ ñan keboj ial eo kin itok eo an Jehovah ñan temple eo an ilo jitõb. Ilo yiõ ko ilo 1880, juõn kumi in ri katak Bible ro rar jino juõn jerbal ñan bar katakin mol ko relap ilo Bible ñan ro emol burueir.

3:​10​​—Bõktok eo kin “aoleben juõn mõttan joñoul ko” ej kõkkar ke kin ad lelok aolepen ad mour ñan Jehovah? Kien eo an Moses ear jemlok ion bedbedin mij eo an Jesus, inem rainin ejjab juõn menin aikwij ñan ad lelok juõn mõttan joñoul. Ak, lelok juõn mõttan joñoul ewõr melelen. (Dri Epesõs 2:​15) Ejjab kõkkar kin ad lelok aolepen ad mour. Meñe rar lelok juõn mõttan joñoul ilo kajjojo yiõ, jej lelok aolepen ad mour ñan Jehovah juõn wõt alen​​—ñe jej wujleplok ad mour ñan e im kalikare ikijen ad baptais ilo den. Jen ien in manlok, aolep men ewõr ibbed ej an Jehovah. Ak, ej kõtlok bwe jen kãlet jidik in ta eo ewõr ibbed​​—juõn mõttan joñoul ilo nan in kõkkar​​—ñan kajerbale ilo jerbal eo an. Ej kitibuj jabdewõt men ak wãwen ko ibbed ej kõtlok ad kajerbale im ta eo buruõd ej kamakit kij ñan kajerbale. Menin jortak ko jej lilok ñan Jehovah rekoba ien ko, kajur, im men ko mweied jej kajerbali ilo jerbal in kwalok nan kin Ailiñ eo im kõmman ri kalor ro. Ebar koba ad bed ilo kwelok ko an Christian, lolok ri tõmak ro mõttad renañinmij im ritto, im jabawõt ñan rejetak kabuñ eo emol.

4:3​​—Ilo wãwen et eo ri kabuñ ro an Jehovah renaj “anjo ion ro ri nana”? Armij ro an Anij ion lal rejamin lukkun “anjo ion ro ri nana,” melelen, bõk kunair ñan kajejjet ekajet eo an Anij nae ri nana rein. Jen an eindein, ri karejar ro an Jehovah renaj kõmman men in ilo kõkkar ke rej bõk kunair kin aolepen burueir ilo kwojkwoj in anjo eo me enaj walok elikin naj kokkure lal eo an Satan.​​—Sam 145:20; Reveles̃õn 20:​1-3.

4:4​​—Etke jej aikwij ‘kememej . . . nan in jiroñ ko Moses ear katakin kaki’? Ri Christian ro rejjab aikwij lor Kien in, ak ear jerbal einwõt “anõñin men ko re naj itok.” (Dri Hibru 10:⁠1) Kin men in, ñe jej etale Kien eo Anij ear letok ikijen Moses enaj jibañ kij ñan lo ewi wãwen men ko kar jeje iloan rar jejjet kitieir. (Luk 24:​44, 45) Bareinwõt, ebed ilo Kien eo “men in kajeõnwe ko an men ko i lõñ.” Jej aikwij katak kake men kein elañe jekõnan melele kin katak ko im mwilin Christian.​​—Dri Hibru 9:​23.

4:​5, 6​​—Wõn eo “ri kanan Elijah” ej kõkkar kake? Kar kanan bwe “Elijah” enaj kõmman juõn jerbal in kajeblak, melelen ñan keboj buruen armij ro. Ilo ebeben eo kein kajuõn C.E., Jesus Christ ear jitõñlok ñan John ri Baptais einwõt “Elaija.” (Matu 11:​12-​14; Mark 9:​11-​13) Eo Elijah ear annañelok ilo ran kein kar jilkinloke “mokta jen an itok ran eo elab im kaamijak an Iroij [Jehovah].” Elijah rainin ej jutak kin “dri korijer e tiljek im meletlet.” (Matu 24:​45) Class in Christian ri kabit ro rej tiljek in jibañ armij ro ñan air kõkãl kõtan eo air ibben Anij.

 Tokjen Katak ko ñan Kij:

3:​10. Elañe jejjab lelok ñan Jehovah joñan wõt ad maroñ jenaj likjap in bõk jerammõn ko jen e.

3:​14, 15. Kin joñok ko renana an priest ro, Ri Jew ro rar jino watõk bwe ejelok tokjen air jerbal ñan Anij. Ro rej tel ak ewõr eddo ko ilo congregation in Christian rej aikwij likit juõn joñok emõn.​​—1 Piter 5:​1-3.

3:​16. Jehovah ej je etan ro rej mijak e im rej tiljek ñan e. Ej kememej ir im enaj kejbãrok ir ñe enaj bõktok jemlokin jukjuk im bed in enana an Satan. Kin men in, en jab mõjnolok bebe eo ad ñan kejbãrok ad tiljek ñan Anij.​​—Job 27:⁠5.

4:⁠1. Ilo ran eo jej aikwij uak ñan Jehovah, ajiri jidik ro renaj bõk ejja ekajet eo wõt an jemeir im jineir. Ewõr juõn eddo elap ibben ritto ro ñan katakin ro nejiir redik! Christian ro jemen im jinen rej aikwij kate ir ñan bõk buñburu eo an Anij im kejbãrok juõn jutak emõn ibben.​​—1 Dri Korint 7:⁠14.

“Kwon Mijak Anij”

Wõn ro renaj bõk lomor ilo “ran eo elab im kaamijak an Iroij [Jehovah]”? (Malachi 4:⁠5) “Ak ñõn kom ro rej bokake iõ,” Jehovah ej ba, “kajur in aõ lomor enaj walok iomi einwõt an al tak im rome kom, im enaj kemour kom. Kom naj anemkwoj im mõnõnõ einwõt kon in cow ko rej kõtloki jen worwor jidrikdrik eo jikier.”​​—Malachi 4:⁠2.

‘Tak in al eo ewãnik,’ Jesus Christ, ej romak ion ro rej mijak etan Anij, im rej bõk buñburu eo an. (Jon 8:​12) Ikijen ir, enaj bareinwõt ‘kemour ir’​​—kemour ir ilo jitõb kiõ ak kõkãl kõtan eo air ibben Anij, im ilo lal eo ekãl an Anij enaj kemour ir ilo eyu ilo enbwin, lemnak im eñjake. (Reveles̃õn 22:​1, 2) Kin air kijerjer im mõnõnõ, rej emmakit einwõt “kon in cow ko” remattõk. Kinke jerammõn rot kein rej bed imad, jen bõk ñan buruõd nan in kakkõl eo an King Solomon: “Kwon mijõk Anij, im bokake kien ko An; bwe eñin aolepen kõmõn emõn an armij ro.”​​—Ekklisiastis 12:⁠13.

[Pija ilo page 28]

Ri kanan Malachi, juõn ri karejaran Anij ekijejeto im tiljek

[Pija ilo page 31]

Men eo jej katakin kake en errã ibben Bible eo

[Pija ilo page 31]

Ri karejar ro an Jehovah rej kautiej kallimur in mare eo air