Kwoj Rejetak Ke Iroij Bõtata eo An Jehovah?

“Komin ba iben ro dri ailiñ ko, Jeova e Kiñ.”​​—SAM 96:⁠10.

1, 2. (a) Ta ien eo elap an aorõk kar walok ilo October 29 C.E.? (b) Ien in ear melelen ta ñan Jesus?

 JUÕN ien elap an aorõk, im eo me ejañin wõr juõn ej loe ion lal, ear walok ilo October 29 C.E. John, ri jeje eo an Gospel ear ba: “I [John ri Baptais] ar lo Jitõb kãlõltak, einwõt muli, jen lõñ, im Ej ber ion [Jesus]. Im I ar jaje E; a Eo e ar jilkintok iõ bwe in baptais ilo dren, E ar ba ñõn iõ, Ion Eo kwo naj lo Jitõb kãlõltak, im ber ion, E in eo ej baptais ilo Jitõb Kwojarjar. Im I ar lo, im kennan bwe E in Nejin Anij.” Eñin kar juõn ian ien ko me aolep ri jeje ro emen an Gospel rar jeje kake.​​—Jon 1:​32-​34, Matu 3:​16, 17; Mark 1:​9-​11; Luk 3:​21, 22.

² Ke kar lutõklok jitõb kwojarjar eo ion Jesus, men in ej kwalok bwe e Eo Emwij Kabite, im nan in ej melelen Messiah, ak Christ. (Jon 1:​33) Ej kab jejjet, ‘ine’ eo kar kallimur kake ear walok! Eo Satan enaj kar kokkure jimwin neen im eo enaj kar kokkure bõran ri kijirãt in elaptata an Jehovah im iroij bõtata eo An, ear jutak iman John ri Baptais eo. (Jenesis 3:​15) Jen ien in im manlok, elap an kar Jesus kile bwe ej aikwij kate ñan kajejjet karõk eo an Jehovah ikijen iroij bõtata eo An im Ailiñ eo.

3. Ewi wãwen Jesus ear keboj e make kin jerbal eo ear aikwij in kõmmane ilo an rejetak iroij bõtata eo an Jehovah?

³ Bwe en bojak kin jerbal eo kar lelok ñan e, “Jisõs, eobrõk kin Jitõb Kwojarjar, Ej jeblak jen Jordan, im Jitõb ej añinlok E ilo ene jemaren.” (Luk 4:1; Mark 1:​12) Ijo, iumin 40 ran ko ear wõr an Jesus ien ñan lukkun kalmenlokjen kin aitwerõk eo Satan ear bõkmantak kake im ial eo Ej aikwij in lore ñan rejetak iroij bõtata eo an Jehovah. Aitwerõk in ej kitibuj aolep menin kõmanman ko remeletlet​​—ilañ im ion lal. Inem, jej aikwij etale ial eo etiljek an Jesus im lale ta eo jej aikwij in kõmmane ñan kwalok bwe jekõnan bareinwõt rejetak iroij bõtata eo an Jehovah.​​—Job 1:​6-​12; 2:​2-6.

Ear Bõkmantak Aitwerõk eo kin Iroij Bõtata eo ilo Alikar

4. Ta eo Satan ear kõmmane bwe en kar bõkmantak aitwerõk eo kin iroij bõtata eo ilo alikar?

⁴ Emol, bwe Satan ear lo aolep men ko rar walok. Ilo mõkaj, ear jino jumae ‘ine’ eo elap an “kõra” eo an Anij. (Jenesis 3:​15) Satan ear kajeoñ in kabo Jesus jilu alen, ilo an rejañ e bwe en kõmman men ko emaroñ wõr  tokjeir ñan e make jen an kõmman men eo Jemen ear kõnan bwe en kõmmane. Menin kabo eo kein kajilu, ear laptata an bõkmantak aitwerõk eo kin iroij bõtata eo ilo alikar. Ke ear kwalok ñan Jesus “ailiñ in lõl otemjej, im air aibujuij,” Satan, ilo ejelok an kea ear ba ñan Jesus: “Men kein otemjej I naj lewoj ñõn Yuk, elañe Kwo naj bero im kabuñ ñõn iõ.” Kinke elukkun jelã bwe Devil eo ej iroij ion “ailiñ in lõl otemjej,” Jesus ear kwalok kin bed eo An ikijen aitwerõk eo kin iroij bõtata eo ilo an kar ba: “Kwon ilok, Setan: bwe ar je, Kwon kabuñ ñõn Iroij am Anij, im kwon jerbal ñõn E wõt.”​​—Matu 4:​8-​10.

5. Ta jerbal eo ebin Jesus ear aikwij kajejjete?

⁵ Wãwen mour eo an Jesus ear kwalok ilo alikar, bwe an rejetak iroij bõtata eo an Jehovah ej men eo eaorõktata ibben. Jesus ear lukkun jelã aikwij eo ñan an tiljek wõt mae ien emij iumin pein Satan​​—im kar kanan kake men in ikijen kokkure in jimwin neen “inen” kõrã eo​​—bwe en kamol jimwe eo an iroij bõtata eo an Anij. (Matu 16:21; 17:​12) Ear bareinwõt aikwij kamol bwe Ailiñ in Anij ej dolul eo Jehovah enaj kajerbale ñan kokkure ri jumae eo Satan im ñan bar kajeblaktok ainemõn im lajrak ñan aolep menin kõmanman ko. (Matu 6:​9, 10) Ta eo Jesus ear kõmmane ñan kajejjet jerbal in ebin?

“Ebak Ailiñ in Anij”

6. Ewi wãwen Jesus ear kwalok bwe Anij enaj kajerbale Ailiñ eo me ej dolul eo an ñan “kokkure jerbal ko an Devil eo”?

⁶ Ñan jinoe, “Jisõs ej itok ilo Galili, im kwalok gospel an ailiñ in Anij, im ba, Ejejit ien, im ebak ailiñ in Anij.” (Mark 1:​14, 15) Ilo mol, ear ba: “In kwalok nan emõn an ailiñ in Anij ñõn jikin kwelok ko jet; bwe ar jilkintok Iõ kin men in.” (Luk 4:​18-​21, 43) Jesus ear ito-itak ilujen eneo, “im Ej kwalok im konono gospel an ailiñ in Anij.” (Luk 8:⁠1) Jesus ear bareinwõt kõmman elõñ menin bwilõñ ko​​—najidik kumi ko, kalur lañ ko renana, kemour ro renañinmij, im kajerkakbiji ro remij. Ikijen menin bwilõñ kein, Jesus ear kamol bwe Anij emaroñ ukõt im jolok aolep jorrãn im eñtan ko me rar walok kin jumae eo ilo Eden im ilo wãwen in “kokkure jerbal ko an devil.”​​—1 Jon 3:⁠8.

7. Ta eo Jesus ear jiroñ ri kalor ro an bwe ren kõmmane, im ta eo ear walok jen men in?

⁷ Bwe en let air kwalok news eo emõn kin Ailiñ eo, Jesus ear aintok juõn kumi in ri kalor ro retiljek im katakin ir kin jerbal in. Moktata, ear jitõñ ri jilek ro an 12 im “jilkinlok ir bwe ren kwalok ailiñ in Anij.” (Luk 9:​1, 2) Inem ear jilkinlok 70 ro jet ñan kwalok ennan eo: “Ailiñ in Anij ej ebake kom.” (Luk 10:​1, 8, 9) Ke ri kalor rein rar bar jeblak im kejelãik Jesus kin tõbrak ko rar lo ilo jerbal in kwalok nan kin Ailiñ eo, ear uak: “I ar lo Setan emwij an buñ jen lõñ einwõt jarom.”​​—Luk 10:​17, 18.

8. Ta eo Jesus ear kwalok kake ilo alikar kin wãwen mour eo an?

⁸ Jesus ear lelok aolepen maroñ eo an im ear jab likjap ñan kennan kin Ailiñ eo. Elap an kar kate im jerbal ran im boñ, im bareinwõt ear karmijete juõn mour emõn. “Kiru jakol ko eor roñ air, im bao in mejatoto eor ileir: a Nejin armij ejelok jikin An kababu bõran,” ear ba. (Luk 9:​58; Mark 6:​31; Jon 4:​31-34) Ejjabto mokta jen an kar mij, ilo beran Jesus ear ba ñan Pontius Pilate: “Kin men in I ar itok ñõn lõl, bwe In kennan kin mol.” (Jon 18:​37) Aolepen wãwen mour eo an Jesus ear kwalok bwe unin ear itok, ejjab ñan baj erom juõn ri kaki elap wõt ak juõn ri kõmman menin bwilõñ ko ak juõn Ri Lomor ear karmijete e make, ak bwe en rejetake ankil an iroij bõtata eo an Jehovah im kennan kin maroñ eo an Anij ñan kajejjet ankil an ikijen Ailiñ eo.​​—Jon 14:⁠6.

“Emwij!”

9. Ewi wãwen Satan eliktata ear lo tõbrak ilo an kar kokkure jimwin neen “inen” kõrã eo an Anij?

⁹ Aolep men Jesus ear kõmmane ikijen  Ailiñ eo, Ri Jumae eo, Satan Devil eo ear jab buñburuen kake. Elõñ alen, ikijen mõttan ‘inen’ ej bed ion lal​​—kien im kabuñ ko jimor​​—Satan ear kajeoñ kokkure “inen” kõrã eo an Anij. Jen ien lotak eo an ñan jemlokin mour eo an ion lal, Jesus ear juõn kein kõjjeroro eo an Satan im ro mõttan. Eliktata, ilo ien manrak ilo 33 C.E., ien eo emottok bwe naj ketake Nejin armij ilo pein Ri Jumae eo bwe en kokkure jimwin neen. (Matu 20:​18, 19; Luk 18:​31-​33) Gospel eo ej kwalok ilo alikar kin wãwen an kar Satan mone im kajebwãbweik armij ro​​—jen Judas Iscariot ñan priest ro relap, scribe ro, Pharisee ro, im Ri Rome ro​​—bwe ren liakelok Jesus ñan juõn mij ear lukkun kõmetak ion juõn alal in eñtan.​​—Jerbal 2:​22, 23.

10. Ta men eo eaorõktata Jesus ear kõtõbrake ikijen mij eo an ion alal in eñtan eo?

¹⁰ Ta eo kwoj kememej ñe kwoj lemnak kin Jesus ion alal in eñtan eo im ear jab mij ilo mõkaj ak ear lukkun kõmetake? Bõlen kwoj kememej katok in binmour eo ilo ejelok kibbon Jesus ear lelok kin armij ro rejerawiwi. (Matu 20:28; Jon 15:​13) Kwomaroñ bwilõñ kin yokwe eo elap Jehovah ear kwalok ilo an kar letok binmour in. (Jon 3:​16) Bõlen kwoj eñjake einwõt kaben in jar in tarinae eo me men ko ear loi rar kamakite ñan an ba: “Emol E in Nejin Anij.” (Matu 27:​54) Aolep men kein rej uak ko rejimwe. Ijo turãjet, kememej bwe nan eo eliktata an Jesus ion alal in eñtan eo kar: “Emwij!” (Jon 19:​30) Ta eo emwij kar kõtõbrake? Meñe Jesus ear kõtõbrak elõñ men ko ikijen mour im mij eo an, un eo eaorõktata unin Jesus ear itok ñan lal in kar ñan kajejjet aitwerõk eo kin iroij bõtata eo an Jehovah. Im kar kanan kake bwe einwõt ‘ine’ eo, enaj jelmae melejoñ eo elap ilo pein Satan bwe en karreoik aolep nana ko jen ãt eo etan Jehovah. (Aiseia 53:​3-7) Men kein rar eddo ko relap, ak Jesus ear kajejjet aolepeir. Elukkun lap tõbrak!

11. Ta eo Jesus enaj kõmmane ñan kajejjet ilo eyu kanan eo kar kwalok kake ilo Eden?

¹¹ Kin tiljek eo an, kar kajerkakbiji Jesus, jab einwõt juõn armij, ak einwõt juõn “jitõb in kemour.” (1 Dri Korint 15:45; 1 Piter 3:​18) Jehovah ear kallimur ñan Nejin eo ear kaibujuije: “Kwon jijõt i anbijmaroñiõ mae ien ij kõmõn bwe ro rej kijirãt Yuk ren eran neõm.” (Sam 110:⁠1) ‘Ro rej kijirãte’ ekoba ri kowadoñ eo elaptata, Satan, im aolep ro uan ‘inen.’ Einwõt King eo an Ailiñ in Messiah eo an Jehovah, Jesus Christ enaj tel ñan kokkure aolep ri jumae ro rej bed ilo jikin ko ilañ im ion lal. (Reveles̃õn 12:​7-9; 19:​11-​16; 20:​1-3, 10) Inem enaj jejjet kitien ilo eyu kanan eo ilo Jenesis 3:15 im bareinwõt jar eo Jesus ear katakin ri kalor ro an: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.”​​—Matu 6:​10; Dri Pilippai 2:​8-​11.

Juõn Joñok bwe Jen Lore

12, 13. (a) Ewi wãwen an armij ro emmakit ñan news eo emõn kin Ailiñ eo rainin? (b) Ta kajitõk ko jej aikwij kajitõkin kij make elañe jekõnan lor buñten neen Jesus?

¹² Rainin, rej kwalok kake news eo emõn kin Ailiñ eo ilo elõñ ailiñ ko, einwõt Jesus ear kanan kake. (Matu 24:​14) Tokjen men in,  elõñ million armij ro rar wujleplok air mour ñan Anij. Rej kijoror kin jerammõn ko me Ailiñ eo enaj bõktoki. Rej reimanlok ñan mour indio ilo ainemõn im jokane ilo juõn paradise ion lal, im rej mõnõnõ in jiroñ ro jet kin kejatdikdik eo air. (Sam 37:11; 2 Piter 3:​13) Kwoj ke juõn ian ri keañ ro kin Ailiñ eo? Elañe aet, kwoj tellokin bõk nebar. Bõtab, ebar wõr juõn men me kij kajjojo aikwij in etale.

¹³ Ri jilek Peter ear jeje: “Kraist e ar iñtan kin kom, im likit joñok ñõn kom, bwe komin anõke jenkwon ne ko neen.” (1 Piter 2:​21) Lale bwe ilo ien in, Peter ear konono, jab kin kijejeto in kwalok nan ak kabel eo an Jesus ñan katakin, ak kin eñtan eo an. Einwõt juõn ri kamol, Peter ear lukkun jelã kin joñan an kar Jesus mõnõnõ in eñtan bwe en kõttãik e ñan iroij bõtata eo an Jehovah im kamol bwe Satan ej juõn ri riap. Inem, ilo wãwen et ko, jemaroñ lore buñten neen Jesus? Jej aikwij kajitõkin kij make: ‘Ewi joñan aõ mõnõnõ in bõk eñtan bwe in rejetak im nebar iroij bõtata eo an Jehovah? Ij kwalok ke ikijen makitkit ko aõ im kijejeto eo aõ ilo jerbal in kwalok nan bwe rejetak iroij bõtata eo an Jehovah eaorõktata ibba?’​​—Dri Kolosse 3:​17.

14, 15. (a) Ewi wãwen Jesus ear emmakit ñan nan in jiroñ ko im menin lelok ko rejjab jimwe, im etke? (b) Ta aitwerõk eo jej aikwij likit ilo lemnak eo ad ien otemjej? (Kobaik uak ko jen box eo “Jutak ibben Jehovah.”)

¹⁴ Aolep ran, jej jelmae melejoñ ko im bebe ko, relap im redik. Ekijkan ad naj jelã wãwen ñan emmakit? Ñan wanjoñok, ñe jej jelmae juõn menin kabo me enaj kokkure kõtan eo ad ibben Jehovah einwõt juõn Ri Christian, ewi wãwen jej emmakit? Ke Peter ear jiroñ Jesus bwe en joij ñan emake, ewi wãwen Jesus ear emmakit? “Kwon ilok ilikiõ, Setan!” Jesus ear lamõj. “Kwo jab lemnok kin men ko an Anij, a kin men ko an armij rõn.” (Matu 16:​21-​23) Ak ñe ien ko remõn rej bellok ñan ad kalaplok ad mweie ak utiejlok ilo jikin jerbal eo ad me enaj jelet makitkit in Christian ko ad im kõtan eo ad  ibben Anij, jej ke emmakit einwõt kar Jesus? Ke Jesus ear kile bwe ro rar lo an kar kõmman men in bwilõñ ko “re kõnan itok im bõk E kin kajur, im kõmõn bwe En kiñ,” ear mõkaj an illok jen ir.​​—Jon 6:​15.

¹⁵ Etke Jesus ear emmakit ilo juõn wãwen ekajur ilo ien in im ien ko jet? Kinke ear kile bwe ewõr juõn men elaplok an aorõk jen an kar kejbãrok wõt mour eo an ak ta eo ear lemnak bwe enaj emõn ñan emake. Ear kõnan kõmanman ankil an Jemen im rejetak iroij bõtata eo an Jehovah jekdon ta. (Matu 26:​50-54) Inem, elañe aitwerõk eo kin iroij bõtata eo an Jehovah ejjab bed ilo lemnak eo ad ien otemjej, einwõt kar ibben Jesus, enaj wõr kauwatata eo ñan ad ebbururu ak likjap im kõmman men eo ejjab jimwe. Etke ej eindein? Kinke emaroñ bidodo ad bo ilo etao ko an Satan, eo ej lukkun kabel in kõmman bwe men eo enana en einwõt ñe emõn im kaitoktoklimo, einwõt ear kõmmane ke ear kabo Eve.​​—2 Dri Korint 11:14; 1 Timote 2:​14.

16. En ta mejenkajjik eo ad elaptata ñe jej jibañ ro jet?

¹⁶ Ilo jerbal in kwalok nan eo ad, jej kate ñan konono ibben armij ro kin inebata ko air im kwalok ñan ir uak ko an Bible eo. Men in ej juõn wãwen ebolemen ñan kaitoklimoiir ñan katak Bible eo. Bõtab, mejenkajjik eo ad elaptata ejjab ñan baj jibañ armij ro ñan jelã kin ta eo Bible ej ba ak ta jerammõn ko Ailiñ in Anij enaj bõktoki. Jej aikwij jibañ ir ñan melele kin aitwerõk eo kin iroij bõtata eo an Jehovah. Rej mõnõnõ ke ñan erom Ri Christian ro remol im inek alal in eñtan eo air im eñtan kin Ailiñ eo? (Mark 8:​34) Rebojak ke ñan kobalok ibben ro rej rejetak iroij bõtata eo an Jehovah im ilo wãwen in kamol bwe Satan ej juõn ri riap im juõn ri ruruwe? (Jabõn Kennan Ko 27:​11) Ej juõn jerammõn ñan ad jibañ kij make im ro jet ñan kõmman eindein.​​—1 Timote 4:​16.

Ñe Anij Ej Erom “Otemjej ilo Otemjej”

17, 18. Ta ien eo ekanuij emõn jemaroñ reimanlok kake elañe jej kwalok bwe jej rejetak iroij bõtata eo an Jehovah?

¹⁷ Ñe jej kõmman joñan wõt ad maroñ rainin ñan kwalok ikijen mwil ko mwilid im jerbal in kwalok nan eo ad bwe jej rejetak iroij bõtata eo an Jehovah, jemaroñ reimanlok ñan ien eo ñe Jesus Christ “ej lelok ailiñ ñõn Anij, aet, Jemen.” Ñããt eo men in enaj walok? Ri jilek Paul ear kamelele: “Ñe e naj emwij An kalotlok kajur otemjej an iroij rõn kab kieir im air maroñ otemjej. Bwe emõn En iroij ñõn ter eo emwij An likit ro otemjej rej kijirãt E iomin neen. . . . Ien eo Nejin e naj bareinwõt mõke kõtãik e ñõn Eo e ar kõtãik men otemjej ñõn E, bwe Anij en otemjej ilo otemjej.”​​—1 Dri Korint 15:​24, 25, 28.

¹⁸ Ñe Anij ej erom “otemjej ilo otemjej”​​—enaj juõn ien ekanuij emõn! Ailiñ eo enaj kar kõtõbrak mejenkajjik eo an. Aolep ri jumae ro an iroij bõtata eo an Jehovah renaj kar jako. Ainemõn im kon enaj kar bar jeblak ilujen ijoko otemjej ilañ im ilal. Ekkar ñan nan ko an ri jeje Sam, aolep menin kõmanman ko renaj al: “Komin lelok ñõn Jeova aibujuij ekar ñõn etan . . . Komin ba iben ro dri ailiñ ko, Jeova e Kiñ.”​​—Sam 96:​8, 10.

Kwomaroñ Ke Uak?

• Ewi wãwen Jesus ear kwalok bwe iroij bõtata eo an Anij ej aitwerõk eo elaptata?

• Ta eo elaptata an kar Jesus kõtõbrake ikijen jerbal in kwalok nan eo an im mij eo an?

• Ilo wãwen et ko jemaroñ lor joñok eo an Jesus ilo ad kwalok bwe jej rejetak iroij bõtata eo an Jehovah?

[Kajitõk ko ñan katak]

[Box/​Pija ilo page 11]

JUTAK IBBEN JEHOVAH

Einwõt elõñ brother ro ilo Korea im jikin ko jet rejelã, bwe ñe Ri Christian ro rej jelmae melejoñ ko relap, ej juõn men in jibañ ñan lemnak kin unin an walok melejoñ kein ñan ir.

“Men eo ear jibañ kim ñan kijenmij,” juõn ian Ri Kennan ro an Jehovah me ear bed ilo jikin kalbuj eo iumin iroij an Soviet ear ba, “kar juõn melele ealikar kin aitwerõk eo ear walok ilo jikin kallip in Eden​​—aitwerõk eo kin maroñ eo an Anij ñan iroij. . . . Kim kar jelã bwe ien eo emõn ear bellok ñan jutak ibben wãwen iroij eo an Jehovah. . . . Men in ear kakajur kim im kamaroñ kim ñan tiljek wõt.”

Bar juõn Ri Kennan ear kamelele kin ta eo ear jibañ e im Ri Kennan ro mõttan ilo jikin kalbuj eo ijo rar iun ir ñan kõmman jerbal ko rekanuij bin. “Jehovah ear rejetake kim,” ear ba. “Meñe ekanuij lap an kar bin wãwen ko, kim kar ekkõl wõt ñan kejbãrok bwe kõtan eo am ibben Jehovah en kajur. Kim kar rejañ don kin am kakememej don bwe kim kar jutak ibben Jehovah kin aitwerõk eo kin iroij bõtata eo an ijoko otemjej.”

[Pija ilo page 8]

Ewi wãwen Jesus ear rejetak iroij bõtata eo an Jehovah ke Satan ear kajeoñ in kabo e?

[Pija ilo page 10]

Mij eo an Jesus ear kõtõbrak ta?