Ta men eo em̦m̦antata kwõmaroñ lel̦o̦k ñan ajri ro nejũm̦? Elõñ men ko ajri ro rej aikuji. Rej aikuj an jemãer im jineer tõl im kõjparok er kab yokwe er. Bõtab, ewõr juon men me el̦apl̦o̦k an aorõk im kwõmaroñ kõm̦m̦ane ñan ro nejũm̦. Ta in? Ej ilo am̦ katakin er bwe ren jel̦ã kõn Jeova im katak ko rem̦ool ilo Baibõl̦. (Jon 17:3) Men in enaaj jipañ er ñan yokwe Jeova im renaaj kõn̦aan karejar ñane jãn ke rej dik wõt.​—Matu 21:16.

Elõñ rũtto ro rej kile bwe el̦aptata an ajri ro nejier bõk tokjãn ñe ej kadu katak ko rej lil̦o̦k. Kõn men in, jelukkuun m̦õn̦õn̦õ kõn bok in etan, Ij Katak Baibõl̦. Katak ko ilo bok in relukkuun pidodo ñan katakin ajri ro, el̦aptata ñan ajri ro jilu aer iiõ im lal̦l̦o̦k. Ewõr pija ko im jeje ko iturin wõt pija ko. Ebar wõr men ko jet kar likũti ilo bok in me ro jemãn im jinen ajri ro remaroñ bar kõm̦m̦ani ippãn ajri ro nejier. Jouj im keememej bwe bok in ejjab kein an ajri ro iukkure ak ej kein aer katak. Kar kõm̦m̦ane bwe kwõn maroñ riitl̦o̦k ñan ajri ro nejũm̦ im bwe kom̦win maroñ bwebwenato ippãn doon.

Kõmij tõmak bwe bok in enaaj jipañ kom̦ rũtto ro ñan jino katakin ajri ro nejimi kõn Baibõl̦ jãn ke rej dik wõt.​—2 Timote 3:14, 15.

Jãn ro jeimi im jatimi,

Kumi eo Ej Lale Aolep Eklejia ko an Ri Kõnnaan ro an Jeova