Rebeka kar juon kõrã me ej yokwe Jeova. Etan kar l̦eo ippãn in Aisak. Aisak ear bar yokwe Jeova. Rebeka ear bõk ia l̦eo ippãn? Elemen an kar Rebeka kwal̦o̦k bwe ekõn̦aan pokake Jeova? Eokwe, jen katak m̦okta kõn l̦eo ippãn Rebeka.

Etan jinen im jemãn Aisak in Sera im Ebream, rar jokwe ilo Kenean. Armej in Kenean rar jab kabuñ ñan Jeova. Eñin unin, Ebream ear kõn̦aan bwe l̦addik eo nejin en m̦areiki juon kõrã me ej kabuñ ñan Jeova. Im ear ba bwe juon iaan ri jerbal ro an en etal im pukot juon ippãn Aisak ilo Heran, ijo me jet iaan armej ro nukũn Ebream rar jokwe ie. Bõlen Iliezar eo Ebream ear kõjerbale.

Iliezar ear etal ippãn ri jerbal ro jet an Ebream. Ear lukkuun ettol̦o̦k ijo rar etal ñane. Rar likũt m̦õñã ko kijeer im menin lel̦o̦k ko aer ioon kamel̦ ko joñoul rar bõki. Elemen an nãj Iliezar jel̦ã wõn jiroñ eo en kar kããlõte bwe en ippãn Aisak? Ke Iliezar im ri jerbal ro jet rar tõpar Heran rar bõjrak turin juon aebõj lal̦. Etke? Kõnke Iliezar ejel̦ã bwe armej renãj itok im etteiñ dãn ijo. Iliezar ear jar ñan Jeova im ba: ‘Ñe inaaj kajjitõk ippãn juon jiroñ bwe en letok lim̦õ dãn, im eletok lim̦õ im bõktok limen kamel̦ kã nejũ, inaaj jel̦ã bwe jiroñ eo in kwõj kããlõte.’

 Rebeka ear itok ñan aebõj lal̦ eo. Baibõl̦ ej ba bwe Rebeka elukkuun deo̦ im em̦m̦an mejãn. Iliezar ear kajjitõk limen im ear ba: ‘Aet em̦m̦an. Inaaj lewaj lim̦õm̦ im bõktok limen kamel̦ kan̦i nejũm̦.’ Ñe kamel̦ ko rej maro, elukkuun l̦ap aer daak. Eñin unin, Rebeka ear aikuj etal im etteiñtok jãn aebõj lal̦ eo bwijin kõttan. Kwõj ke loe an Rebeka lukkuun poub ilo pija in?— Iliezar ear bwilõñ kõn an kar Jeova uwaake jar eo an.

Iliezar ear lel̦o̦k bwijin m̦weien Rebeka men ko reaiboojoj. Rebeka ear ba Iliezar im ri jerbal ro jet ren etal ippãn ñan m̦weo m̦õn. Im Iliezar ear kwal̦o̦k etke Ebream ear ba en itok ñan ijin. Im ear bar ba kõn an kar Jeova uwaake jar eo an. Ekar em̦m̦an ippãn baam̦le eo an Rebeka ñe em̦areiki Aisak.

Rebeka ekõn̦aan ke kar m̦areiki Aisak?— Rebeka ejel̦ã bwe Jeova eo ear kõm̦m̦an bwe Iliezar en itok ñan ijin. Im ke baam̦le eo an Rebeka rar kajjitõk ippãn ekõn̦aan ke etal ñan Kenean im m̦areiki Aisak, Rebeka ear ba: ‘Aet, ikõn̦aan etal.’ Im ear kajju etal ippãn Iliezar. Ke rar tõpar Kenean, ear m̦areiki Aisak.

Jeova ear kajeraam̦m̦an Rebeka kõnke ear pokake E. Ta jeraam̦m̦an eo? Eokwe, elõñ iiõ tokãlik ke Jijej ear l̦otak, ear itok jãn baam̦le eo an Rebeka! Jeova enaaj bar kajeraam̦m̦an kwe ñe kwõj pokake e ãinwõt kar Rebeka.