Setan im enjel̦ ro doon rar baj nana im lãj wõt jãn jem̦aan. Ilo kar iien ko etto, Setan ear m̦an ri jerbal ro an Job im menninmour ko nejin. Job ear juon ri karejar etiljek an Anij. Tokãlik, Setan ear m̦an ajri ro joñoul nejin Job ilo an kar kõm̦m̦an bwe “juon kõto el̦ap” en itok im ko̦kkure m̦weo rar pãd ie. Ãlikin men in, Setan ear kõm̦m̦an bwe Job en wõt “jãn lo̦piden neen ñan mo̦ñin.”​—Job 1:7-19; 2:7.

Ilo raan ko an Jijej, enjel̦ ro renana rar kõm̦m̦an bwe jet armej ren pilo im jaje kõnnaan. * (Matu 9:32, 33; 12:22) Rar kaeñtaan juon em̦m̦aan im kõm̦m̦an bwe en m̦wijit ãnbwinnin make kõn dekã. (Mark 5:5) Bareinwõt, rar kõm̦m̦an bwe juon l̦addik en lam̦õj, im rar patõke ñan lal̦ im kõm̦m̦an bwe en dũbũbbũb.​—Luk 9:42.

Rainin, el̦apl̦o̦k an Setan im enjel̦ ro an lãj im nana. Ej lõñl̦o̦k wõt men ko renana rej kõm̦m̦ani jãn iien eo kar jolal̦tak er jãn lañ. Nuuj ko rej wal̦o̦k ipel̦aakin lal̦ in  rej kam̦ool aer lukkuun nana. Rej kajorrããn jet armej ikijjeen nañinmej ko. Rej ko̦kkure aer kiki in boñ im kõm̦m̦an bwe ren ettõn̦ak kõn tõn̦ak ko rekaabwinmakeke. Rej kabn̦õn̦õik armej ro ilo aer jojoon er ak kajjioñ babu ak pãd ippãer. Bareinwõt, rej kõm̦m̦an bwe elõñ armej ren bwebwe im ren make bõk mour ko aer.

Juon kõrã in South Amedka etan Lintina, ear ba bwe juon enjel̦ enana ak jetõb ettoon ear m̦an 16 iaan baam̦le eo an. Enjel̦ in enana ear bar kõm̦m̦an bwe en tõn bwebwe im ear kõmetak im kaeñtaane ium̦win 18 iiõ. Kõnke men in ear lukkuun wal̦o̦k ñan Lintina, ear kile im ba bwe jetõb ettoon ko relukkuun “m̦õn̦õn̦õ in ko̦kkure armej ro ñan ñe remej.”

Bõtab, ewõr an Jeova maroñ ñan kõjparok armej ro an jãn Setan im enjel̦ ro renana.​—Jabõn Kõnnaan 18:10.