Baibõl̦ ej ba bwe Setan ej “m̦on̦e aolepen lal̦.” (Revelesõn 12:9) Setan im enjel̦ ro renana rejjab kõn̦aan bwe jen tõmake Naan in Anij ak Baibõl̦ eo. Rej kajjioñ kõm̦m̦an bwe armej ro ren tõmak bwe ñe juon armej ej mej, ewõr juon jetõb ak aan me ej weaakl̦o̦k jãne im mour m̦aanl̦o̦k wõt. Jen lale ewi wãween an Setan im enjel̦ rein renana kõm̦m̦ane men in.

Elõñ kabuñ rej katakin bwe kajjojo armej ewõr juon jetõb ak aan ilowaaer me enaaj mour m̦aanl̦o̦k wõt ãlikin aer mej. Rej ba bwe ñe juon armej ej mej, jitũbõn ak añin armej eo ej ilo̦k ñan ijo jikin ri mej.

Naan in Anij ejjab katakin armej ro kõn men in. Ñan waanjoñak, ilo iien eo kar kõm̦anm̦an Adam, Baibõl̦ ej ba: “Irooj Anij ear bõk jidik m̦õttan bwidej jãn lal̦ im kõm̦m̦ane juon em̦m̦aan kake. Ear uuk bo̦o̦tin kõn kũtuon mour im l̦eo ear mour.”  (Jenesis 2:7, UBS) Ke Anij ear kõm̦anm̦an Adam, ear jab lel̦o̦k juon jitũbõn ak añin.

Baibõl̦ ej kwal̦o̦k bwe ñe juon armej ej mej, ejjel̦o̦k juon jetõb ak aan me ej weaakl̦o̦k jãne im mour m̦aanl̦o̦k wõt. Kõnke armej in emej, ejjab maroñ jipañ ak ko̦kkure ro jet. Erkein ej jet iaan mel̦el̦e ko jãn Baibõl̦:

• “Kom̦win jab mijak ñe juon armej ej m̦weiiel̦o̦k, ñe m̦weiuk ko m̦weien rej lõñl̦o̦k im orl̦o̦k; Ñe emej, ejjab maroñ amãni. Men ko m̦weien reban ilo̦k ippãn ñan lõb eo libõn.”​—Sam 49:16, 17, UBS.

• “Ro remour rejel̦ã bwe renaaj mej; a ro remej ejjel̦o̦k aer jel̦ã, im ebar ejjel̦o̦k menin lel̦o̦k ñan er; rejjab ememej er. Jabdewõt eo peim̦ ej loe bwe en kõm̦m̦ane, kwõn kõm̦m̦ane kõn am̦ maroñ; bwe ejjel̦o̦k jerbal, ak menin l̦õmn̦ak, ak jel̦ã, ak mãlõtlõt, ilo Sheol [lõb], ijo kwõj ilo̦k ñane.”​—Ekklisiastis 9:5, 10.

El̦aññe kwõnaaj riiti aolepen Baibõl̦, ejjel̦o̦k juon eoon ej ba bwe ñe juon armej ej mej, jetõbin ak añin ej weaakl̦o̦k jãne im mour m̦aanl̦o̦k wõt. Katak im mel̦el̦e in ejjab itok jãn Baibõl̦. Ej juon katak im mel̦el̦e me ej itok  jãn Setan im enjel̦ ro an renana. Jeova elukkuun dike aolep katak ko reriab me kabuñ ko rej katakin armej kaki.​—Jabõn Kõnnaan 6:16-19; 1 Timote 4:1, 2, UBS.

Bar juon wãween Setan ej m̦on̦e armej ro ej ikijjeen ri anijnij im ri bubu ro. Armej rein remaroñ kajju kõnnaan ippãn jetõb ro ak ebbõk aer mel̦el̦e ippãer. Elõñ armej ekoba ri anijnij im ri bubu rein, rej tõmak bwe ennaan ak mel̦el̦e ko rej bũki rej itok jãn armej ro me rar mej. Bõtab, ejjab m̦ool men in ekkar ñan Baibõl̦ eo.​—Ekklisiastis 9:5, 6, 10.

Innem, mel̦el̦e ko me armej rein rej bũki rej itok jãn ia? Jãn ippãn enjel̦ ro renana. Enjel̦ ro renana rej lukkuun etale im lale men ko juon armej ej kõm̦m̦ani ilo iien eo ej mour. Rejel̦ã kõn ainikien armej eo, jekjekin, men ko ej kõm̦m̦ani, im men ko ejel̦ã kaki. Kõn men in, ñe armej eo ej mej, epidodo aer arin ri mej eo im wal̦o̦kl̦o̦k ñan armej ro.​—1 Samuel 28:3-19.

Bar juon wãween Setan ej m̦on̦e armej ro ej ikijjeen bwebwenato ko reriab. Ekkã an bwebwenato rot kein ukot l̦õmn̦ak ko an armej ro bwe ren jab jel̦ã im tõmaki katak ko rem̦ool jãn Baibõl̦.​—2 Timote 4:4.

 Ilo Africa, elõñ bwebwenato ko kõn an armej ro loe armej ro me rar mej. Ekkã aer loe rein me rar mej ilo jikin ko rettol̦o̦k jãn ijoko rar jokwe ie ke rar mour. Bõtab, jouj im kajjitõk ippam̦ make, ‘El̦aññe armej in ewõr an maroñ ñan bar mour ãlikin an mej, etke ejaam̦ ilo̦k im pãd ettol̦o̦k jãn baam̦le eo an im ro m̦õttan?’

Bareinwõt, jet iien armej rej l̦õmn̦ak bwe rej loe ro rar mej, bõtab ilo m̦ool eoktak armej ro. Rej l̦õmn̦ak ãindein kõnke ejjel̦o̦k oktak jekjekin im turin mejãn armej rein jãn armej ro rar mej. Ñan waanjoñak, ruo em̦m̦aan rar kwal̦o̦k naan ilo juon jikin im rar kile bwe juon l̦al̦l̦ap eto an l̦oore erro. Ke rar kepaake l̦al̦l̦ap in, rar kile bwe l̦al̦l̦ap in ear l̦õmn̦ak bwe juon iaan ri kwal̦o̦k rein ej l̦eo jein me ear mej jejjo iiõ ko remootl̦o̦k. Ebõd mel̦el̦e eo an l̦al̦l̦ap in ak ear lukkuun tõmak wõt bwe emour l̦eo jein. Kõn men in, l̦al̦l̦ap in ear ilo̦k im ba ñan ro m̦õttan im armej ro ilo bukwõn eo an bwe ear loe l̦eo jein!

Ejjel̦o̦k pere bwe em̦õj am̦ roñ an armej ro bwebwenato  im ba bwe rar loe ro rar mej, roñ ainikier, ak ettõn̦ak kake er. Ñe ej wal̦o̦k men kein ñan armej rein, ekkã aer lukkuun abwinmake. Ñan waanjoñak, juon kõrã etan Marein ilo Africa ekkã an roñ an jibwin kũri in boñ. Kõn an Marein abwinmake, ekkã an ellam̦õjm̦õj in boñ im karuji ro ilo m̦weo im̦õn. Ejjabto, kõrã in ear oktak im jino an bwebwe.

El̦aññe ro remej rej mour wõt, kwõl̦ak lale renaaj ke kar kõn̦aan kamijak ak ko̦kkure ro me rej yokwe er? Reban kar. Ak wõn ro rej kõm̦m̦ani men kein? Enjel̦ ro renana.

Ak ta kõn ro me rej ba bwe ro remej rar wal̦o̦kl̦o̦k ñan er im jipañ er ak kaenõm̦m̦an er? Ñan waanjoñak, juon kõrã in Africa etan Gbassay ear nañinmej. Juon iien jemãn ear wal̦o̦kl̦o̦k ñane ilo juon ettõn̦ak. Jemãn ear ba bwe en etal im bok juon bõlõk jãn juon kain wõjke im kãreiki ippãn aebõj im ilimi. Ear bareinwõt jiroñe bwe en jab kõnnaan ippãn jabdewõt armej m̦okta jãn an kõm̦m̦ane men in. Kõrã in ear kõm̦m̦ane men kein im ear mour. Ãindein bareinwõt ilo M̦ajel̦ in. Jet armej rej kõm̦m̦an aer uno ãlikin an kar juon jetõb wal̦o̦kl̦o̦k ñan er im kwal̦o̦k ta ko ren kõm̦m̦ani.

Bar juon kõrã ej ba bwe juon boñ, l̦eo ippãn me ear mej ear  wal̦o̦kl̦o̦k ñane. Kõrã in ej ba bwe elukkuun kar erreo im em̦m̦an nuknuk ko an l̦eo ippãn.

Men kein me armej rein rej loi ak ettõn̦ak kaki remaroñ jipañ im kaenõm̦m̦an er. Bõtab, men kein rej ke itok jãn Anij? Rejjab, kõnke Jeova ej “Anij in m̦ool.” (Sam 31:5) Jeova eban m̦on̦e ak tõlpiloik kõj. Enjel̦ ro wõt renana rej kõm̦m̦ani men kein.

Aolep enjel̦ ro renana relukkuun etao. Meñe armej ro remaroñ l̦õmn̦ak bwe rej jipañ er, bõtab aoleper relukkuun nana. Ke Tepil̦ ear kõnnaan ippãn Iv, ear jouj ilo an kõnnaan. (Jenesis 3:1) Bõtab, ta eo ear wal̦o̦k ñan Iv ke ear roñjake im l̦oore ta ko Setan ear ba? Iv ear mej.

Ekkã an ri nana ro jouj etao ñe rekõn̦aan m̦on̦e ak ko̦kkure armej ro. Ãindein Setan. Baibõl̦ ej ba bwe Setan emaroñ make kõm̦m̦an bwe en ãinwõt juon “enjel̦ in meram.”​—2 Korint 11:14.

Anij ej kõjerbale Baibõl̦ eo ñan jipañ im tõl armej ro. Ejako an kõjerbale ettõn̦ak ko, visõn ko, ak ainikien ko ñan kõm̦m̦ane men in. Baibõl̦ emaroñ jipañ armej ro bwe ren maroñ “kõm̦m̦ani aolep kain jerbal ko rem̦m̦an.”​—2 Timote 3:17, UBS.

Jeova ej yokwe kõj im eñin unin ej kakkõl kõj kõn kõm̦m̦an ko retao an Tepil̦ eo. Anij ejel̦ã bwe enjel̦ ro renana relukkuun kauwõtata im rej kõjdate kõj.