Etke el̦ap an Setan im enjel̦ ro renana kate er ñan kapo armej ro? Kõnke rekõn̦aan bwe jen kobal̦o̦k ippãer im jum̦ae Anij. Rekõn̦aan bwe jen kabuñ ñan er. Im rekõn̦aan bwe jen tõmaki katak ko aer reriab im kõm̦m̦ani men ko me Jeova ediki. Elõñ iaan men kein Jeova ediki rej kitibuj m̦anit ko me armej ro rej kõm̦m̦ani ñe ej wõr mej.

El̦ap ad bũrom̦õj ñe ej mej juon eo ejitõnbõro ippãd. Jej bũrom̦õj kõnke ãindein kõj armej. Jijej ear bũrom̦õj im “jañ” ke Lazerõs, juon eo epaake, ear mej.​—Jon 11:35.

Elõñ kain m̦anit ko ipel̦aakin lal̦ in me armej ro rej kõm̦m̦ani ñe ej wõr mej. Elõñ iaan m̦anit kein rejjab n̦ae ta ko Baibõl̦ ej ba. Bõtab, jet iaan m̦anit kein rar jebar im wal̦o̦ktok jãn l̦õmn̦ak eo bwe ro remej rejjab lukkuun mej im remaroñ loe ta ko armej ro remour rej kõm̦m̦ani. El̦ap an armej ro mijake ro remej. Eñin unin elõñ armej rej emmej in boñ ñe ej wõr mej, l̦e jãn joñan aer bũrom̦õj, im kõm̦m̦an bwe en lukkuun l̦ap im l̦e jãn joñan m̦akũtkũt ko ilo iien mej ko. Bõtab, Baibõl̦ ej ba bwe “ro remej ejjel̦o̦k aer jel̦ã.” Kõn men in, armej ro me rej kõm̦m̦ani m̦anit kein  rej kowõnm̦aanl̦o̦k katak ko reriab an Setan.​—Ekklisiastis 9:5.

Ebar wõr m̦anit ko jet me rej jebar im wal̦o̦ktok jãn tõmak eo bwe ro remej rej aikuj jipañ jãn armej ro remour im bwe renaaj kajorrããn armej ro el̦aññe rejjab l̦oori kõn̦aan ko aer. Ñan waanjoñak, elõñ armej rej bõk kun̦aaer ilo eoreak. Etke? Kõnke rej ba bwe ãlikin jilu ak jiljino raan jãn iien eo kar kalibwini ri mej eo, rej aikuj eoreake kõnke eñin ej iien eo me añin armej in ej weaakl̦o̦k ñan lañ. Bar jet armej rej katoke ri mej ro ilo aer ebbõkl̦o̦k m̦õñã im dãn ak men ko jet ñan wũliej ko.

Men kein armej ro rej kõm̦m̦ani rebõd kõnke rej kowõnm̦aanl̦o̦k katak ko reriab an Setan kõn ro remej. Jeova ej ke m̦õn̦õn̦õ ñe jej kõm̦m̦ani m̦anit ko me rej jebar im wal̦o̦ktok jãn katak im mel̦el̦e ko an enjel̦ ro renana? Ejjab!​—2 Korint 6:14-18, UBS.

Ri karejar ro rem̦ool an Anij rejjab bõk kun̦aaer ilo m̦anit ak imminene ko me rej rejetake katak ko reriab an Setan. Bõtab, rej kwal̦o̦k aer yokwe armej ro ilo  aer kaenõm̦m̦an er ñe ej wõr mej. Rejel̦ã bwe Jeova wõt emaroñ jipañe armej ro remej.​—Job 14:14, 15.

Jet armej rej bõk jipañ jãn jetõb ettoon ko. Rej kõm̦m̦ane men in ikijjeen anijnij, ekkõpãl, kaulibobo, jal̦jal̦, bubu, kajjetõbtõb im men ko ãierl̦o̦kwõt.

Anij edike men kein. Baibõl̦ ej ba: “Ren jab lo ippam̦ jabdewõt eo ej kõm̦m̦an bwe nejin m̦aan ak kõrã en deblo̦k kijeek, ak juon ej bubu, ak juon ej m̦adm̦õd, ak juon ej rũkaanij, ak juon rijo̦ubwe, ak juon ej pepe ippãn ri ekkõpãl, ri rojak, ri anijnij, ak eo ej kõm̦m̦ao ippãn ro remej. Bwe jabdewõt eo ej kõm̦m̦an men rot kein, ej menin jõjõik ñan Jeova.”​—Duteronomi 18:10-12.

Etke el̦ap an Jeova kakkõl kõj kõn m̦anit kein?

Jeova ej kakkõl kõj kõnke ejjab kõn̦aan bwe jen jorrããn. El̦ap an yokwe im kaorõk armej ro im  ejel̦ã bwe ro rej kõm̦m̦ani m̦anit kein renaaj jorrããn jãn Setan im enjel̦ ro an renana.

Ñan waanjoñak, juon kõrã in South Amedka etan Nilda ear bõk kun̦aan ilo m̦anit kein. Enjel̦ ro renana rar lukkuun kõm̦m̦an bwe en jorrããn kõrã in. Kõrã in ej ba: “Jetõb ettoon ko rar . . . mo̦k ilowaan ãnbwinnũ, im irooj ioon mour e aõ. Elõñ iien ij kile an wal̦o̦k men kein ñan ña, ak bar jet iien ijaje ke euwe jetõb ettoon ippa, im iar bar aikuj del̦o̦ñ ilo aujpitõl̦ ko an ro me ejorrããn kõmãlij ko aer. Joñan an l̦ap an jetõb ettoon ko kaeñtaan ña, iar jaje aenõm̦m̦an. Iar jino idaaki uno in kiki ko im jino aõ kadek im kõbaatat aolep iien. Eto an kar ãindein wãween mour eo aõ.”

Tokãlik, kõn jipañ eo jãn Jeova im ri karejar ro an, ear bõjrak an enjel̦ ro renana kaeñtaan Nilda. Kiiõ, el̦ap an aenõm̦m̦an im jokwane ilo an mour. Ej ba: “Ij rõjañ aolep armej bwe ren jab bõk kun̦aaer ñan jidik ilo m̦anit ko me rej jãn jetõb ettoon ko.”