Ejjel̦o̦k! Ñe juon armej ej mej, elõñ armej rej l̦õmn̦ak bwe ewõr juon jetõb ak aan me ej weaakl̦o̦k jãne im mour m̦aanl̦o̦k wõt. Bõtab, ejjab m̦ool men in. Etke jejel̦ã? Kõnke Baibõl̦ ej ba. Baibõl̦ ej juon bok em̦ool im ej itok jãn Anij eo em̦ool etan Jeova. Jeova ear kõm̦anm̦an armej ro, im ejel̦ã ta eo ej wal̦o̦k ñan er ñe rej mej.​—Sam 83:18; 2 Timote 3:16.

Baibõl̦ ej ba bwe Anij ear kõm̦anm̦an Adam, armej eo m̦oktata “jãn bũñal in ãne.” (Jenesis 2:7) Anij ear likũt Adam ilo Pedetaij eo ilo jikin kallib in Iden. Ñe Adam en kar pokake kien eo an Jeova, eban kar mej. Enaaj kar mour wõt ñan rainin. Bõtab, Adam ear rupe kien eo an Anij meñe ear jel̦ã kake. Kõn men in, Anij ear ba ñan e: “[Kwõnaaj] jepl̦aak ñan bwidej [ak bũñal], bwe ar bõk eok jãne; bwe bwidej kwe, im ñan bwidej kwõnaaj jepl̦aak.”​—Jenesis 3:19.

Ta mel̦el̦ein men in? Eokwe, baj l̦õmn̦ak m̦õk kõn men in: Adam ear pãd ia m̦okta jãn an kar Jeova ejaake jãn bũñal? Ejjel̦o̦k. Ear jab juon enjel̦ ilañ m̦okta jãn an kar Jeova kõm̦anm̦ane. Innem ke Jeova ear ba bwe Adam enaaj kar “jepl̦aak ñan bwidej,” mel̦el̦ein men in bwe Adam enaaj kar mej. Adam ear jab erom juon jetõb ãlikin an kar mej. Ke ear mej, ear jako. Ãindein, ñe juon armej ej mej, emej im ejjab mour m̦aanl̦o̦k wõt.

 Ak ta kõn ro jet me rar mej? Rej ke mour m̦aanl̦o̦k wõt? Baibõl̦ ej uwaak:

• “Er otemjej [armej im menninmour jim̦or] rej ilo̦k ñan juon jikin; er otemjej jãn bũñal, im er otemjej rej bar oktak ñan bũñal.”​—Ekklisiastis 3:20.

• “Ro remej ejjel̦o̦k aer jel̦ã.”​—Ekklisiastis 9:5.

• “Aer yokwe, im bareinwõt aer kõjdat im ebbanban, rejako etto.”​—Ekklisiastis 9:6.

• “Ejjel̦o̦k jerbal, ak menin l̦õmn̦ak, ak jel̦ã, ak mãlõtlõt, ilo Sheol [lõb], ijo kwõj ilo̦k ñane.”​—Ekklisiastis 9:10.

Epen ke am̦ tõmak naan kein? El̦aññe aet, eokwe jouj im l̦õmn̦ak kõn men in. Ekkã an em̦m̦aan ro kate er jerbal bwe en wõr aer jããn ñan kabwe aikuj ko an baam̦le ko aer. Ñe juon em̦m̦aan ilo juon baam̦le ej mej, ekkã an baam̦le eo an iioon apañ ko. Jet iien kõrã  eo pãleen im ajri ro nejin rej kwõle kõnke ejabwe aer jããn ñan wia kijeer m̦õñã. Bõlen armej ro me rar dike em̦m̦aan eo rej kiiõ nana aer kõm̦m̦an ñan kõrã eo pãleen im ajri ro nejin. Kiiõ kajjitõk ippam̦ make: ‘Ñe ewõr jitũbõn ak añin em̦m̦aan eo im ej mour m̦aanl̦o̦k wõt ãlikin an mej, etke ejjab wõnm̦aanl̦o̦k im kabwe aikuj ko an baam̦le eo an? Etke ejjab kõjparok baam̦le eo an jãn armej ro renana?’ Eokwe, unin an jab maroñ kõm̦m̦ani men kein ej kõnke emej im ejjel̦o̦k men en̦ ejel̦ã kake. Jej loe an jejjet im jim̦we ta eo Baibõl̦ ej ba kõn men in.​—Sam 6:5.

Mel̦el̦ein ke men in bwe ro remej reban bar mour? Ejjab. Tokãlik jenaaj etale kõn an armej ro naaj jerkak im bar mour. Bõtab, ilo iien eo me juon armej ej mej, ejjel̦o̦k men en̦ ejel̦ã. Mel̦el̦ein men in bwe rejaje ta ko kwõj kõm̦m̦ani kõnke rejjab maroñ lo eok, roñ ainikiõm̦, im kõnnaan waj ñan kwe. Kwõjjab aikuj in mijak er. Rejjab maroñ jipañ eok, im rejjab maroñ kajorrããn eok.​—Ekklisiastis 9:5, 6, 10.