Aolep enjel̦ ro Jeova ear kõm̦anm̦ani rar em̦m̦an. Bõtab, tokãlik juon iaan enjel̦ ro ear oktak im nana. Etan enjel̦ in ej Setan Tepil̦. Setan ear kõn̦aan bwe armej ro ilo lal̦ in ren kabuñ ñan e im jab ñan Jeova. Jen lale ta eo ear wal̦o̦k.

Ilo jikin kallib in Iden, elukkuun kar lõñ wõjke ko me ekanooj enno̦ leer. Jeova ear ba ñan Adam im kõrã eo ippãn etan Iv bwe remaroñ m̦õñã jãn jabdewõt iaan wõjke kein. Bõtab, ear wõr wõt juon wõjke me Anij ear jiroñ erro bwe ren jab m̦õñã jãne. Ear ba bwe el̦aññe renaaj m̦õñã jãne, erro naaj mej otem mej.​—Jenesis 2:9, 16, 17.

Juon raan Iv ear make iaan ke juon jedpãnit ak snake ear wal̦o̦k im kõnnaan ippãn. Ilo m̦ool, snake ko rejaje kõnnaan. Bõtab, Setan Tepil̦ ear kõm̦m̦an bwe snake in en kõnono ñan Iv. Ear jiroñ Iv bwe enaaj mãlõtlõt ãinwõt Anij el̦aññe enaaj m̦õñã jãn wõjke eo me Anij ear ba ren jab m̦õñã jãne. Setan ear bar ba ñan Iv bwe eban mej ñe enaaj kõm̦m̦ane men in. Men kein Setan ear ba reriab. Meñe ãindein, ak Iv ear tõmake im ear m̦õñã jãn leen wõjke eo. Tokãlik, ear lel̦o̦k kijen Adam im e bareinwõt ear m̦õñã.​—Jenesis 3:1-6.

Jej katak jãn bwebwenato in em̦ool bwe Setan ej juon ri jum̦ae im juon ri riab. Ear ba ñan Iv bwe eban mej el̦aññe ejjab pokake Anij. Setan ear riab kõnke Iv im Adam rar mej. Bõtab, Setan ear jab mej ilo tõre eo wõt, ak m̦õttan jidik enaaj  mej kõnke ear jerawiwi n̦ae Anij. Ilo tõre in, ej mour wõt im ej wõnm̦aanl̦o̦k wõt ilo an m̦on̦e armej ro. Ej juon ri riab im ej kajjioñ kapo armej ro bwe ren rupe kien ko an Anij.​—Jon 8:44.

Tokãlik, jet iaan enjel̦ ro rar oktak im nana. Enjel̦ rein rar lo kõrã ro redeo̦ ioon lal̦ in im rar kõn̦aan babu ak pãd ippãer. Kõn men in, rar itok ñan lal̦ in im ukõt m̦õraer ñan ãnbwinnin em̦m̦aan ro. Innem, rar bõk kõrã ro bwe ren pãleer. Men in rar kõm̦m̦ane ear jum̦ae karõk eo an Anij ñan er.​—Jenesis 6:1, 2; Jud 6, UBS.

Elõñ jorrããn ko rar wal̦o̦k ilo lal̦ in jãn wõt men in enjel̦ rein rar kõm̦m̦ane. Kõrã ro pãleen enjel̦ rein rar keotak nejier, bõtab ajri ro rar lukkuun oktak jãn ajri ro jet. Rar rũttol̦o̦k im erom ri ineea ro me rar lukkuun nana im lãj. Ejjabto tokãlik, Jeova ear loe bwe lal̦ in ear lukkuun obrak kõn kowadoñ. Joñan an lukkuun kar nana, Jeova ear pepe in ko̦kkure aolep armej ro renana kõn juon ibwijleplep. Noa im baam̦le eo an wõt rar el̦l̦ã im mour jãn Ibwijleplep eo kõnke rar pokake Anij.​—Jenesis 6:4, 11; 7:23.

Enjel̦ ro renana rar bar jepl̦aak ñan lañ ãlikin aer kar pãd ioon lal̦. Rar jab mej, bõtab Anij ear kajeik er. Rar jab maroñ bar kobal̦o̦k ippãn enjel̦ ro me rar tiljek ñan Anij. Bareinwõt,  Jeova ear jab bar kõtl̦o̦k bwe ren ukot m̦õraer ñan ãnbwinnin armej. Im m̦õttan jidik renaaj mej ilo iien ekajet eo el̦ap.​—Jud 6, UBS.

Ilo iiõ eo 1914, ear wal̦o̦k juon tarin̦ae ilañ. Bok in Revelesõn ej kwal̦o̦k ta eo ear wal̦o̦k. Ej ba: “Im rar tarin̦ae ilo lañ, Maikõl [Jijej Kũraij ãlikin an jerkakpeje] im enjel̦ ro an [rem̦m̦an] rar tarin̦aek tũrãikõn eo [Setan]; im tũrãikõn ear tarin̦ae im enjel̦ ro [renana] ippãn, im rar jab anjo̦, im rar jab bar lo jikier ilo lañ. Im rar jol̦o̦k tũrãikõn eo el̦ap, jedpãnit erũtto, n̦aetan tepil̦ im Setan, eo ej m̦on̦e aolepen lal̦, em̦õj jol̦o̦ke ñan lal̦, im em̦õj jol̦o̦k enjel̦ ro an [renana] n̦a ippãn.”

Ta eo ear wal̦o̦k ãlikin men in? Baibõl̦ eo ej wõnm̦aanl̦o̦k im ba: “Kõn men in kom̦win lañlõñ, O lañ ko, im kom̦ eo kom̦ij jokwe ilowaaer.” Enjel̦ ro rem̦m̦an rar m̦õn̦õn̦õ kõnke Setan im enjel̦ ro renana rejako jãn lañ. Ak ta kõn armej ro ioon lal̦ in? Baibõl̦ ej ba: “Wo ñan ãne im lo̦meto, bwe tepil̦ ear wanlal̦wõj ñan kom̦, im el̦ap an illu, bwe ejel̦ã jidik wõt iien ippãn.”​—Revelesõn 12:7-9, 12.

Setan im enjel̦ ro an renana rej m̦on̦e armej ro im kõm̦m̦an bwe en l̦ap jorrããn im poktak ko ilo lal̦ in. Aolep enjel̦ rein renana rej kõjdate Anij im aolep men ko rej kõm̦m̦ani renana.