ILO bokin Revelesõn, ekkã an kõjerbal jet naanin kõkkar ko me rem̦wilal̦ mel̦el̦eier. Ñan waanjoñak, ej kõnono kõn juon kõrã ekijoñ me em̦õj je ãt in “Babil̦on El̦ap” ioon dem̦an. Bokin Revelesõn ej ba bwe kõrã in ej jijet ‘ioon aelõñ ko im jarin armej ro.’ (Revelesõn 17:1, 5, 15) Kõnke ejjel̦o̦k juon kõrã emaroñ lukkuun kõm̦m̦ane men in, ealikkar bwe Babil̦on El̦ap ej juon naanin kõkkar. Innem kõrã in ekijoñ me etan in Babil̦on El̦ap, ej kõkkar kõn ta?

Revelesõn 17:18 (UBS) ej kõmel̦el̦e im ba bwe kõrã in “ej jikin kweilo̦k eo el̦ap, eo ej irooj ioon kiiñ ro an lal̦.” Naan in “jikin kweilo̦k” ej jitõñl̦o̦k ñan juon doulul. Im kõnke ‘jikin kweilo̦k in el̦ap’ ej kõjbwebweik “kiiñ ro an lal̦,” men in ej kaalikkar bwe kõrã in etan Babil̦on El̦ap ej juon doulul el̦ap ipel̦aakin lal̦ in. Kain doulul rot in? Juon doulul in kabuñ. Ejjab juon doulul in peejnej im ejjab juon doulul in kien. Jen etale kiiõ jet eoon ko ilo bokin Revelesõn ñan kam̦oole men in.

Kõrã in etan Babil̦on El̦ap ejjab juon doulul in kien. Etke? Kõnke Naanin Anij ej ba bwe “kiiñ ro an lal̦” ak rũtõl ro an kien rar “l̦õñ ippãn” kõrã in. Ewi wãween an kõrã in lõñ ippãn kiiñ ro an lal̦? Ilo an kõm̦m̦an kon̦ ak bujen jem̦jerã ippãn kien ko an lal̦. Im ej kõm̦m̦an jabdewõt men bwe en buñbuñ im kajoor, im bareinwõt bwe en kareel er. Eñin unin Baibõl̦ ej n̦aetan kõrã in “kõrã eo el̦ap an kijoñ.”—Revelesõn 17:1, 2, UBS; Jemes 4:4.

Babil̦on El̦ap ejjab juon doulul in peejnej. Etke? Kõnke Baibõl̦ ej ba bwe ‘ruwiakake ro ilo lal̦’ ak peejnej ko renaaj jañ im bũrom̦õj ilo iien eo naaj ko̦kkure kõrã in. Baibõl̦ ej ba bwe ilo iien in, rũtõl ro an kien im ruwiakake ro renaaj “jutak ettol̦o̦k” im kalimjeke kõrã in ekijoñ ak Babil̦on El̦ap. (Revelesõn 18:3, 9, 10, 15-17, UBS) Aolep men kein rej kam̦ool bwe Babil̦on El̦ap ejjab jutak kõn doulul in kien im doulul in peejnej, ak ej jutak kõn doulul in kabuñ.

 Babil̦on El̦ap ej tõlpiloik aolep aelõñ ko ikijjeen jerbalin “m̦adm̦õd” im anijnij ko an. Juon in bar wãween me ej kam̦ool bwe Babil̦on El̦ap ej kõkkar kõn doulul in kabuñ. (Revelesõn 18:23) Aolep kain jerbalin m̦adm̦õd im anijnij rej itok jãn kabuñ ko reriab im jetõb ro renana. Eñin unin an Baibõl̦ ba bwe Babil̦on El̦ap ‘ej jikin jetõb ko rettoon.’ (Revelesõn 18:2, UBS; Duteronomi 18:10-12) Bareinwõt, Baibõl̦ ej kwal̦o̦k bwe Babil̦on El̦ap ej lukkuun jum̦aik kabuñ eo em̦ool, im ej kaeñtaan ‘rũkanaan ro’ im “ro rem̦m̦an.” (Revelesõn 18:24) Ilo m̦ool, joñan an l̦ap an Babil̦on El̦ap dike im matõrtõre kabuñ eo em̦ool, ej m̦ane im ko̦kkure ‘ri kõnnaan ro an Jijej.’ (Revelesõn 17:6) Men kein rej kaalikkar bwe kõrã in me etan in Babil̦on El̦ap, ej kõkkar kõn aolep kabuñ ko reriab im rej jum̦aik Jeova Anij.