1. Ta eo enaaj wal̦o̦k ñan kõj el̦aññe jej kabuñ ñan Anij ilo wãween eo ejim̦we?

JEOVA ANIJ ej lukkuun yokwe kõj im ekõn̦aan bwe jen bõk tokjãn jãn wãween an tõl im katakin kõj. El̦aññe jej kabuñ ñane ilo wãween eo ejim̦we, jenaaj m̦õn̦õn̦õ im jel̦ã kilen kõjparok kõj jãn elõñ kain apañ ko. Bareinwõt, Anij enaaj jipañ im kajeraam̦m̦an kõj. (Aiseia 48:17) Rainin, elukkuun lõñ kabuñ ko rej ba bwe rej katakin armej kõn m̦ool eo kõn Anij. Bõtab, el̦ap an oktak tõmak ko aer jãn doon, im ebar oktak wãween aer katakin ro jet kõn Anij im ta ko ekõn̦aan bwe jen kõm̦m̦ani.

2. Ñe jekõn̦aan kabuñ ñan Jeova ilo wãween eo ej kabuñbũruon, ta eo jej aikuj kõm̦m̦ane?

² Ewi wãween am̦ maroñ jel̦ã ewi wõt wãween eo ejim̦we ñan kabuñ ñan Jeova? Eokwe, ejjab menin aikuj bwe kwõn katak kõn aolep katak ko an kabuñ ko, im keidi el̦aññe rem̦ool ke ak jaab. Kwõmaroñ baj katak wõt kõn ta eo Baibõl̦ ej ba kõn kabuñ eo em̦ool im jel̦ã ewi wõt kabuñ eo Jeova ej m̦õn̦õn̦õ kake. Ñan waanjoñak: Ilo elõñ aelõñ ko, ewõr juon apañ kõn riabin jããn ko me armej rej kõm̦m̦ani. El̦aññe kar lewaj jerbal eo ñan kwe bwe kwõn kaalikkar m̦oolin jããn jãn riabin jããn, enaaj kar ewi wãween am̦ kõm̦m̦ane  men in? Kwõnaaj ke kar kajjioñ in keememej aolep wãween im jekjekin riabin jããn ko? Alikkar kwõban kar. Enaaj kar pidodol̦o̦k ñe kwõnaaj bõk am̦ iien ñan katak kõn jekjekin im wãween m̦oolin jããn ko. Men in enaaj jipañ eok ñan am̦ jel̦ã kõn oktak eo ikõtaan riabin jããn im m̦oolin jããn. Ejjel̦o̦k oktak, el̦aññe jej katak kõn wãween kabuñ eo em̦ool, men in enaaj jipañ kõj ñan ad kile kabuñ ko reriab.

3. Ekkar ñan naan ko an Jijej, ta eo jej aikuj kõm̦m̦ane el̦aññe jekõn̦aan bwe Anij en buñbũruon ippãd?

³ Elukkuun aorõk bwe jen kabuñ ñan Jeova ilo wãween eo ej kabuñbũruon. Elõñ armej rej ba bwe aolep kabuñ rej kabuñbũruon Anij, bõtab Baibõl̦ ejjab ba men in. Meñe juon ej baj ba wõt bwe e Kũrjin ak ejjab mel̦el̦ein bwe Anij ej buñbũruon ippãn. Jijej ear ba: “Ejjab aolep ro rej kũr eõ ‘Irooj, Irooj,’ renaaj del̦o̦ñ ilo Aelõñ in lañ, ak ro wõt rej kõm̦m̦ani men ko ankilaan Jema ilañ.” Bwe Anij en buñbũruon ippãd, jej aikuj katak kõn ta ko ekõn̦aan bwe jen kõm̦m̦ani, innem kõm̦m̦ani. Jijej ear ba bwe ro rejjab kõm̦anm̦an ankilaan Anij, er “rinana!” (Matu 7:21-23, UBS) Kabuñ ko reriab rej ãinwõt riabin jããn ko me ejjel̦o̦k tokjãer kõnke rejjab maroñ jipañ kõj. Ilo m̦ool, kabuñ kein relukkuun kauwõtata ñan kõj.

4. Ta mel̦el̦ein ial̦ ko ruo me Jijej ear kõnnaan kaki, im ial̦ kein ruo rej tõll̦o̦k ñan ta?

⁴ Jeraam̦m̦an eo jãn Jeova ñan bõk mour indeeo epel̦l̦o̦k ñan aolep armej. Bwe jen maroñ mour ñan indeeo ilo Pedetaij, jej aikuj kabuñ ñan Anij ilo wãween eo ejim̦we im mour ilo wãween eo ej kabuñbũruon. Bõtab, ekabũrom̦õjm̦õj bwe ekanooj lõñ armej rejjab kõn̦aan kõm̦m̦ane men in. Eñin unin Jijej ear ba: “Kom̦win del̦o̦ñ ilowaan kõjãm eaidik; bwe edepakpak kõjãm, im el̦ap ial̦ eo ej tõll̦o̦k ñan mej, im elõñ ro rej del̦o̦ñ ie; Bwe erãniñ kõjãm, im eaidik ial̦ eo ej tõll̦o̦k ñan mour, im eiiet ro rej loe.” (Matu 7:13, 14) Ta mel̦el̦ein ial̦ kein ruo me Jijej ej kõnnaan kaki? Ial̦ kein ruo rej jitõñl̦o̦k ñan kabuñ eo em̦ool im kabuñ ko reriab. Kabuñ  eo em̦ool ej tõll̦o̦k ñan mour indeeo im kabuñ ko reriab rej tõll̦o̦k ñan jorrããn im mej. Jeova ejjab kõn̦aan bwe jabdewõt armej en jako. Eñin unin ej letok iien kiiõ bwe aolep armej ren katak kõn e. (2 Piter 3:9) Innem el̦aññe jej kabuñ ñan Anij ekkar ñan wãween eo ekõn̦aan, men in enaaj tõll̦o̦k kõj ñan mour indeeo. Ak el̦aññe jejjab, men in enaaj tõll̦o̦k kõj ñan mej.

5. Ewi wãween ad maroñ kile kabuñ eo em̦ool?

⁵ Ewi wãween ad maroñ kile kabuñ eo em̦ool ak “ial̦ eo ej tõll̦o̦k ñan mour”? Jijej ear ba jenaaj kile kabuñ eo em̦ool ikijjeen jerbal im kõm̦m̦an ko an armej ro ie. Ear ba: ‘Kom̦ naaj jel̦ã kajjier kõn leer kõnke wõjke em̦m̦an otemjej rej jebar im em̦m̦an leer.’ (Matu 7:16, 17) Mel̦el̦ein bwe enaaj alikkar kabuñ eo em̦ool ikijjeen men ko armej ro ie rej tõmak kaki ekoba m̦wil ko m̦wilier. Meñe armej ro ilo kabuñ eo em̦ool rejjab weeppãn im rej likjab, bõtab rej kate wõt er ñan kõm̦anm̦an ankilaan Anij. Jen etale 6 wãween ko me renaaj jipañ kõj ñan kile wõn ro em̦ool aer kabuñ ñan Anij.

6, 7. (1) Ewi wãween an armej ro an Anij watõk Baibõl̦? (2) Im ewi wãween an kar Jijej likũt juon joñak em̦m̦an kõn men in?

⁶ Katak ko an armej ro em̦ool aer kabuñ ñan Anij, rej pedped wõt ioon Baibõl̦. Baibõl̦ make ej ba: “Bwe aolep jeje ko ilo Baibõl̦ rej letokin Jitũbõn Anij, im el̦ap tokjãer ñan katakin kõn m̦ool eo im ñan kauwe nana, im kajim̦we bõd ko, im lel̦o̦k naanin katakin kõn mour eo ejim̦we, bwe eo ej jerbal ñan Anij en maroñ in pol̦õmãn ñan an kõm̦m̦ani aolep kain jerbal ko rem̦m̦an.” (2 Timote 3:16, 17, UBS) Paul ear jejel̦o̦k ñan Kũrjin ro m̦õttan im ba: “Ke kom̦ar bõk jãn kõm naan eo kom̦ar roñjake, naanin Anij, kom̦ar jab bõke ãinwõt naanin armej, a ãindein em̦ool, ãinwõt naanin Anij.” (1 Tessalonika 2:13) Innem, tõmak im katak ko an kabuñ eo em̦ool rejjab itok jãn armej ro im m̦anit ko aer. Rej itok jãn Naanin Anij ak Baibõl̦ eo.

 ⁷ Jijej Kũraij ear likũt juon joñak em̦m̦an ilo an kar kõjerbal Naanin Anij aolep iien ñe ej katakin armej ro. Juon iien ke ear jar ñan Jemãn ilañ, ear ba: “Am̦ in naan m̦ool eo.” (Jon 17:17) Ear l̦ap an Jijej tõmak Naanin Anij, im aolep katak ko an rar errã ippãn Jeje ko Rekkwõjarjar. Etke jejel̦ã men in? Kõnke m̦okta jãn an kar Jijej kwal̦o̦k juon eoon, ekkã an ba: “Ar jeje.” (Matu 4:4, 7, 10) Ãindein bar armej ro an Anij rainin. Rejjab katakin ro jet ekkar ñan l̦õmn̦ak im katak ko aer make. Bõtab, el̦ap aer tõmak bwe Baibõl̦ ej Naanin Anij, im men ko rej katakin armej kaki rej pedped wõt ioon ta eo Baibõl̦ ej ba.

8. Kabuñ ñan Jeova ej kitibuj ta?

⁸ Armej ro ilo kabuñ eo em̦ool rej kabuñ wõt ñan Jeova Anij im rej kwal̦o̦k etan ñan ro jet. Jijej ear ba: “Bwe ar je, Kwõn kabuñ ñan Irooj am̦ Anij, im kwõn jerbal ñan E wõt.” (Matu 4:10) Naan kein an Jijej rar itok jãn bokin Duteronomi 6:13, ijo eo me ewal̦o̦k etan Anij ie. Kõn men in, armej ro doon Anij rejjab kabuñ ñan bar juon ijello̦kun wõt Jeova. Aer kabuñ ñan e, ej kitibuj aer kwal̦o̦k ñan ro jet kõn ãt eo etan im kain Anij rot e. Bokin Sam 83:18 ej ba: “Kwe wõt, im etam̦ Jeova, Kwe eo eutiejtata ioon aolepen lal̦ in.” Jijej ear likũt juon joñak em̦m̦an ilo an kar kwal̦o̦k etan Anij ñan ro jet. Ej alikkar men in ilo jar eo an ke ear ba: “Iar kwal̦o̦k Etam̦ ñan armej ro Kwaar letok ñan Eõ jãn lal̦.” (Jon 17:6) Ãindeinl̦o̦k wõt, armej ro an Anij rainin rej katakin ro jet kõn ãt eo etan Anij, kõn karõk ko an, im kõn aolep wãween ko rem̦m̦an kõn e.

9, 10. Ta wãween ko me rej kaalikkar an Kũrjin ro rem̦ool lukkuun yokwe doon?

⁹ Armej ro doon Anij em̦ool aer yokwe doon. Jijej ear ba: “Armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.” (Jon 13:35) Kũrjin ro ilo iien ko etto rar kwal̦o̦k aer lukkuun yokwe doon. Yokwe in me Anij ekõn̦aan bwe jen kwal̦o̦ke, enaaj jipañ kõj ñan jol̦o̦k ad  kalijekl̦o̦k, im yokwe ro eoktak kilier im aelõñ ko aer. Enaaj bar jipañ kõj ñan kõm̦m̦an aenõm̦m̦an ippãn aolep armej, jekdo̦o̦n ñe reutiej ak rettã, im er rũm̦weiie ak rijjeram̦õl. Yokwe in ej kabõrokuk armej ro jãn aelõñ otemjej bwe ren yokwe doon ãinwõt juon baam̦le. (Riit Kolosse 3:14, UBS.) Armej ro ilo kabuñ ko reriab ejjel̦o̦k yokwe rot in ibwiljier. Etke jejel̦ã men in? Kõnke meñe juon wõt aer kabuñ ak rej tarin̦aeik doon im m̦an doon kõn an oktak aelõñ im kil ko kilier jãn doon. Kũrjin ro rem̦ool rejjab tarin̦ae im m̦an Kũrjin ro jet m̦õttaer ak jabdewõt armej. Baibõl̦ ej ba: “Eñin ealikkar an ãinjuon ro nejin Anij jãn ro nejin Tepil̦; jabdewõt eo ejjab kõm̦m̦an jim̦we, ak jab yokwe ro jein im jatin, ejjab nejin Anij. Bwe eñin naan eo kom̦ar roñ jãn jinoin: jen yokwe doon. Jen jab ãinwõt Kein; ekar doon Rinana eo, im ear m̦ane l̦eo jatin.”—1 Jon 3:10-12, UBS; 4:20, 21, UBS.

¹⁰ Kũrjin ro rem̦ool rejjab baj kwal̦o̦k wõt yokwe ilo aer jab tarin̦ae im m̦an ro jet. Ebar wõr jet men ko Kũrjin ro rem̦ool rej kõm̦m̦ani ñan kwal̦o̦k aer lukkuun yokwe doon. Ta kein? Rej kõjerbal iien ko aer, maroñ ko aer, im men ko m̦weieer ñan jipañ im kõkajoor doon. (Hibru 10:24, 25) Rej jipañ doon ilo iien aikuj, im em̦ool aer kõm̦m̦an ñan ro jet. Ilo m̦ool, rej pokake naanin kakapilõklõk eo ilo Baibõl̦ me ej ba jen kõm̦m̦an “em̦m̦an ñan armej otemjej.”—Galetia 6:10.

11. Etke eaorõk ñan ad tõmak bwe Anij ear lo̦mo̦o̦ren kõj ikijjeen Jijej Kũraij?

¹¹ Kũrjin ro rem̦ool rej tõmak bwe Anij ear lo̦mo̦o̦ren armej ikijjeen Jijej Kũraij. Baibõl̦ ej ba: “Lo̦mo̦o̦r ej itok jãn e wõt; kõnke ejjel̦o̦k bar juon ilo pel̦aakin lal̦ in eo Anij ear letok etan ñan armej bwe jen maroñ bõk lo̦mo̦o̦r kõn e.” (Jerbal 4:12, UBS) Ãinwõt ad kar etale ilo Katak 5, Jijej ear aje mour eo an ñan lo̦mo̦o̦ren armej ro rej pokake Anij. (Matu 20:28, UBS) Bareinwõt, e eo Anij ear kããlõte bwe en Kiiñ in Aelõñ eo An ilañ. Aelõñ ak kien in an Anij enaaj tõl aolep  armej ro ipel̦aakin lal̦ in. Anij ekõn̦aan bwe jen pokake Jijej im l̦oore katak ko an Jijej. Innem, el̦aññe jekõn̦aan bõk mour indeeo, jej aikuj in kõm̦m̦ane men in. Baibõl̦ ej ba: “Jabdewõt eo ej tõmak Nejin ewõr an mour indeeo; jabdewõt eo ejjab pokake Nejin ejãmin mour.”—Jon 3:36, UBS.

12. Ewi wãween an ro ilo kabuñ eo em̦ool kwal̦o̦k bwe rejjab m̦õttan lal̦ in?

¹² Armej ro em̦ool aer kabuñ ñan Anij rejjab m̦õttan lal̦ in. Ke rũtõlin Rom eo etan Pail̦at ear ekajete Jijej, Jijej ear ba naan kein: “Aelõñ eo Aõ ejjab jãn lal̦ in.” (Jon 18:36) Kõn men in, jekdo̦o̦n ia eo rũkal̦oor ro rem̦ool an Jijej rej jokwe ie ak rej tiljek wõt ñan Aelõñ in me ej jitõñl̦o̦k ñan kien eo an Anij. Eñin unin rejjab bõk kun̦aaer ilo m̦akũtkũt ko an kien (politic). Rejjab jait ak bõk kun̦aaer ilo aitwerõk ko an kien im aelõñ ko. Meñe ãindein ak ro doon Jeova rejjab kabõjrak ro jet jãn aer jait ippãn juon iaan kumi ko ak bade ko an kien me rej jum̦aik doon. Rejjab bar kabõjrak aer jibadek jea ko reutiej ak bout (vote). Bareinwõt, meñe rũkarejar ro rem̦ool an Anij rejjab bõk kun̦aaer ilo aitwerõk im m̦akũtkũt kein an kien, bõtab rej pokake wõt kakien ko an aelõñ eo rej pãd ie. Etke? Kõnke Naanin Anij ej jiroñ er bwe ren “pokake maroñ eo an kien.” (Rom 13:1, UBS) Bõtab, el̦aññe kien ej kajjitõk bwe ren kõm̦m̦ane juon men me ej rupe kien ko an Anij, eokwe rein renaaj l̦oore wõt joñak eo an rijjilõk ro an Jijej ke rar ba: “Em̦m̦an jen pokake Anij el̦ap jãn armej.”—Jerbal 5:29; Mark 12:17.

13. Ta l̦õmn̦ak eo an rũkal̦oor ro rem̦ool an Jijej kõn Aelõñ eo an Anij, im men in ej kõm̦akũt er ñan ta?

¹³ Rũkal̦oor ro rem̦ool an Jijej rej kwal̦o̦k ñan ro jet bwe Aelõñ eo an Anij wõt emaroñ bõktok juon ilju im jekl̦aj em̦m̦an ñan armej ro. Jijej ear kanaan im ba: “Naaj kwal̦o̦k gospel in an aelõñ in lañ iaolepen lal̦ kõn menin kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.” (Matu 24:14) Rũkal̦oor ro rem̦ool an Jijej Kũraij rej kwal̦o̦k ñan ro jet bwe Aelõñ ak kien eo wõt an Anij emaroñ bõktok  juon ilju im jekl̦aj em̦m̦an ñan armej ro. Eñin unin rejjab rõjañ armej ro bwe ren reilo̦k ñan rũtõl ro an kien ñan n̦amejal̦an apañ ko aer. (Sam 146:3, UBS) Jijej ear katakin kõj bwe jen jar kõn Aelõñ eo an Anij ilo an kar ba: “En itok Am̦ aelõñ. Ren kõm̦anm̦an ankilaam̦ ãinwõt ilañ, bareinwõt ioon lal̦.” (Matu 6:10) Baibõl̦ ear kanaan bwe Aelõñ eo an Anij enaaj “kapedakilkil im ko̦kkure aolep aelõñ kein [kien ko an lal̦ in kiiõ], im enaaj jutak ñan indeeo.”—Daniel 2:44; Revelesõn 16:14; 19:19-21.

14. Kabuñ ta eo me armej ro ie rej kõm̦m̦ani men ko Baibõl̦ ej ba kõn kabuñ eo em̦ool?

¹⁴ Ilo am̦ l̦õmn̦ak kõn mel̦el̦e ko ej kab m̦õj ad etali, em̦m̦an kwõn kajjitõk ippam̦ make: ‘Wõn ro me aolep katak ko an kabuñ eo aer rej pedped wõt ioon Baibõl̦ im bareinwõt rej kwal̦o̦k etan Jeova ñan ro jet? Kumi in kabuñ ta eo me ej pokake Anij ilo aer lukkuun kwal̦o̦k aer yokwe doon, tõmak ilo Jijej ilo naan im kõm̦m̦an ko aer, im jab m̦õttan lal̦ in? An wõn kabuñ eo ej kwal̦o̦k ñan ro jet bwe Aelõñ ak kien eo wõt an Anij emaroñ bõktok juon ilju im jekl̦aj em̦m̦an ñan armej ro? Iaan aolep kabuñ ko wõj ilo lal̦ in, an wõn kabuñ eo ej kõm̦m̦ani aolep men kein?’ Eokwe, kein kam̦ool ko rej kaalikkar bwe kabuñ eo wõt me ej kõm̦m̦ani aolep men kein ej kabuñ eo an Ri Kõnnaan ro an Jeova.—Riit Aiseia 43:10-12.

15. Ijello̦kun wõt ad tõmak ilo Anij, ta ko jet ekõn̦aan bwe jen kõm̦m̦ani?

¹⁵ Bwe jen maroñ kabuñbũruon Anij, ewõr men ko jet jej aikuj kõm̦m̦ani ijello̦kun wõt ad tõmak ilo e. Ilo m̦ool, Baibõl̦ ej ba bwe jetõb ro ak enjel̦ ro renana rej bar tõmak ilo Anij. (Jemes 2:19) Bõtab, meñe jetõb rein renana rej tõmak ilo Anij, ak rejjab kõm̦m̦ani men ko ekõn̦aan bwe ren kõm̦m̦ani. Innem, ta ko jej aikuj kõm̦m̦ani bwe Anij en buñbũruon ippãd? Jej aikuj tõmak ilo e im kõm̦anm̦an  ankilaan. Bareinwõt, jej aikuj diwõjl̦o̦k jãn kabuñ ko reriab im kobal̦o̦k ippãn kabuñ eo em̦ool.

16. Ñe ej itok ñan kabuñ ko reriab, ta eo jej aikuj kõm̦m̦ane?

¹⁶ Rijjilõk Paul ear kwal̦o̦k bwe jejjab aikuj bõk kun̦aad ilo kabuñ ko reriab. Ear je naan kein: “‘Kom̦win diwõjtok jãn iol̦apeer, im kamakel̦o̦k iaami,’ Irooj ej ba, ‘Im jab uññũr jabdewõt men eo ejjab erreo; im Inaaj bõk kom̦.’” (2 Korint 6:17;  Aiseia 52:11) Kõn men in, Kũrjin ro rem̦ool rej aikuj kõjparok bwe ren jab bõk kun̦aaer ilo jabdewõt wãween ko rej ekkejell̦o̦k ippãn kabuñ ko reriab.

17, 18. (1) Ta in “Babil̦on El̦ap”? (2) Im etke kwõj aikuj m̦õkaj im “diwõjtok jãne”?

¹⁷ Baibõl̦ ej ba bwe aolep kabuñ ko reriab rej m̦õttan “Babil̦on El̦ap.” * (Lale kõmel̦el̦e eo itulal̦.) (Revelesõn 17:5) Ãt in ej itok jãn kar juon jikin ilo iien ko etto me etan in Babil̦on. Ãlikin kar Ibwijleplep eo ilo raan ko an Noa, ear jino ejaak kabuñ ko reriab ilo jikin in. Elõñ iaan katak im tõmak ko an kabuñ ko reriab ilo raan kein rar jebar im wal̦o̦k jãn Babil̦on eo etto. Ñan waanjoñak, ro ilo Babil̦on eo etto rar kabuñ ñan anij ko aer me ewõr jilu wãweer im rej tõmak bwe rej jilu anij ilo juon. Rainin, elõñ kabuñ ko rej tõmak ejja katak in wõt kõn jilu anij ilo juon (Trinity). Rej tõmak bwe Jemãn, Nejin, im Jetõb Kwõjarjar rej juon wõt. Bõtab, Baibõl̦ ej lukkuun kaalikkar bwe ewõr juon wõt Anij em̦ool, Jeova, im bwe Jijej Kũraij ej Nejin. (Jon 17:3) RiBabil̦on ro rar bar tõmak bwe kõj armej ewõr juon jetõb ilowaad. Innem rar tõmak bwe ãlikin an juon armej mej, an ak jetõb eo ilowaan ej weaak jãn ãnbwinnin im etal ñan juon jikin eñtaan. Rainin, enañin aolep kabuñ ko rej katakin armej ro bwe ñe juon rinana emej, an ak jetõb eo an ej mour m̦aanl̦o̦k im enaaj etal im bwil ilo el̦ (hell).

¹⁸ Tõmak im katak ko an RiBabil̦on ro ilo iien ko etto rar ajeeded ipel̦aakin lal̦ in. Kõn men in, jemaroñ ba bwe aolep kabuñ ko reriab ipel̦aakin lal̦ in rainin rej jitõñl̦o̦k ñan Babil̦on El̦ap. Em̦õj an Anij kanaan bwe naaj ko̦kkure aolep kabuñ kein ilo idiñ. Innem, kwõj kile ke unin an aorõk bwe kwõn diwõjl̦o̦k jãn jabdewõt kabuñ me ej m̦õttan Babil̦on El̦ap? Jeova Anij ekõn̦aan bwe kwõn m̦õkaj im “diwõjtok jãne,” kiiõ ke ejja wõr wõt iien.—Riit Revelesõn 18:4, 8.

19. Ta jeraam̦m̦an ko kwõnaaj loi ilo am̦ karejar ñan Jeova?

 ¹⁹ Emaroñ nãj wõr jet armej renaaj dike eok im jab bar kõnnaan waj ippam̦ ñe kwõnaaj bõjrak jãn am̦ l̦oor tõmak im m̦anit ko an kabuñ ko reriab. Bõtab, jeraam̦m̦an ko kwõnaaj loi ilo am̦ naaj karejar ñan Jeova ippãn armej ro doon, enaaj l̦apl̦o̦k jãn joñan men ko kwõj kaarmejjeteiki. Kwõnaaj ãinwõt rũkal̦oor ro an Jijej me rar kaarmejjeteik kõn̦aan ko aer im men ko rekõn kaorõki bwe ren maroñ l̦oore. Ãinwõt rein, enaaj lõñl̦o̦k ro jeim̦ im jatũm̦ ilo tõmak. Im kwõnaaj uwaan juon baam̦le el̦ap me ej kitibuj elõñ milien Kũrjin ro rem̦ool im rein renaaj m̦ool ilo aer yokwe eok. Bareinwõt, kwõnaaj bõk kõjatdikdik eo ñan mour indeeo ilo pedetaij ijin ioon lal̦. (Riit Mark 10:28-30.) Bõlen juon iien, armej ro me renaaj dike eok kõn tõmak eo am̦, renaaj katak Baibõl̦ im bar kobawaj ippam̦ im kabuñ ñan Jeova.

20. Ta jeraam̦m̦an eo ej pãd im̦aan ñan aolep ro rej pãd ilo kabuñ eo em̦ool?

²⁰ Baibõl̦ ej ba bwe m̦õttan jidik Anij enaaj jol̦o̦k jukjukun pãd in enana, im bõktok juon jukjukun pãd ekããl me armej ro wõt rem̦m̦an renaaj pãd ie ium̦win tõl eo an Aelõñ eo an. (2 Piter 3:9, 13) Jukjukun pãd in ekããl ak lal̦ in ekããl enaaj juon jikin em̦m̦an im ekanooj aiboojoj! Im ilo naaj tõre en̦, enaaj wõr juon wõt kabuñ ilo lal̦ in. Eñin unin elukkuun aorõk ñan am̦ jino kobal̦o̦k kiiõ ippãn armej ro ilo kabuñ eo em̦ool.