Tokãlik, Belshazzar ear jino kiiñ ioon Babil̦on. Juon boñ, ear kõm̦m̦ane juon kwõjkwõj im kũrl̦o̦k elõñ to̦ujin iaan ruutiej ro ilo ãneo. Ear ba ñan rijerbal ro an bwe ren kadiwõjtok cup gold ko me Nebukadnezar ear bũki jãn tampel̦ eo an Jeova. Belshazzar im armej ro ippãn rar idaak jãn cup kein im nõbare anij ko aer. Innem ilo jidimkij, ear wal̦o̦k juon pein armej im ej jino jeje ilo kiin m̦weo ijo rej m̦õñã ie, ak rejjab maroñ mel̦el̦e naan ko.

Belshazzar ear jino mijak. Ear ba bwe ren ãñintok rianijnij ro im ear kallim̦ur ñan er im ba: ‘El̦aññe jabdewõt iaami emaroñ kõmel̦el̦eiki naan kein, inaaj kõm̦m̦an bwe en armej eo kein kajilu eutiejtata ilo Babil̦on.’ Kõn men in, rar kajjioñ etali naan ko bwe ren mel̦el̦e, ak ejjel̦o̦k juon iaaer ear maroñ kõmel̦el̦eiki. Innem lerooj eo ear del̦o̦ñl̦o̦k ñan ippãer im ba: ‘Ewõr juon em̦m̦aan etan Daniel me ekõn kõmel̦el̦eik elõñ men ko ñan Nebukadnezar. Enaaj bar maroñ kõmel̦el̦eik naan kein ñan eok.’

Innem Daniel ear itok ñan ippãn kiiñ eo. Kiiñ in ear ba ñane: ‘El̦aññe kwõmaroñ riit im kõmel̦el̦eiki naan kein, inaaj lewaj juon am̦ m̦arm̦ar gold im kõm̦m̦an bwe kwõn armej eo kein kajilu eutiejtata ilo Babil̦on.’ Daniel ear ba: ‘Ijjab kõn̦aan menin letok kein am̦, ak inaaj kwal̦o̦k ñan eok mel̦el̦ein naan kein. Jem̦am̦, Nebukadnezar, ear utiej bũruon, im kõn men in Jeova ear kõttãik e. Kwõjel̦ã kõn men ko rar wal̦o̦k ñane, ak kwõj kõjekdo̦o̦ne Jeova ilo am̦ idaak wain jãn cup gold kein me rej jãn tampel̦ eo An. Eñin unin Anij ear je naan kein: Mene, Mene, Tekel, im Parsin. Mel̦el̦ein bwe RiMidia ro im RiPõrsia ro renaaj anjo̦ ioon Babil̦on, im enaaj jako am̦ irooj.’

Armej remaroñ kar l̦õmn̦ak bwe ejjel̦o̦k en̦ emaroñ anjo̦ ioon Babil̦on. Etke? Kõnke ear wõrwõr kõn wõrwõr ko rel̦l̦ap im pen, im juon reba em̦wilal̦ ear kaapool̦e. Ak ilo ejja boñõn eo wõt, RiMidia im RiPõrsia ro rar pojakin ko̦kkure jikin in. Kiiñ eo an aelõñin Põrsia etan Sairõs ear  maroñ kabõjrak an reba eo to̦o̦rl̦o̦k ñan jikin in bwe rũttarin̦ae ro an ren maroñ kijoone im etal ñan kõjãmin del̦o̦ñ ko an jikin in. Im ke rar tõpare ijin, kõjãm ko rar pel̦l̦o̦k kadede! Kõn men in, rũttarin̦ae ro rar del̦o̦ñe im bõk anjo̦ ioon jikin in, im rar m̦ane Kiiñ Belshazzar. Innem Sairõs ear jino irooj ioon Babil̦on.

Ilowaan wõt juon iiõ, Sairõs ear kõjjel̦ã im ba: ‘Em̦õj an Jeova ba ñan eõ bwe in bar kalõk tampel̦ eo ilo Jerusalem. Jabdewõt iaan armej ro an me rekõn̦aan jipañ, remaroñ etal.’ Innem elõñ iaan RiJu ro rar jepl̦aak ñan ãneo ãneer ãlikin 70 iiõ, jãn kar iien eo kar ko̦kkure Jerusalem. Eñin men eo Jeova ear kallim̦ur bwe enaaj kar wal̦o̦k. Sairõs ear karo̦o̦li cup gold im jelba ko kab men ko jet Nebukadnezar ear bũki jãn tampel̦ eo. Kwõj ke kile wãween an kar Jeova kõjerbal Sairõs ñan jipañ armej ro An?