Jen ro̦o̦l likl̦o̦k ñan jet iiõ ko m̦oktal̦o̦k. Nihimaia, rijerbal eo an Kiiñ Artaxerxes, ear juon RiIsrael im ear jokwe ilo Põrsia ilo jikin eo etan Shushan. Em̦m̦aan eo jatin Nihimaia ear itok jãn Juda im bõktok ennaan ko rejjab em̦m̦an. Ear ba: ‘Armej ro me rar ro̦o̦l ñan Jerusalem rej pãd ilo kauwõtata. Wõrwõr eo im kõjãm ko RiBabil̦on ro rar ko̦kkuri rejjañin de jutak.’ Nihimaia ear inepata. Ear kõn̦aan etal ñan Jerusalem im jipañ. Kõn men in, ear jar bwe kiiñ eo en maroñ kõtl̦o̦k an etal.

Tokãlik, kiiñ eo ear lo bwe Nihimaia ear jab mejãn m̦õn̦õn̦õ. Ear ba ñane: ‘Ijjañin kar lo am̦ bũrom̦õj ãinwõt kiiõ. Ewõr ta kwõj bũrom̦õj kake?’ Nihimaia ear ba: ‘Etke in jab bũrom̦õj ke ãneo ãneõ Jerusalem ejorrããn?’ Kiiñ eo ear kajjitõk ippãn: ‘Ta eo imaroñ kõm̦m̦ane ñan jipañ eok?’ Ilo iien eo wõt, Nihimaia ear jar ilo bũruon, innem ear ba ñane: ‘Jouj im kõtl̦o̦k aõ etal ñan Jerusalem bwe in bar kalõk wõrwõr eo ie.’ Kiiñ Artaxerxes ear ba ñan Nihimaia bwe emaroñ etal, im ear kõpooje bwe en jab jorrããn ilo ial̦ eo an eaetok. Ear bar kõm̦m̦an bwe Nihimaia en kabna in Juda im ear lel̦o̦k al̦al̦ bwe en kein aer kalõk kõjãm ko ilo wõrwõr eo.

Ke Nihimaia ej tõpar Jerusalem, ear etale wõrwõr eo. Innem ear kakobaik bũrij ro im rũtõl ro ippãn doon im ba ñan er: ‘Elukkuun jorrããn wõrwõr in. Jej aikuj jino jerbal.’ Armej ro rar errã ippãn, im rar jino bar kalõk wõrwõr eo.

Ak jet iaan rũkõjdat ro rar kajjirere kake er im ba: ‘Juon kidu fox emaroñ rupe wõrwõr n̦e kom̦ij kalõke.’ Bõtab rijerbal ro rar jab el̦l̦o̦k ñan naanin kajjirere ko aer ak rar wõnm̦aanl̦o̦k wõt ilo aer ekkal. Kõn men in, wõrwõr eo ear utiejl̦o̦k im penl̦o̦k.

Rũkõjdat ro rar pepe in etal ilo ittino im ko̦kkure Jerusalem. Ke RiJu ro rej roñ kõn pepe eo aer, rar lukkuun mijak. Bõtab, Nihimaia ear ba: ‘Kom̦win jab mijak. Jeova ej pãd ippãd.’ Innem ear illik ruwaj bwe ren kõjparok rijerbal ro, im rũkõjdat ro rar jab maroñ ko̦kkure er.

 Ilowaan wõt 52 raan, wõrwõr eo im kõjãm ko rar dedel̦o̦k. Nihimaia ear bõktok aolep RiLivai ro ñan Jerusalem ñan iien aje eo. Ear karõke er im kõm̦m̦an ruo kumi in rial. Kumi kein ruo rar jepel l̦o̦k jãn doon im m̦aaj ioon wõrwõr eo ipel̦aakin Jerusalem. Rar kõjañi jilel ko im kein kõjañjañ ko jet, im al ñan Jeova. Ezra ear etal ippãn juon iaan kumi in rial rein, im Nihimaia ear etal ippãn kumi eo juon. Im rar m̦aaj m̦ae iien rar iioon doon ilo tampel̦ eo. Aolep armej ro​—em̦m̦aan ro, kõrã ro, im ajri ro—​rar lel̦o̦k menin katok ko aer ñan Jeova im m̦õn̦õn̦õ ippãn doon. Ainikien aer em̦m̦õn̦õn̦õ ear tõpar ijoko rettol̦o̦k.