Jesus ear jab baj kõmour wõt ro renañinmej im kejerkak ro remej, ak ear bar wõr an maroñ ioon l̦añ ko. Ãlikin an kar Jesus jar ioon tol̦ eo, ear reilo̦k ñan Lom̦al̦o in Galili im lo juon l̦añ. Ilo tõre in, rijjilõk ro rej pãd ioon wa eo im rej kate er aõn̦õn̦ ippãn kõto eo. Jesus ear wanlal̦l̦o̦k jãn ioon tol̦ eo im jino an etetal ioon dãn im ear jibadekl̦o̦k wa eo. Ke rijjilõk ro rar reilo̦k im loe an juon armej etetal ioon dãn, rar jino mijak. Ak Jesus ear ba: ‘Ña e, kom̦win jab mijak.’

Piter ear ba: ‘Aõ Irooj, el̦aññe lukkuun kwe n̦e, kwõn jiroñ eõ bwe in iwõj ioon dãn waj ñan ippam̦.’ Jesus ear jiroñl̦o̦ke: ‘Kwõn itok ñan ippa.’ Innem Piter ear to jãn wa eo im jino an etetal ioon dãn im ear jibadekl̦o̦k Jesus bul̦õn kõto eo. Ak ke Piter ej jino an epaakel̦o̦k Jesus, ear kalimjek l̦añ eo im jino an mijak. Kiiõ ear eñjake an tũm̦m̦wilal̦l̦o̦k. Piter ear lam̦õj im ba: ‘Irooj, lo̦mo̦o̦ren eõ!’ Jesus ear m̦õkaj im dãpij pein im ba: ‘Etke kwaar jino pere? Edik wõt am̦ tõmak.’

Ke Jesus im Piter rej uwel̦o̦k ioon wa eo, ear kajju jako l̦añ eo. L̦õmn̦ak m̦õk kõn kar eñjake eo an rijjilõk ro? Rar ba ñan Jesus: ‘Em̦ool bwe Kwe Nejin Anij.’

Ejjab kar iien eo de in Jesus ear kabõjrak l̦añ ko. Ilo kar bar juon iien, ke Jesus im rijjilõk ro an rar jerakl̦o̦k ñan ijo turãjet, Jesus ear kiki il̦okwan wa eo. Ke ej kiki, ear wal̦o̦k juon l̦añ kileplep im n̦o ko rekkillep rar buñ ioon wa eo im ear uwe dãn. Rijjilõk ro rar lam̦õjl̦o̦k im karuji Jesus im ba: ‘Rũkaki, m̦õttan jidik jemej! Jipañ kõm!’ Im Jesus ear jerkaktok im ba ñan dãn ko: ‘Kwõn lur.’ Ilo iien eo wõt, ear lur im l̦ae. Jesus ear kajjitõk ippãn rijjilõk ro: ‘Ewi tõmak eo ami?’ Im rar ba ñan doon: ‘Joñan, kõto im lo̦jet rej bar pokake e.’ Rijjilõk ro rar katak im kile bwe el̦aññe rej lõke Jesus kõn aolepen bũrueer, innem ejjel̦o̦k unin aer naaj mijak jabdewõt men.