Ke ej epaaktok iien Kwõjkwõjin Kijoone eo ilo iiõ eo 32, rijjilõk ro rar jepl̦aaktok jãn aer itoitak im kwal̦o̦k naan, im rar lukkuun m̦õk. Kõn men in, Jesus ear ãñinl̦o̦k er bwe ren jerakl̦o̦k ilo juon wa ñan Betseida, eñin ijo rar itõn kakkije ie. Ak ke wa eo ear epaakel̦o̦k ãne, Jesus ear reilo̦k im loe elõñ to̦ujin armej rej l̦oortok er ñan jikin in. Meñe Jesus ear kõn̦aan makel̦o̦k iaan ippãn rijjilõk ro an, ak ear tũriam̦o kõn armej rein. Ear kõmour ro rar nañinmej im jino an katakin er. Ear kwal̦o̦k ñan er kõn Aelõñ eo an Anij aolepen raan eo. Ke ear jino an jotal̦o̦k, rijjilõk ro an rar itok ñan ippãn im ba: ‘Joñan in armej rein rekwõle. Kwõn jilkinl̦o̦k er bwe ren tõn m̦õñã.’

Jesus ear ba ñan er: ‘Rejjab aikuj ro̦o̦l. Kom̦win lel̦o̦k kijeer bwe ren m̦õñã wõt ijin.’ Rijjilõk ro rar ba: ‘Kokõn̦aan ke bwe kõmin etal im wia tok kijeer pilawã?’ Juon iaan rijjilõk ro etan Pilip, ear ba: ‘Meñe emaroñ l̦ap jããn ippãd, ak eban bwe ñan wia kijen aolepen armej rein.’

Jesus ear kajjitõk ippãer: ‘Jete n̦e kijed pilawã im ek?’ Andru ear uwaak: ‘Ewõr 5 pilawã im 2 ek jiddik. Ãinwõt eban bwe joñan in ñan aolep.’ Jesus ear ba: ‘Bõktok pilawã im ek kan̦e.’ Im ear jiroñl̦o̦k armej ro bwe ren kõjenolo̦k er ñan kajjojo kumi im jijet ioon ujooj ko, im ekar wõr 50 ak 100 armej ilo juon kumi. Jesus ear bõk pilawã ko im ek ko, im ear ejjed ñan lañ im jar. Ãlikin, ear lel̦o̦k m̦õñã ko ñan rijjilõk ro im rar ajej l̦o̦k kijen armej ro. Em̦m̦aan ro 5,000 im kõrã kab ajri ro rar aolep m̦õñã im mat. Innem  rijjilõk ro rar aini bween m̦õñã ko bwe ren jab ko̦kkuri. Ear obrak 12 iep kõn bween m̦õñã! Ejjab ke kabwilõñlõñ men in ear wal̦o̦k?

Joñan an kar armej ro bwilõñ, rar kõn̦aan bwe Jesus en aer kiiñ. Ak Jesus ear jel̦ã bwe ejjañin jejjet iien eo Jeova ear karõk bwe en kiiñ. Kõn men in, ear jiroñl̦o̦k armej ro bwe ren ro̦o̦l im ear ba ñan rijjilõk ro an bwe ren jerakl̦o̦k ñan ijo turãjetin Lom̦al̦o in Galili. Rijjilõk ro rar uwe ioon wa eo ak Jesus ear wanlõñl̦o̦k make iaan ñan ioon juon tol̦. Etke? Kõnke ear kõn̦aan jar ñan Jemãn. Jekdo̦o̦n ñe ear poub ak aolep iien ear kõm̦m̦an iien ñan an jar.