Moses ear kallim̦ur ñan Pero bwe eban bar ro̦o̦ll̦o̦k ñan ippãn. Ak m̦okta jãn an kar etal, ear jiroñ Pero im ba: ‘Ñe elukwõn boñ, aolep m̦aanje ro nejin RiIjipt renaaj mej, jãn l̦adik eo nejũm̦ ñan l̦adik ro nejin rijerbal ro.’

Innem Jeova ear jiroñ RiIsrael ro bwe ren kõpooj jet m̦õñã ñan juon iien eaorõk. Ear ba: ‘Kom̦win m̦an juon ko̦o̦t ak jiip kom̦aan me juon an iiõ, im kom̦win bõk bõtõktõkin im kõbõtõktõke ioon kõjãmin m̦õko im̦õmi. Innem kom̦win um̦wini im m̦õñã kanniõkin ippãn pilawã ko rar jab kauwe. Bareinwõt kom̦win kõn̦aki nuknukun itoitak ko ami kab juuj ko ami bwe kom̦win pojak ñan ami etal. Buñniin, inaaj kanemkwõj kom̦.’ Kwõmaroñ ke pijaikl̦o̦k an RiIsrael ro lukkuun m̦õn̦õn̦õ im kijoororetok iien in?

Ke ear lukwõn boñ, enjel̦ eo an Jeova ear etal ñan aolep m̦õko im̦õn armej ro ilo Ijipt. Innem ear kijoone m̦õko me rar kõkal̦l̦eik kõjãm ko kõn bõtõktõk. Ak ilo m̦õko me rar jab kõkal̦l̦eik kõn bõtõktõk, l̦addik m̦aanje ro ie rar mej. Aolep m̦aanje ro nejin kajjojo baam̦le ko an RiIjipt ro rar mej, m̦aanje ro ilo baam̦le ko rem̦weiie im ilo baam̦le ko rejeram̦õl. Ak ear jab mej juon iaan m̦aanje ro nejin RiIsrael ro.

L̦adik eo nejin Pero ear bareinwõt mej. Joñan an kar l̦ap an Pero inepata im bũrom̦õj, ear jab kõn̦aan wõnm̦aanl̦o̦k wõt im iioon menin kaeñtaan ko. Kõn men in, ear m̦õkaj im ba ñan Moses im  Aron: ‘Kom̦win etal. Kom̦win diwõjl̦o̦k jãn ãnin. Etal im kabuñ ñan Anij en̦ ami. Im kom̦win bõk menninmour ko nejimi!’

Ilo boñõn eo wõt, ear boñõn meram, im aolep RiIsrael ro rar jino diwõjl̦o̦k jãn Ijipt. Kajjojo bwij im baam̦le rar diwõjl̦o̦k, juon ilo̦k juon. Ear wõr 600,000 em̦m̦aan in RiIsrael, im ear bar lõñ kõrã im ajri ro ippãer. Bareinwõt, elõñ armej ro jet rar kobal̦o̦k ippãer kõnke rar kõn̦aan bar kabuñ ñan Jeova. Kiiõ RiIsrael ro rej kab anemkwõj!

Bwe ren maroñ keememej wõt wãween an kar Jeova lo̦mo̦o̦ren er, renaaj kar aikuj kõm̦m̦ane ejja kõjota eo wõt rar kõm̦m̦ane, juon kõttan ilo juon iiõ. Etan kõjota in ej Kwõjkwõjin Kijoone eo.