RiIsrael ro rar em̦m̦akũt jãn Tol̦ Sainai im kijoone Paran, juon ãne jem̦aden. Innem rar tõpartok juon jikin etan Kedesh. Ilo ijin Jeova ear jiroñ Moses im ba: ‘Kwõn jilkinl̦o̦k 12 em̦m̦aan, juon jãn kajjojo bwij, bwe ren etal im lale ãneen Kenan, ãneo inaaj lel̦o̦k ñan RiIsrael ro.’ Kõn men in, Moses ear kããlõt 12 em̦m̦aan im ear ba ñan er: ‘Kom̦win etal ñan Kenan, im lale el̦aññe em̦m̦an ãneo im el̦aññe bwidej eo ie em̦m̦an ñan ad ekkat kijed m̦õñã. Lale ewi joñan an armej ro ie kajoor im el̦aññe rej jokwe ilo em̦ nuknuk ak ilo m̦õko reppen.’ Innem riaroñroñ ro 12 rar etal ñan Kenan. Joshua im Keleb rar m̦õttan riaroñroñ rein me rar etal.

Ãlikin 40 raan, riaroñroñ rein rar jepl̦aak im rar bõktok ippãer jet leen wõjke in ãneo, ãinwõt kũreep im men ko jet. Innem rar kõjjel̦ã im ba: ‘Kõmar etale ãneo im loe bwe ewãmourur im em̦m̦an, ak armej ro ie rekajoor im ijoko rej jokwe ie ewõr wõrwõr ko reutiej.’ Innem Keleb ear ba: ‘Jekajoor, jemaroñ anjo̦ ioer. Jen etal kiiõ!’ Kwõjel̦ã ke etke Keleb ear ba men in? Kõnke erro Joshua kar tõmak im lõke Jeova. Ak riaroñroñ ro jet 10 rar ba: ‘Ejjab, armej ro ie relukkuun aetok im ineea! Jel̦ak jutak iturier, dik kõj wõt jel̦o kan̦.’

RiIsrael ro rar jino aer ebbeer. Rar abn̦õn̦õ im kõnnaan ippãn doon im ba: ‘Jen bar kããlõt juon ad rũtõl im jepl̦aak ñan Ijipt. Etke jen etal ñan juon ãne renaaj m̦an kõj ie?’ Joshua im Keleb rar ba: ‘Kom̦win jab  jum̦ae Jeova, im kom̦win jab mijak. Jeova enaaj kõjparok kõj.’ Ak RiIsrael ro rar jab roñjake erro. Joñan, rar kõn̦aan m̦an erro ñan mej!

Innem ta eo Jeova ear kõm̦m̦ane? Ear ba ñan Moses: ‘RiIsrael ran̦e rar loi aolep men ko iar kõm̦m̦ani ñan er, ak rej m̦akoko wõt in pokake eõ. Renaaj pãdwõt ilo ãne jem̦aden ium̦win 40 iiõ m̦ae iien renaaj mej. Ak ajri ro wõt nejier kab Joshua im Keleb renaaj mour ilo ãneo iar kallim̦ur bwe inaaj lel̦o̦k ñan er.’