Ilo kar aelõñin Assiria, ilo juon jikin etan Nineva, armej ro ie rar lukkuun nana. Kõn men in, Jeova ear ba ñan rũkanaan Jona bwe en etal ñan Nineva im jiroñ armej ro ie bwe ren bõjrak jãn aer kõm̦m̦ani m̦anit ko renana. Ak Jona ear ko im etal ilo bar juon ial̦ ñan bar juon jikin. Ear uwe ilo juon wa me ej jerakl̦o̦k ñan juon jikin etan Tarshish.

Ke wa in ear pãd lom̦al̦o, ear wal̦o̦k juon l̦añ im jel̦a ro rar lukkuun mijak. Rar jar im kajjitõk ippãn anij ko aer im ba: ‘Etke ej wal̦o̦k men in?’ M̦ae iien Jona ej kab ba ñan er: ‘Ña eo ewõr ruõ. Iar ko jãn aõ kõm̦m̦ane jerbal eo Jeova ear ba bwe in kõm̦m̦ane. Kom̦win jol̦o̦ke ña ñan lo̦jet im enaaj lur.’ Jel̦a rein rar jab kõn̦aan jol̦o̦ke Jona jãn wa eo, ak Jona ear akwel̦ap bwe ren jol̦o̦ke. Kõn men in, rar jol̦o̦ke ñan lo̦jet im ear m̦õkaj an jako l̦añ eo.

Jona ear l̦õmn̦ak bwe enaaj kar mej. Ke ej tũm̦m̦wilal̦l̦o̦k bul̦õn lo̦jet, ear jar ñan Jeova. Innem Jeova ear jilkinl̦o̦k juon ek kileplep im ear wõrañel̦o̦k Jona. Ke ear pãd ilowaan ek in, ear jar ñan Anij im ba: ‘Ij kallim̦ur bwe inaaj pokake eok aolep iien.’ Jeova ear kõjparoke Jona ilowaan ek eo ium̦win 3 raan, im ear kõm̦m̦an bwe ek eo en em̦m̦õjel̦o̦k Jona ñan parijet.

Kõnke Jeova ear lo̦mo̦o̦ren Jona, mel̦el̦ein ke bwe kiiõ Jona ejjab aikuj etal ñan Nineva? Eokwe, jaab. Jeova ear ba ñan Jona bwe en etal wõt ñan jikin in. Ilo iien in, Jona ear pokake. Ear etal ñan jikin in im ba ñan  armej ro renana: ‘40 raan jãn kiiõ, Nineva enaaj jorrããn.’ Bõlen juon emaroñ kar l̦õmn̦ak bwe RiNineva rein relukkuun ban oktak. Ak elukkuun kabwilõñlõñ bwe armej rein rar m̦õkaj im pokake im bõjrak jãn men ko renana rar kõm̦m̦ani. Kiiñ eo an Nineva ear ba ñan armej ro: ‘Kom̦win kũr ñan Anij, im ukel̦o̦k bwe en jab ko̦kkure kõj. Bõlen enaaj roñjake kõj.’ Ke Jeova ear loe bwe armej rein rar ukel̦o̦k, ear jab ko̦kkure Nineva.

Jona ear illu ke Anij ear jab ko̦kkure jikin in. Baj l̦õmn̦ak m̦õk kõn men in: Jeova ear kijenmej im kwal̦o̦k tũriam̦o ñan Jona, ak kiiõ Jona ejjab kõn̦aan kwal̦o̦k tũriam̦o ñan armejin Nineva. Ear diwõjl̦o̦k jãn jikin in im jijet ilo juon jikin ellor ium̦win juon kain menin eddek. Ke ear mej menin eddek in, Jona ear illu. Innem Jeova ear ba ñane: ‘El̦apl̦o̦k am̦ kaorõke menin eddek n̦e jãn armejin Nineva ran̦. Armej ran̦ rej mour wõt kõnke iar kwal̦o̦k tũriam̦o ñan er.’ Ta eo Anij ej kajjioñ in katakin Jona? Ej kajjioñ in katakini bwe armej ro ilo Nineva el̦apl̦o̦k aer aorõk jãn jabdewõt menin eddek.