KWÕMEL̦EL̦E ke kõn eñjake in an Linda? Ewõr ke juon ilo eklejia eo ear bar kõm̦m̦ane juon men me ekar kõmetak eok? Ekabũrom̦õjm̦õj bwe jet rar bõjrak jãn aer karejar ñan Jeova kõn an kar ro jet kõm̦m̦ani men ko rejjab em̦m̦an ñan er. Eñin ke men eo ear bar wal̦o̦k ñan kwe?

Ilo m̦ool, ñe juon iaan rũttõmak ro m̦õttad ej kõmetak kõj, jet iien elukkuun pen ad jol̦o̦k an bõd. Meñe ãindein ak Kũrjin ro rej aikuj yokwe doon. (Jon 13:34, 35) El̦aññe juon jeid im jatid ilo tõmak ear kõm̦m̦ane juon men enana ñan kõj, jej illu im metak. Joñan ad metak, men in emaroñ kõm̦m̦an ad m̦õjn̦o̦.—Sam 55:12, 13, UBS.

Baibõl̦ ej ba bwe ewõr iien Kũrjin ro rej kõm̦m̦ani men ko rejjab em̦m̦an im kiiõ ‘ewõr rueer ippãn eo juon.’ (Kolosse 3:13) Jej kab naaj kile joñan an pen ñan kõm̦adm̦õde wãween in el̦aññe jej kab iioone. Ta ko remaroñ jipañ kõj? Jen lale jilu naanin kakapilõk ko jãn Baibõl̦:

Jemãd ilañ ej loe men otemjej. Jeova ej reilal̦tak im loe aolep men ko rej wal̦o̦k. Ej loe men ko rejjab em̦m̦an me ro jet rej kõm̦m̦ani ñan kõj im kõn joñan an men kein kõmetak kõj. (Hibru 4:13, UBS) Ej bareinwõt bũrom̦õj ñe ej loe ad bũrom̦õj. (Ri Ekajet 10:16) Jeova ejãmin kõtl̦o̦k bwe jorrããn ko, inepata ko, ak jabdewõt men ekoba juon iaan rũkarejar ro an, ren “kõjepel kõj jãn yokwe eo an.” (Rom 8:35, 38, 39, UBS) Kõn men in, jen jab bar kõtl̦o̦k bwe jabdewõt men ak jabdewõt armej en kõjepel kõj jãn Jeova.

Ñe jej jol̦o̦k bõd ejjab mel̦el̦ein em̦m̦an men eo ear wal̦o̦k. El̦aññe jej jeorl̦o̦k bõd eo an armej eo ear bõd n̦ae kõj, ejjab mel̦el̦ein bwe em̦m̦an men eo ear kõm̦m̦ane. Ejjab mel̦el̦ein bwe jej kadikl̦o̦k eddon bõd eo an. Im ejjab bar mel̦el̦ein bwe ejim̦we men eo ear kõm̦m̦ane. Keememej bwe Jeova ejjab m̦õn̦õn̦õ ñe armej rej kõm̦m̦ani men ko renana im rebõd. Bõtab, el̦aññe armej eo ej m̦oolin ukel̦o̦k, Jeova enaaj jol̦o̦k an bõd. (Sam 103:12, 13; Habakkuk 1:13, UBS) Ñe ej rõjañ kõj bwe jen jol̦o̦k bõd, ej kajjitõk ippãd ñan anõke e ilo wãween in. Jeova ejjab “dãpij An illu ñan indeeo.”—Sam 103:9; Matu 6:14.

Jej jipañ kõj make ñe jej jol̦o̦k ad illu. Etke jej ba men in? Eokwe baj l̦õmn̦ak m̦õk kõn waanjoñak in. Kwõj bõk juon dekã jãn lal̦ me eddo jidik, im ke kwõj jibwe, kwõj erl̦o̦ke peim̦. Emaroñ pidodo am̦ dãpiji ium̦win jidik iien. Ak ta el̦aññe etol̦o̦k? Ewi toon am̦ naaj maroñ dãpiji? Ium̦win jejjo minit ke? Juon awa ke? Ak aetokl̦o̦k? Ejjel̦o̦k pere ñe kwõnaaj dãpiji wõt dekã eo, enaaj jino m̦õk peim̦! Alikkar bwe ear jab oktak eddon dekã eo. Bõtab, el̦ak tol̦o̦k am̦ dãpiji enaaj ãinwõt ñe el̦ap an eddo. Eokwe ejjel̦o̦k oktak ñe jej dãpij wõt ad illu. El̦ak tol̦o̦k ad dãpij ad illu ippãn juon, ej kab baj l̦apl̦o̦k wõt ad metak. Men in emaroñ bar wal̦o̦k meñe bõd jidikdik men eo. Eñin unin Jeova ej rõjañ kõj bwe jen jol̦o̦k  bõd. Im ilo m̦ool, jel̦ak jol̦o̦k bõd ko an ro jet, ejipañ kõj.—Jabõn Kõnnaan 11:17, UBS.

Ta eo ear jipañ Linda ñan jol̦o̦k an illu kõn wãween an kar kõrã eo ilo eklejia eo an kõm̦m̦an ñane? Jet iaan men ko ear kõm̦m̦ani ej kõl̦mãnl̦o̦kjen̦ kõn eoon ko ilo Baibõl̦ me rej kõnnaan kõn ad aikuj jol̦o̦k bõd jãn aolepen bũruod. (Sam 130:3, 4, UBS) Men eo el̦aptata an kar jipañe Linda ñan kõm̦m̦ane men in ej ilo an kar kile bwe ñe jej lukkuun jol̦o̦k an ro jet bõd, Jeova enaaj bar jol̦o̦k ad bõd. (Epesõs 4:32–5:2) Ke ear riiti eoon kein, ej ba: “Ej ãinwõt ñe Jeova ear kõnnaantok ñan ña.”

Tokãlik, Linda ear maroñ jol̦o̦k an illu. Ear m̦õn̦õn̦õ in jol̦o̦k bõd eo an kõrã eo jein im jatin ilo eklejia eo an, im kiiõ erro lukkuun epaake doon. Jeova ear jipañ Linda bwe en wõnm̦aanl̦o̦k wõt ilo an karejar ñane. Ebar kõn̦aan jipañ eok ñan kõm̦m̦ane ejja men in wõt.