INEPATA ej jelõt armej otemjej ekoba armej ro an Anij. Rijeje sam ear ba, “Ij inepata im jorrããn.” (Sam 94:19, UBS) Im Jijej ear ba bwe ilo naaj raan ko ãliktata “inepata ko an mour in” emaroñ kõm̦m̦an bwe en lukkuun pen ad karejar ñan Jeova. (Luk 21:34, UBS) Ak baj kwe? Kwõj ke lukkuun inepata ñe ejabwe jããn, ak ñe ewõr apañ ko ilo baam̦le eo am̦, ak kõn nañinmej eo am̦? Elemen an Jeova maroñ jipañ eok ñan kijenmej wõt?

Jejjab maroñ in make kõm̦adm̦õdi apañ ko jej iiooni. Rijjilõk Paul ear ba: “Emmakijkij an inepata buñut kõm, . . .  jet iien kõm pere . . . , jet iien el̦ap aer ko̦kkure kõm.” Bõtab, ear bar ba, “Ak kõmij jab jorrããn,” “kõmij jab ebbeer” “im “kõm ban jeepepl̦o̦k.” Ta eo ej jipañ kõj ñan kijenmej wõt ium̦win apañ ko? Ej ‘kajoor eo eutiejtata’ im ej itok jãn Anij eo ekajoor bõtata, Jeova.—2 Korint 4:7-9, UBS.

L̦õmn̦aketok m̦õk iien ko kwaar lo an ‘kajoor eo an Anij’ jipañ eok ilo mour n̦e am̦. Kwõj keememej ke juon katak me juon ear kwal̦o̦ke im ekar kal̦apl̦o̦k am̦ kam̦m̦oolol Jeova kõn an jouj im yokwe? Ke kwaar katakin ro jet kõn mour ilo naaj Pedetaij, men in ear ke kal̦apl̦o̦k am̦ tõmak ilo kallim̦ur ko an Jeova? Ñe jej pãd ilo kweilo̦k ko im kwal̦o̦k kõn tõmak eo ad ñan ro jet, wãween in ej kakajoor kõj ñan kijenmej ium̦win apañ im inepata ko an mour in. Ej bar jipañ kõj ñan lo aenõm̦m̦an im lañlõñ wõt ilo ad karejar ñan Jeova.

Ejjel̦o̦k pere bwe kõn an lõñ men ko rej wal̦o̦k ilo mour n̦e am̦, kwõjjab jel̦ã ewi wõt ial̦ eo ejim̦we kwõn etal ie l̦o̦k. Ñan waanjoñak, Jeova ej kajjitõk ippãd bwe jen pukot m̦okta Aelõñ eo im ekkeini ad kõm̦m̦ani men ko renaaj kakajoor jem̦jerã eo ad ippãn. (Matu 6:33; Luk 13:24) Bõtab ta el̦aññe jum̦ae, nañinmej, ak apañ ko ilo baam̦le eo am̦ rej kapañ eok jãn am̦ kõm̦m̦ani men kein? Ak ta el̦aññe jikin jerbal eo am̦ ej kajjitõk bwe en aetokl̦o̦k awa in am̦ jerbal? Men in ej ke kõm̦m̦an am̦ m̦õk im ejjel̦o̦k am̦ iien ñan kobal̦o̦k ippãn eklejia eo? Eokwe, ñe kwõj l̦õmn̦ak kõn men kein aolep im an ejjel̦o̦k am̦ iien im maroñ ñan kõm̦m̦ani aolepeer, kwõmaroñ jino ebbeer. Im kiiõ kwõmaroñ jino l̦õmn̦ak bwe el̦ap an baj lõñ im pen men ko Jeova ej ba bwe kwõn kõm̦m̦ani.

Jeova el̦ap an mel̦el̦e kõn wãween ko jej iiooni. Eban kajjitõk bwe jen kõm̦m̦ani men ko rel̦l̦ã jãn joñan ad maroñ. Im Jeova ejel̦ã bwe ñe ãnbwinnid ej m̦õk im el̦ap ad inepata kõn men ko rej jelõt kõj, enaaj bõk iien bwe jen bar oktak im kajoor ãinwõt kar m̦okta.—Sam 103:13, 14.

Ñan waanjoñak, jen lale wãween an kar Jeova lale im kakajoore rũkanaan Ilaija. Ke Ilaija ear ebbeer im mijak im ko ñan ãne jem̦aden, Jeova ear ke kajeiki im jiroñe bwe en kaiur in jepl̦aak ñan jerbal eo an? Ear jab. Ruo alen an kar Jeova jilkinl̦o̦k enjel̦ eo an bwe en kõkkõm̦m̦anm̦õne an karuji Ilaija im lel̦o̦k kijen bwe en m̦õñã. Bõtab 40 raan tokãlik,  Ilaija ear inepata im mijak wõt. Ta eo Jeova ear bar kõm̦m̦ane? M̦okta, Jeova ear kwal̦o̦k ñane menin kabwilõñlõñ ko me rar kam̦ool bwe enaaj kõjparoke. Kein karuo, Jeova ear kaenõm̦m̦ane ilo an kar kõnono ñane ilo “juon ainikien edik im emera.” Im ãliktata, Jeova ear kõjjel̦ãik e bwe ebar wõr to̦ujin rũkarejar ro jet me rar tiljek wõt. Ejjabto tokãlik, Ilaija ear bar kajoor im kijejeto ilo an kõm̦m̦ane jerbal eo an ãinwõt juon rũkanaan. (1 Kiiñ 19:1-19, UBS) Ta eo jej katak jãn men in? Eokwe, ke Ilaija ear lukkuun inepata, Jeova ear kwal̦o̦k an jouj im kijenmej ippãn ke ear jipañe. Jeova ejjañin oktak, joñan dein an bar kaorõk im kea kake kõj.

Ñe kwõj l̦õmn̦ak kõn joñan eo kwõmaroñ lel̦o̦k ñan Jeova, em̦m̦an el̦aññe ej jãn joñan maroñ eo am̦. Jab keidi ta eo kwõmaroñ kõm̦m̦ane kiiõ ippãn ta eo kwokõn kõm̦m̦ane. Ñan waanjoñak, juon rittõr eo ear bõjrak an ettõr ium̦win jet allõñ ak iiõ, eban kajju bar kõm̦m̦ane joñan eo ekõn kõm̦m̦ane. Enaaj aikuj m̦okta jinoe jidik kõn jidik bwe en maroñ bar kajoor im maroñe joñan eo ekõn kõm̦m̦ane. Kũrjin ro rej ãinwõt juon eo ej ettõr. Ewõr aer mejãnkajjik im jidik kõn jidik rej kajjioñ tõpare. (1 Korint 9:24-27, UBS) Etke kwõjjab kõm̦m̦ane juon am̦ mejãnkajjik me ilo tõre in kwõmaroñ katõprake? Ñan waanjoñak, kwõmaroñ kõm̦m̦an bwe en juon am̦ mejãnkajjik ñan etal ñan juon iaan raanin kweilo̦k ko. Kajjitõk jipañ ippãn Jeova bwe en tõprak kõttõpar in am̦. Ñe ej bar jino kajoorl̦o̦k jem̦jerã eo am̦ ippãn Jeova, kwõnaaj “edjoñ im lo bwe Jeova ejouj.” (Sam 34:8) Keememej bwe jabdewõt men kwõnaaj kõm̦m̦ane me enaaj kaalikkar bwe kwõj yokwe Jeova, meñe edik, ak el̦ap an aorõk ippãn Jeova.—Luk 21:1-4.

Elemen an kar Jeova bar kakajoor June bwe en jepl̦aak ñane? June ej ba: “Iar keini aõ jar ñan Jeova bwe en jipañ ña. Innem juon iien, kõrã eo ippãn l̦eo nejũ ear ba ñan ña kõn juon kweilo̦k el̦ap ilo bukwõn eo aõ. Im iar pepe in etal ilo juon iaan raan ko. Ear juon eñjake ekalañlõñ ke iar bar pãd ibwiljin armej ro an Jeova! Kweilo̦k el̦ap eo ear men eo eto aõ kõttare me ekar bar kakajoor ña. Kiiõ ij bar m̦õn̦õn̦õ ilo aõ karejar ñan Jeova im ij kile bwe ewõrl̦o̦k tokjãn aõ mour. El̦apl̦o̦k aõ kile kiiõ bwe ij aikuji jipañ eo an rũttõmak ro jeiũ im jatũ im ij aikuj m̦õn̦õn̦õ in bõk jipañ jãn er. Im̦õn̦õn̦õ bwe ear wõr wõt iien ñan aõ bar jepl̦aak.”