Yokwe rũttõmak eo m̦õttam:

Ãinwõt am̦ jel̦ã, Baibõl̦ eo ej juon bok me el̦ap an kwal̦o̦k kõn mour ko an armej ro. Elõñ iaan rein ej em̦m̦aan im kõrã ro rar jelm̦ae wãween ko reppen me jej bar iiooni. Armej rein rar ãinwõt kõj kõnke rar bõk ejja eñjake im l̦õmn̦ak ko wõt jej bũki. (Jemes 5:17) Jet iaan rein ilo Baibõl̦ rar lo apañ im inepata, im men kein rar lukkuun kaddouk bũrueer. Ro jet el̦ap an kar ro ilo baam̦le ko aer im rũttõmak ro m̦õttaer kõmetak er. Bareinwõt, elõñ rar eddodo im l̦e jãn joñan an nana aer mour kõn bõd ko rar kõm̦m̦ani.

Bõtab, ear ke lukkuun el̦l̦o̦k bũruon rein jãn Jeova? Jaab. Elõñ iaaer rar bõk ejja eñjake eo wõt an rijeje sam ke ear jar ñan Anij im ba: “Ij itoitak ãinwõt juon jiip eo ejebwãbwe; Kõn men in kwõn itõn pukot eõ, rũkarejeram̦, kõnke ijjañin kõjekdo̦o̦n kien ko am̦.” (Sam 119:176, UBS) Ãindein ke bar am̦ eñjake?

Jeova ejãmin mel̦o̦kl̦o̦k rũkarejar ro an me rej ãinwõt jiip ko rar jebwãbwe jãn wõrwõr eo an. Ej pukpukot er im kon̦aan bar kõjepl̦aak er. Im ekkã an kõm̦m̦ane men in ilo an kõjerbal rũttõmak ro jet bwe ren jipañ rein. L̦õmn̦ak m̦õk kõn waanjoñak eo an Job. Jeova ear jipañe rũkarejar in an ke ear jelm̦ae mãlejjoñ ko rel̦l̦ap. Jet iaan men kein ej kõn an kar luuji jããn ko an im men ko m̦weien, ear mej ro rar jitõnbõro ippãn, im ear bõk juon nañinmej enana im kaeñtaanan. Bareinwõt, Job ear kijenmej wõt ke jilu iaan ro m̦õttan me ren kar rejetake rar oktak im kwal̦o̦k naan ko reddo im rekõmmetak ñane. Meñe Job ear iiooni men kein ak ear jab el̦l̦o̦k jãn Jeova, bõtab ear wõr juon iien ear jab jim̦we l̦õmn̦ak eo an. (Job 1:22, UBS; 2:10, UBS) Elemen an kar Jeova jipañ Job bwe en bar jim̦we l̦õmn̦ak eo an?

Juon iaan wãween ko Jeova ear jipañe Job kaki ej ilo an kar kõjerbal Ilaihu, rũttõmak eo m̦õttan Job. Ke Job ear kwal̦o̦k men ko ear inepata kaki ñan Ilaihu, Ilaihu ear roñjake. Innem ear ba jet naan ñan Job. Ta ko ear ba ñane? Ear ke kananaiki? Ear ke n̦aruon im kajooke? Ear ke l̦õmn̦ak bwe eutiejl̦o̦k jãn Job? Ear jab ñan jidik! Kõn jipañ eo jãn kajoor eo an Anij, Ilaihu ear ba naan kein: “Kõjro ej juon wõt im̦aan mejãn Anij, kõnke ear kõm̦anm̦an kõjro jãn bwidej.” Innem ear wõnm̦aanl̦o̦k wõt im ba, “Ejjel̦o̦k unin am̦ mijak eõ; Ijãmin kalelñoñ eok bwe kwõn errã ippa.” (Job 33:6, 7, UBS) Ilaihu ear jab ba naan ko renaaj kar kõmetak im kaddouk bũruon Job. Bõtab, ear jipañe ilo an kar kajim̦we l̦õmn̦ak eo an ebõd im kwal̦o̦k naan ko rekõketak me Job ear aikuji.

Eñin ejja wãween eo wõt kõmar l̦oore ke kõmar kõpooje bok in. M̦oktata, kõmar roñjake an elõñ iaan ro rar bar jebwãbwe jãn m̦ool eo kwal̦o̦k wãween ko rar iiooni im bareinwõt l̦õmn̦ak im eñjake ko aer. (Jabõn Kõnnaan 18:13) Innem, kõmar jar im kappok jipañ jãn eoon ko ilo Baibõl̦ ke kõmar etale ewi wãween an kar Jeova jipañ rũkarejar ro an ilo iien ko etto me rar jelm̦ae ejja mãlejjoñ kein wõt. Ãliktata, kõmar bõk bwebwenato ko ilo Baibõl̦ im bwebwenato ko an rũkarejar ro an Anij ilo raan kein im kõm̦m̦ane bok in. Kõmij rõjañ eok ñan riiti im etale kobban bok in. Bareinwõt, kõmij kõn̦aan ba bwe el̦ap ammim yokwe im kaorõk eok.

Kumi eo Ej Lale Aolep Eklejia ko an Ri Kõnnaan ro an Jeova