Baibõl̦ ej ba bwe Jeova Anij ear kõm̦anm̦an kõrã eo m̦oktata etan Iv im “ãñintok ñan ippãn” Adam. Eñin ej iien eo me Anij ear kõm̦areik rippãlele ro ruo m̦oktata * (Lale kõmel̦el̦e eo itulal̦). Joñan an kar Adam m̦õn̦õn̦õ, ear ba: “Kiiõ ej kab naaj wõr m̦õtta, diin ej diũ im kanniõkin ej kanniõkũ.” (Jenesis 2:22, 23, UBS) Jeova ekõn̦aan bwe aolep rippãlele ro me em̦õj aer m̦are ren m̦õn̦õn̦õ ippãn doon.

Ãlikin an ruo armej m̦are, ekkã aer l̦õmn̦ak bwe men otemjej renaaj em̦m̦an im jejjet. Bõtab l̦õmn̦ak in ejjab jim̦we. Ilo m̦ool, meñe el̦ap an l̦eo im lio yokwe doon ak enaaj baj wal̦o̦k wõt apañ ikõtaaerro. (1 Korint 7:28) Bok in ej kwal̦o̦k kõn naan in kakapilõk ko jãn Baibõl̦ me remaroñ jipañ rippãlele ro im ajri ro nejier bwe ren m̦õn̦õn̦õ.​—Sam 19:8-11, UBS.

EKKAR ÑAN BAIBÕL̦: Em̦m̦aan eo ej bõran baam̦le eo.​—Epesõs 5:23.

El̦aññe kwe juon em̦m̦aan im em̦õj am̦ m̦are, Jeova ekõn̦aan bwe en lukkuun em̦m̦an am̦ kõm̦m̦an ñan kõrã eo pãleem̦. (1 Piter 3:7) Anij ear kõm̦m̦ane kõrã eo pãleem̦ bwe en rejetam̦ im ekõn̦aan bwe kwõn lukkuun yokwe im kaorõke. (Jenesis 2:18, UBS) Kwõj aikuj yokwe kõrã eo pãleem̦ im l̦õmn̦ak kõn kõn̦aan im aikuj ko an m̦okta jãn kõn̦aan im aikuj ko am̦ make.​—Epesõs 5:25-29.

El̦aññe kwe juon kõrã im em̦õj am̦ m̦are, Jeova ekõn̦aan bwe kwõn lukkuun kautiej l̦eo pãleem̦ im jipañe ilo an kõm̦m̦ani eddo ko an. (1 Korint 11:3; Epesõs 5:33) Kwõn kate eok ñan rejetake pepe ko an im kwõn m̦õn̦õn̦õ in jipañe iien otemjej. (Kolosse 3:18) Ñe kwõnaaj kõm̦m̦ani men kein, enaaj l̦apl̦o̦k wõt an Jeova im eo pãleem̦ kaorõk eok.​—1 Piter 3:1-6, UBS.

MEN KO KWÕMAROÑ KÕM̦M̦ANI:

• Kajjitõk ippãn eo pãleem̦ kõn ta ko kwõmaroñ kõm̦m̦ani bwe en em̦m̦anl̦o̦k wõt wãween am̦ kõnnaan im kõm̦m̦an ñane. Kwõn lukkuun roñjake an kwal̦o̦k an l̦õmn̦ak, im kwõn kate eok ñan kõm̦m̦ani men ko ej kile bwe kwõmaroñ kakõm̦anm̦anl̦o̦k

• Kijenmej wõt ippãn eo pãleem̦. Enaaj bõk iien bwe komiro en jim̦or jel̦ã ta ko komiro ej aikuj kõm̦m̦ani bwe komiro en m̦õn̦õn̦õ ippãn doon

EKKAR ÑAN BAIBÕL̦: Kwõj aikuj l̦õmn̦ak kõn kõn̦aan im aikuj ko an eo pãleem̦. (Pilippai 2:3, 4, UBS) Kwõn kaorõke eo pãleem̦, im keememej bwe Jeova ekõn̦aan bwe aolep ro me rej jerbal ñane ren kwal̦o̦k “jouj ñan armej otemjej.” (2 Timote 2:24) Kwõn lukkuun kõjparok wãween am̦ kõnnaan. Baibõl̦ ej ba: “Naan ko an juon rũjajel̦o̦kjen̦ remaroñ ko̦kkure juon armej ãinwõt juon jãje; ak naan ko an juon rũjel̦ãl̦o̦kjen̦ remaroñ kãjmour juon armej.” (Jabõn Kõnnaan 12:18, UBS) Kajoor eo an Jeova emaroñ jipañ eok bwe kwõn kwal̦o̦k yokwe ñan eo pãleem̦ im kõnono ilo jouj ñane.​—Galetia 5:22, 23; Kolosse 4:6.

MEN KO KWÕMAROÑ KÕM̦M̦ANI:

• M̦okta jãn am̦ kõnnaan ippãn eo pãleem̦ kõn juon men eaorõk, kwõn jar im kajjitõk ippãn Anij bwe en jipañ eok bwe en jab naaj m̦õkaj am̦ illu im kwõn m̦õn̦õn̦õ in roñjake ñe eo pãleem̦ enaaj kõnnaan

• M̦okta jãn am̦ kõnnaan ñan eo pãleem̦, kwõn l̦õmn̦ak m̦okta kõn ta ko kwõnaaj ba ñane im wãween am̦ naaj kõnnaan ñane

EKKAR ÑAN BAIBÕL̦: Ãlikin amiro m̦are, komiro ej kiiõ “juon wõt.” (Matu 19:5, UBS) Bõtab, keememej bwe enaaj baj wõr wõt iien me enaaj oktak l̦õmn̦ak ko amiro jãn doon. Kõn men in, komiro en katak kilen jerbal ippãn doon ãinwõt an armej ro ilo juon tiim in iukkure aikuj jipañ doon. (Pilippai 2:2) Innem, komiro ej aikuj errã ippãn doon ñe komiro ej kõm̦m̦an pepe. Baibõl̦ ej ba: “Ijo elõñ ripepe, em̦õj kapen l̦õmn̦ak ko.” (Jabõn Kõnnaan 15:22) Komiro en l̦oori naan in kakapilõk ko jãn Baibõl̦ ñe komiro ej kõm̦m̦ani pepe ko raorõk.​—Jabõn Kõnnaan 8:32, 33.

MEN KO KWÕMAROÑ KÕM̦M̦ANI:

• Kwal̦o̦k bũruom̦ ñan eo pãleem̦

• Kõnnaan ippãn eo pãleem̦ m̦okta jãn am̦ kõm̦m̦ane jabdewõt pepe