Ñe ruo armej rej m̦are, erro ej ejaake juon aerro make baam̦le. Kwõnaaj baj kaorõk im yokwe wõt rũtto ro jem̦am̦ im jinem̦. Ak armej eo me ej aikuj aorõktata ilo mour n̦e am̦ ej eo pãleem̦. Emaroñ pen men in ippãn jinem̦ im jem̦am̦ im remaroñ inepata ippam̦. Bõtab, naan in kakapilõk ko jãn Baibõl̦ remaroñ jipañ eok ñan jel̦ã ta eo kwõn kõm̦m̦ane bwe komiro eo pãleem̦ en m̦õn̦õn̦õ wõt im en wõr wõt aenõm̦m̦an ikõtaamiro im rũtto ran̦e jinemiro im jememiro. Naan in kakapilõk ko ilo katak in remaroñ bar jipañ eok bwe en wõr aenõm̦m̦an ikõtaamiro im ro jeimiro im jatimiro, jibũmiro im jim̦m̦aamiro, im ro jet ilo baam̦le ko amiro.

EKKAR ÑAN BAIBÕL̦: “Kwõn kautiej jem̦am̦ im jinem̦.” (Epesõs 6:2) Kwõj aikuj kwal̦o̦k kautiej ñan jinem̦ im jem̦am̦ jekdo̦o̦n ñe kwõrũtto. Kwõj aikuj keememej bwe eo pãleem̦ ej aikuj bar kõm̦m̦an an iien ippãn jinen im jemãn kõnke ej nejier. Kõn men in, kwõn jab ebbanban ak inepata ñe eo pãleem̦ ej epaake rũtto ro jinen im jemãn. Baibõl̦ ej ba: “Yokwe ejjab ebbanban.”—1 Korint 13:4, UBS; Galetia 5:26, UBS.

MEN KO KWÕMAROÑ KÕM̦M̦ANI:

• En jab kõl̦l̦apl̦ap am̦ kõnnaan. Ãinwõt ba, “Aolep iien elukkuun nana an baam̦le n̦e am̦ kõm̦m̦an ñan ña” ak “Ejjel̦o̦k juon iien jinem̦ ej m̦õn̦õn̦õ kõn men kã ij kõm̦m̦ani”

• Kajjioñ in mel̦el̦e kõn eñjake ko an eo pãleem̦

EKKAR ÑAN BAIBÕL̦: ‘Juon em̦m̦aan enaaj likũt jemãn im jinen im koba ippãn lio pãleen, im erro naaj juon wõt.’ (Jenesis 2:24, UBS) Jekdo̦o̦n ñe em̦õj am̦ m̦are, ak jinem̦ im jem̦am̦ remaroñ l̦õmn̦ak wõt bwe kwõj pãd ium̦win peier. Jet iien remaroñ kwal̦o̦k ta ko komiro en kõm̦m̦ani meñe ejjel̦o̦k aer waj ilo pãd n̦e amiro.

Komiro en pepe kõn ta ko komiro ejjab kõn̦aan bwe jinemiro im jememiro ren bõk kun̦aaer ippemiro kaki. Komiro maroñ kwal̦o̦k ñan er kõn pepe eo amiro. Jab mijak in kwal̦o̦k m̦ool ñan er, bõtab komiro en kõm̦m̦ane men in ilo jouj. (Jabõn Kõnnaan 15:1) El̦aññe kwõj kwal̦o̦k ettã bõro, jouj, im kwõj kijenmej wõt, enaaj wõr aenõm̦m̦an ikõtaamiro im rũtto ran̦e jinemiro im jememiro im kom̦ naaj yokwe wõt doon.​—Epesõs 4:2.

MEN KO KWÕMAROÑ KÕM̦M̦ANI:

• Ñe kwõj inepata kõn an l̦ap an jinemiro im jememiro bõk kun̦aaer waj ilo pãd n̦e amiro, kõttar an med bũruom̦ im kõnnaan kake ippãn eo pãleem̦

• Komiro en pepe ippãn doon kõn kilen amiro naaj kõm̦adm̦õde apañ eo