M̦ÕTTAN 4
Kilen Kõjerbal im Kõjparok Jããn
“Ijo elõñ ripepe, em̦õj kapen l̦õmn̦ak ko.”—Jabõn Kõnnaan 15:22
Jej aikuj jããn ñan kabwe aikuj ko an baam̦le eo ad. (Jabõn Kõnnaan 30:8, UBS) Ñe ewõr ad jããn, men in ej jipañ kõj bwe jen jab pãd ilo aikuj. (Ekklisiastis 7:12) Bõlen emaroñ pen amiro eo pãleem̦ kõnnaan ippãn doon kõn kilen kõjerbal im kõjparok jããn kan̦i amiro. Meñe ãindein, komiro en jab kõtl̦o̦k bwe jããn en ko̦kkure pãd n̦e amiro. (Epesõs 4:23, UBS) Rippãlele ro rej aikuj lõke doon im pepe ippãn doon kõn kilen aer nãj kõjerbal im kõjparok jããn ko aerro.
1 PEPE IPPÃN DOON
EKKAR ÑAN BAIBÕL̦: “El̦aññe juon iaami ej l̦õmn̦ak in kalõk juon em̦ utiej, ej jijet im l̦õmn̦ake m̦okta ewi dettan on̦ãn an naaj kalõke, kõnke en lale ebwe ke m̦ani ippãn ñan an kam̦õje jerbal eo.” (Luk 14:28, UBS) Komiro eo pãleem̦ ej aikuj pepe kõn kilen amiro naaj kõjerbal im kõjparok jããn kan̦e amiro. (Amos 3:3, UBS) Komiro en pepe kõn men ko komiro ej aikuji im lale el̦aññe ebwe jããn ippemiro ñan wiaiki. (Jabõn Kõnnaan 31:16, UBS) Jekdo̦o̦n ñe elõñ amiro jããn, ak em̦m̦anl̦o̦k ñe komiro ej l̦õmn̦ak m̦okta jãn amiro wiaik jabdewõt men. Komiro en kõjerbal wõt joñan eo ewõr ippemiro im kõjparok bwe en ejjel̦o̦k amiro m̦uri.—Jabõn Kõnnaan 4:26; 22:7, UBS.
MEN KO KWÕMAROÑ KÕM̦M̦ANI:
-
El̦aññe ewõr bween jããn ko amiro, komiro ej aikuj pepe ippãn doon el̦aññe komiro naaj kõjerbali ak kõjparoki
-
El̦aññe ewõr amiro m̦uri, komiro ej aikuj pepe ippãn doon ñan kadikl̦o̦k amiro kõjerbal jããn. Ñan waanjoñak, ijello̦kun amiro etal im rejtõrõn (restaurant) ak wia m̦õñã ilo teikaut ko (take out), komiro maroñ kõmat kijemiro make
2 KWAL̦O̦K M̦OOL IM L̦ÕMN̦AK KÕN JOÑAN MAROÑ KO AMIRO
EKKAR ÑAN BAIBÕL̦: “Kõm kõn̦aan kõm̦m̦an jim̦we, ejjab im̦aan mejãn Irooj wõt, ak bareinwõt im̦aan mejãn armej.” (2 Korint 8:21, UBS) Ñe ewõr am̦ jerbal, kwõj aikuj kwal̦o̦k m̦ool ñan eo pãleem̦ kõn joñan on̦ãm̦ im joñan jããn ko kwõj kõjerbali.
M̦okta jãn am̦ kõm̦m̦ane jabdewõt pepe kõn jããn ko amiro, kwõj aikuj kõnnaan ippãn eo pãleem̦ kake. (Jabõn Kõnnaan 13:10, UBS) El̦aññe komiro ej kõnnaan ippãn doon kõn kilen amiro kõjerbal im kõjparok jããn kan̦i amiro, enaaj wõr aenõm̦m̦an ikõtaamiro. Jab l̦õmn̦ak bwe jããn ko ilo kõl̦l̦ã eo am̦ rej am̦ wõt. Kwõj aikuj watõki bwe rej amiro jim̦or.—1 Timote 5:8, UBS.
MEN KO KWÕMAROÑ KÕM̦M̦ANI:
-
Komiro en pepe ippãn doon kõn joñan jããn eo me kwõmaroñ kõjerbale im joñan eo me eo pãleem̦ emaroñ kõjerbale. Ilo wãween in, ejjab menin aikuj ñan am̦ kajjitõk ippãn eo pãleem̦ kõnke em̦õj amiro pepe kadede
-
Jab kõttar an wal̦o̦k apañ im kiiõ komiro ej kab kõnnaan kõn jããn
